1 Kings 9 - Iñupiatun Mumiksat Uqalugiksuat

God Niptatqigman Solomon-mun

¹ Umialik Solomon Aŋaiyyuvikpaliuganigataqami suli igluqpiani naałługu allallu sut savaaġisuktani,

² Atanġum niptaġvigivsaaŋagaa, piusimisun Gibeon-mi.

³ Atanġum uqallautigaa, “Tusaagiga aŋaiyyutin. Nalunaiqsaġigiga una Aŋaiyyuvikpak nappaqtan Uvamnun nanġairuanun inausaqługu isuitchuamun. Munaġiniaġiga taimuŋaaglaan.

⁴ Savautiniaġuvsiñŋa pitqiksiġautaitchuakun suli iḷumutuuġlusi, aapavsi David piḷġusiatun, suli kamagiguvsigik pitquratka suli kamaksriḷusi piraksriqsuutipayauramnik,

⁵ taŋŋiġñiaġiga unniqsuqłiisiga aapagnun David-mun uqautikapku Israel-guruat atanniqsimariqaġuuniaġnivḷugich kiŋuniiġiraŋiñik.

⁶ Aglaan ilvich naagga kiŋuniiġiravsi maliġuaġuŋaiqpanŋa, kamagillaiġḷugich pitquratka piraksriqsuutitkalu ilivsiññun, suli aŋaiyyuraġaliġḷusi allanun god-inun,

⁷ tavra iñugiratka Israel-guruat nunamiinŋaiqsinniaġitka aitchuutigiŋagaluaqtamniñ iliŋiññun. Suksraaġniaġiga una Aŋaiyyuvikpak nalunaiqsaġigaluaqtaġa nanġaiviutquvlugu uvamnun. Iñuich sumiḷḷiqaa kipagiugaliġñiaġaich Israel-guruat suli suuŋiḷaġiliutilugich.

⁸ Una Aŋaiyyuvikpak suksraunġiqsauniaqtuq qaliġiiksitaqtauluni, nalautchaaġutipayaaqtuat tupagniaqtut suli qaallaŋalutiŋ. ‘Summan Atanġum tainnaqtitpauŋ manna nuna unalu Aŋaiyyuvikpak?’ apiqsriñiaqtut.

⁹ Iñuich aasii kiuniaġaich, ‘Tainnaŋaruq iliŋisa uniñŋavlugu Ataniq God-iktiŋ, maŋŋuuŋisa Egypt-miŋŋaurrigiŋaraŋat. Saałłutiŋ allanun god-inun suli aŋaiyyuvigivlugich. Tainnamik tavra Atanġum pimaqłuun tikisinŋagaa iliŋiññun.’”

Solomon-gum Sivunniuqatigigaa Hiram

¹⁰ Solomon-gum iñuiññani (20) ukiuni nappaŋagaa Aŋaiyyuvikpak igluqpaniḷu.

¹¹ Umialgum Hiram Tyre-mi iluqaiññik cedar-nik qiruqaqtinŋagaa suli pine-nik kaviqsuaniglu manigñik pigiruksraġiraŋiñik nappaimman. Naalġataġman, Umialik Solomon-gum aitchuŋagaa Hiram iñuiññanik (20) nunaaqqiñik nunaŋani Galilee-m.

¹² Hiram-gum tautugiaŋagaich, suli nakuaġiŋiññiġaich.

¹³ Tavra uqallaŋaruq Solomon-mun, “Qanuqittuanik uvva nunaaqqiñik aitchuqpiŋa, aniqaan?” Taamna pisigivlugu tamanna nuna taggisiqaŋaruq Cabul-mik.

¹⁴ Hiram-gum tuyuŋagaa Solomon 9,000 pounds-tun kaviqsuamik manigmik.

Allat Savaaġiŋaraŋich Solomon-gum

¹⁵ Umialik Solomon savaktiqaqłuni taluqsralliaġivlugich nappaŋagaa Aŋaiyyuvikpak igluqpaglu, kivviipkaqługulu nuna kivaliñaaŋani iniqpaum, suli katchiqpaliuqtiłługu iniqpak. Nappatqiksinŋammigaich iniqpaŋich Hazor-m, Megiddo-m, suli Gezer-m.

¹⁶ (Umialiŋata Egypt pigruġvigivlugu Gezer pisaġiŋaraŋa, tuquġaqługich iñuŋich suli ikipkaqługu iniqpak. Aasii aitchuutigimmivḷugu panigmiñun katinman Solomon-mik,

¹⁷ aasii Solomon-gum nappatqiksinŋagaa.) Savaktiqaqłuni taluqsralliaġirauruanik, Solomon-gum nappatqiksinŋamammigaa Alliani Beth Horon,

¹⁸ Baalath-lu, Tamar-lu nunagluktuaŋani Judah-m,

¹⁹ iniqpagni suġautaŋich inŋarut, iniqpagniiłłutiŋ tuttuqpaŋich aksraktuuraŋiḷḷu, suli supayaat nappaġuktaŋich Jerusalem-mi, Lebanon-mi suli sumipayaaq atanniqsimaramiñi.

^20-21 Taluqsralliaġirauruanik savaktiqaŋaruq Solomon kiŋuniiŋiñik Canaan-miut Israel-miut tuqutchumiñaiñŋaraŋiññik nunaŋat nunannaktaaġigamirruŋ. Iḷagivlugich Amor-miut, Hit-miut, Periz-miut, Hiv-miut, suli Jebus-miut, kiŋuniiŋich paŋmamunaglaan akiiḷaaqługich kivgaġigaich.

²² Solomon Israel-guruanik kivgaqaŋaitchuq akiiḷaaqługich; ilaata aŋuyaktiviglugich, atanauraġivlugich, aullarrigivlugich, aksraktuuranun qaukłiġivlugich, aŋuyaktillu tuttuqpagaġuuruat.

²³ 550-tun iñugiaktigiruanik qaukłiqaŋamarut savaktitchiruanik taluqsralliaġivlugich savaktiuruanik Solomon sunik nappaipkairaġimman.

²⁴ Solomon-gum nuutinŋagaa nuliani, Pharaoh-m paniŋa, David Iniqpaŋaniñ igluqpaliamiñun ilaanun. Tavraasii kivviipkaŋagaa nuna kivaliñaaŋani Jerusalem.

²⁵ Piŋasuiqsuaqłuni ukiumi Solomon aitchuutiqaġuuŋaruq ikipkautitigun suli iḷammiuġutikun aitchuutinik ikipkaiviḷiamiñi Ataniġmun. Ikipkaivḷuniḷu tivraġiksautinik Ataniġmun. Tavra naatchiŋamaruq Aŋaiyyuviḷiamiñik.

²⁶ Umialik Solomon umiaqpiusugruŋammiuq Eziongeber-mi, qaniŋaniittuaq Elath-gum siñaani Iḷuliaŋata Aqaba-m, nunaŋani Edom.

²⁷ Umialik Hiram tilisiŋaruq umiaqpagalguruanik savaqatigitquvlugich Solomon-gum iñuŋich.

²⁸ Tiŋilġaiŋarut nunaŋanun Ophir-m aasii aatchivḷutiŋ Solomon-mun uqumaisigiruanik akimiaq atausiq (16) tons-tunkavsak kaviqsuanik manigñik.