1 Peter 2 - Iñupiatun Mumiksat Uqalugiksuat

Iñuuruaq Uyaġak Ilaaguaqtauruaġlu Nation

¹ Tavra aġiusigik iluqaisa pigiitchuat. Sagluuŋaiġitchi ukpiŋŋuaŋaiġḷusiḷu killuqsraŋaiġḷusiḷu tiġliraqłiŋaiġḷusiḷu.

² Aniqqammiuratun miqłiqtuuratun ataramik immuktuġuktuatun aasii aglivḷutiŋ milugivlugu immuk, tainnatulli kipiġniuġutigisiuŋ iḷitchuġisaiññaġuglugu God-im iḷumun ittuaq uqalua, aasii ukpiqtuagulusi agliḷḷuataŋaruatun, iḷumutun annaurrauŋalusi.

³ Qanuq iḷitchuġianiŋagiksi pikałaktautairrutaa Atanġum.

⁴ Ullautisitchi Ataniġmun iñuuruamun, uyaġaktun ittuamun, pigisuŋisaŋannun iñuich, aglaan God-im piksraqtaaġikkaŋa akisuruaġivlugu.

⁵ Qaisitchi Ataniġmun, isummatigilusi ilivsiññik uyaġaktun iḷiḷusi iñuugaluaŋŋavsi, Atanġum atuġumagaasi nappaġumiuŋ qiñiġnaitchuaq aŋaiyyuvikpani. Aasii ilivsi inniaqtusi Atanġum piḷuutaitchuatun aŋaiyyuliqsiqpaŋisun. Aŋaiyyuliqsiqpaich tuqutchisuuruatun niġrutinik aasii aitchuutigivlugich Ataniġmun ikipkaiviŋmi, tainnatulli aitchuiyumiñaġniaqtusi aŋaiyyutivsiññik nanġautivsiññiglu God-mun Jesus Christ-kun, aasii taamna akuqtuġnaġumiñaġniaqtuq ilaanun.

⁶ Qanuq Bible uqaluŋich uqaqtut inna, “Piksraŋaruŋa akisuruamik uyaġaŋmik, paŋmapak iḷigiga kaŋiġalluŋmun uyaġaliutivlugu Zion-mi, aasii kiñaliqaa ukpiqtuaq ilaanun nunuuraliġumiñaitchuq.”

⁷ Taamnaasii uyaġak akisupiaġataqtuq ilivsiññun ukpiqtuanun, aglaan tamatkunuŋa ukpiŋitchuanun, “Taamna uyaġak igluqpirit pisuŋisaŋat anniqsuutauŋiññivḷugu, iḷiruq naumaniqsraupiaqłuni uyaġak.”

⁸ Suli allami Bible uqaluŋich uqallaktut inna, “Uyaġaum taavruma putukkisinniaġai iñuich, uyaġak ulġutchiñiaqtuq iliŋiñik.” Qanuq iliŋich puukaqtut pisigivlugu ukpiŋiññiqtiŋ uqaluŋmik. Tainna God-im pisuutaa inŋaniqsuq ilaisigun.

⁹ Aglaan ilivsi iñuksraqtaaġirauŋarusi, Umialgum aŋaiyyuliqsiqpaŋi, ilaaguaqtauvlutiŋ Nation-guruat, God-im nanmiñiq iñuŋi, piksraqtaaguruat quliaqtuaġitquvlugich aliuġnaqtuat savaaŋi God-im, taavruma ququaġiruam ilivsiññik taaqtuamiñ ilaan aliuġnaqtuamun qaummaġmiñun.

¹⁰ Qaŋauvlugu God-im iñugiŋitkaluaŋakkaŋasi, aglaan paŋmapak God-im iñugiliutiŋagaasi. Qaŋauvlugu naluŋagaluaqtuasii God-im nagliktuutaanik, aglaan paŋmapak nagliktuusianikłusi.

God-im Kivgaŋi

¹¹ Piviuttaġirauruasii, tuyuġmiułhiñaqtusi mattumani nunami, aimaaġvivaalluksi qiḷaŋmiittuq. Tavraasii apiġipiaġivsi aulatinŋaiġitchi piḷuusiqisuguuruanun timivsiññun aŋuyaktuanun ilitqutchivsiññik.

¹² Nalaunŋaruakun iñuuniaġitchi akunġanni ukpiŋaitchuat, iḷaanni uqautigimaqłukkumisi killuliqiruaġuġlusi tautuksiññaġumagaich iñuulluataġnisi, aasii nanġaġlugu God Christ qaitqikpan.

¹³ Kamakkutiqaġitchi iñupayaanun ataniġnaqutiqaqtuanun Ataniq pisigilugu, Rome-miut umialgannun qaukłiuruamun,

¹⁴ naagga kavanakkaluanun tiliŋakkaŋiñun ilaata tatavsaitquvlugich tamatkuniŋa killuliqiruanik, aasiisuli nanġaġiaqługich tamatkua iłuaqtualiqiruat.

¹⁵ Qanuq pisuutigigaa God-im iñuutquvlusi nalaunŋaruakun naluruat iñuich pisaaŋannigniaqtuat ilivsiññik ukpiqtuanik pisaaŋŋatiksraiḷḷiuġumaut.

¹⁶ Atanniqsimaraitkaluaŋŋavsi pitquranik, atanniqsimaraiññiḷusi piḷuusiqiruksrauŋitchusi. Iñuusiqaġitchi God-im kivgaŋisun savaaġilugu ilaan pisuutaa ataramik.

¹⁷ Suuŋiḷaġinagich iñupayaat. Piviuttaġisigik ukpiqtuaguqatisi. Qiksigilugu God. Suuŋiḷaġinagu Umialik.

Christ Tuvraaksriutaa Nagliksaaġnikun

¹⁸ Kivgauruasii, kamakkutiqaġitchi atanivsiññun iḷisimanaqsiḷugu naamaruaq qiksiksraun, nagliktauruanun piaqłuktaŋitchuanullu kisiiññun piŋaiġḷusi, aglaallu igḷutulgunaitkaluaqtuanun atanivsiññun.

¹⁹ Igḷutuiguvsi nagliksaaġunmik nalaunŋarualiqigaluaġlusi iviġagniaġiksi God, igḷutuutiguvsi nalautchuglugu ilaan pisuutaa.

²⁰ Pisigilugu killuliqinġiñ qiñuiġḷutin igḷutuġaluaġupku nagliksaaġun, nanġausiaksraitchutin God-miñ. Aglaan qiñuiġḷutin igḷutuġupku nagliksaaġun iłuaqtualiqigaluaŋŋaqpich God-im iviġaumagirualiñiaġaatin.

²¹ Tainnasiq nagliksaaġun iḷagigaa savaaksriusiavsi God-miñ, aasii Christ nagliksaaŋaruaq pisivlusi tuvragaksraġigiksi, suli piḷusi ilaan pisiatun.

²² Ilaa piḷuusiqiŋaitchuq sumikunnii. Qaŋaunnii sagluŋaitchuq.

²³ Uqamaqłuurraukami, uqamaqłuunmik kiummatiŋaitchuq. Nagliksaaqami, sivuuġasaaqłiŋaitchuq, aglaan ukpiġiŋagaa God, isivġiiruaq nalaunŋaruakun.

²⁴ Christ igḷutuŋagai piḷuutivut timimiñi tuquvluni aŋarraurami, uvagut tuquruatun pitquvluta piḷuunmun, aasii iñuuluta nalaunŋarualiqiluta. Tainna pikami, uvagut iłuaqsipkaqtuatun piŋagaatigut kiḷḷiaqtauniġmigun.

²⁵ Qanuq tammaŋaruaguŋarusi imnaisun, aglaan paŋmapak utiŋarusi Imnaiḷiqirimun Qaunaksriŋannullu ilitqusivsi.