1 Peter 1 - Iñupiatun Mumiksat Uqalugiksuat

¹ Peter, tiliraŋa Jesus Christ, tuyuqtuq God-im iñuksraqtaaŋiñun iñuuruanun pigruŋavlutiŋ nunaaqqiñun Pontus-mun Galatia-mullu Cappadocia-mullu Asia-mullu Bithynia-mullu.

² God-im Aapauruam piksraqtaaġiŋagaasi taimani miqłiqtuġisukłusi, sivunniŋavluni ilaaguaqtitquvlusi inmiñun Ilitqusiġiksuamun, sivunniŋavluniḷu iñuutquvlusi kamagiugaġlugu Jesus Christ, piḷuutaiŋammasi tuqukami maqipkaqługu auni. Nagliktuusiaqpaqaġitchi tutqiunmiglu.

Niġiugniq Taimuŋa Iñuuyumaaġniġmun

³ Nanġaqtauli God Aapaŋa Atanipta Jesus Christ. Qanuq ilaa naglikkutiqpaqaqłuni uvaptiŋnun iñuutchiŋagaatigut nutauruamik aŋipkaqługu Jesus Christ tuqqunmiñ. Taavruma niġiukkiġaatigut iñuuniksramik isuitchuamun,

⁴ suli niġiuktugut kiŋuvaannagniaqtilaaptiŋnik quviasuusiaqpaŋnik God tutquqsimakkaŋiñik pigitquvlugich iñuŋmiñun. Ilaan tutquqsimagai kiŋuvaannaktaaksrautit qiḷaŋmi iñuqaqługich ilivsiññun, aunaitchuami maquliñaitchuami qiññaġiiḷiñaitchuamiḷu.

⁵ Tamatkua annaurrauniġmi quviasuusiaksrautit kiŋuvaannaktaaguyumaaqtuat God-im itqanaiyaŋarani qaiññiaġai piviksraq isukłitpan. Aasii God-im sapiġñaqtuakun suaŋŋanmigun qaunaginiaġaasi aitchuusiaġiyumiñaqsiḷugich pisigilugu ukpiġutiqaġniqsi.

⁶ Taamna pisigilugu quviasugitchi, paŋmapak-unnii sivikitchuami nagliksaaġutiqallakkaluaġuvsi allakaaġiiñik uuktuaġusianik.

⁷ Uuktuaġusiavsi sivuniġigaat iḷumun itilaaqsaqługu ukpiġutiqapiaqtilaaqsi. Manikunnii kaviqsuaq maqullaruaq uuktuaġuugaat ignikun, tainnatuttauq ukpiġurri akisułhaasugruktuaq maniŋmiñ kaviqsuamiñ uuktuaġusiaqaqtuksraummiuq igḷutuutiyumiñaqsiḷugu. Tavraasii nanġausiaqaġniaqtusi kamanaqsipkaqtaulusiḷu isumakkusiaqaġluatapiaġlusiḷu taivrumani uvlumi Jesus Christ qaitqikpan.

⁸ Tautuŋaitkaluaŋŋaan ilaa, ilivsi piviuttaġigiksi. Paŋmapak tautuaġiŋitkaluaŋŋaan ukpiqtusi ilaanun, aasii quviasuutiqpaqaqtusi quviasuutiqpapiaġatamik uqautigianignaġumiñaitchuamik,

⁹ qanuq iḷisimarusi aitchuusiaġiniaqtilaaŋanik annautaa ilitqusivsi, taŋŋiutauruaq ukpiġikkavsiññun.

¹⁰ Taamna annaun uqaqtiŋisa God-im ivapiaŋagaluaġaat iḷitchuġiniaqługulu, aasii iliŋisa uqautigiŋagaich quviasuusiaksrautit God-im aitchuutiksrautiŋi ilivsiññun.

¹¹ Tavra Christ Ilitqusian uqaqtinmatiŋ taavrumiŋa piyumaaqtuamik qakugukpan Christ nagliksaaġniksrautaanik aŋiñiksrautaaniglu, iḷisimayumaŋagaluaqtut qakugupiaq taamna piñiaqtilaaŋanik kisumullu iñuŋmun piñiaqtilaaŋanik.

¹² God-im taipkua uqaqtini iḷitchuġipkaŋagai tamatkua uqautigikkaŋich piyumaaŋiññivḷugich iliŋisa iñuuniŋanni, aglaan piñiaġnivḷugich aquvatigun ilivsi iñuunivsiññi. Paŋmapak-aasii tusaayugaaġiksuat quliaqtuaguaniŋarut iluqavsiññun. Tilirauruat suaŋŋasiġmatiŋ Ilitqusiġiksuam tilirauruam qiḷaŋmiñ, quliaqtuaġutiŋagaasi tusaayugaaġiksuanik isaġulgich-unnii kaŋiqsiyumaŋagaluakkaŋiññik.

Iñuutqun Piḷuutaitchuakun

¹³ Tamatkua tainnainmata, ataramik isumaqaġitchi God-im isumatqutaatun, illusi iñuktun upaluqsałhiñaaguruatun savaaksranun. Ilivsiññik aŋalalluataġlusi niġiugiugaġlugich quviasuusiaksrat aitchuusiaksrautisi Jesus Christ salapqiqpan.

¹⁴ Kamakkutiqaġitchi God-mun, uqaqsiġiaqtuatun miqłiqtutun. Iñuusiġiŋaiqsigik qaŋauvlugu piḷuutikun iñuusiġisuukkasi piḷġusiġivlugich naluŋŋavsi tusaayugaaġiksuamik.

¹⁵ Aglaan iñuusitchi piḷuutaiḷḷusi iluqaisigun piḷġusivsigun, piḷuutaiḷḷusi God-itun piḷuutaitchuatun, ququaġiŋaruatun ilivsiññik ukpiquvlusi.

¹⁶ Qanuq Bible-ni God piraksriiŋaruq inna, “Piḷuutaitchuksraurusi qanuq uvaŋa piḷuutaitchuŋa.”

¹⁷ Aasii aŋaiyyukavsi taisuugiksi Aapamik. Ilivsi Aapagikavsiuŋ isivġiisuuruaq iñuŋnik allagiiksitasuŋaġnagich savaallaaŋisigun, iñuusiqaġitchi qiksiksrautiqaġlusi ilaanun sivisutilaaŋatun nunami iñuunivsi.

¹⁸ Qanuq iḷisimarusi suna akiḷiutauŋatilaaŋanik atanġiqsitchaqłusi anniqsuusiqiŋitchuamiñ iñuusiġikkavsiññiñ, iñuutchimiñ pigiitchuamiñ kiŋuvaaġiŋakkavsiññiñ maŋŋuuvsiññiñ. Taavruma akiḷiutauruam akisutilaaŋa akikł̣ipayaaġumiñaitchuq manium qatiqtuam naagga kaviqsuam akikł̣iraġausiatun.

¹⁹ Atanġiqsitauŋarusi akisupiaġataqtuamik aitchuutauŋaruamik Christ-mik, aitchuutauruaq imnaiyaatun qilluutaitchuatun.

²⁰ Ilaa tainna God-im sivunniutiŋagaa nuna savaŋaunnagu, aglaan satqummiqsauvluni aqulliġñi uvluni pisigivlusi.

²¹ Christ-kun ilivsi ukpiqtusi God-mun, aŋipkairuamun ilaanik tuqqunmiñ aasii kamanaqsipkaqługu, ukpiqtuiññaquvlusi annagummatiqaġlusiḷu God-mun.

²² Paŋmapak-aasii piḷuutaiqsauganikavsi kamaksrirraqsivḷusi God-im iḷumun ittuamik uqaluanik piviuttaqsriḷḷasirusi iḷumutun ukpiqtuaguqativsiññik. Tavraasii nalupqinaiyapiaqsiuŋ iḷumupiaq piviuttaġitilaaŋannik ukpiqtuaguqatisi iḷuvsiññiñ.

²³ Qanuq uqaluagun God-im iñuuruakun isukłiḷaitchuakullu anitqiksitauŋarusi, miqłiqtuliutivlusi aŋayuqaamun tuqulaitchuamun tuquyumaaŋitchuamullu.

²⁴ Bible uqaluŋich uqaluqaqtut inna, “Iñupayaat tuqullarut, iviktun panaqłukługu tuquliruatun. Iluqaġmi kamanautaat iñuich ittuq nauriam qiñiyunautaatun tuquliruatun aasii katakłuni nunamun.

²⁵ Aglaan uqalua Atanġum ittuq isuitchuamun.” Taamna uqaluk tusaayugaaġiksuaguruq alġaqsruutauŋaruaq ilivsiññun.