1 Kings 7 - Iñupiatun Mumiksat Uqalugiksuat

Solomon-gum Igluqpaŋa

¹ Solomon igluqpaliuŋammiñiqsuq ilimiñun, aasii nappaqługu qulit piŋasuni (13) ukiuni.

^2-3 Igluqpaŋa Forest Lebanon-gum tallimakipiaq malġukipiaq qulit (150) isigagniqtun taktigiŋaruq, piŋasukipiaq akimiat (75) isigagniqtun iraqtutigivluni, suli malġukipiaq tallimat (45) isigagniqtun qutchiksigivluni. Sisamanik tunulliġiiñik ayaqaqłuni cedar-nik, akimiagullaavlugich (15), cedar-t nayummatit tunŋavlutiŋ tamatkunuŋa. Qiḷaŋa savaaguŋaruq cedar-t qiruŋiñik, ayaaqsaaŋavlutiŋ qulaatigun tutquqsiviich, tunŋaruat ayagnun.

⁴ Piŋayuigullaaruanik tunulliġiiksuanik igalauraqaġniqsuq akiḷḷiġiiksuanik.

⁵ Upkuat avaluqaŋarut kaŋiġallulignik takiłhuaŋaaqtuanik, aasii akiani paaqsaaġiiŋavłutik.

⁶ Inauraqpak Ayagutaupkaŋaruq taktigiŋaruq piŋasukipiaq akimiat (75) isigagniqtun suli malġukipiaq tallimat (45) isigagniqtun iraqtutigivluni. Qanitchaqaqłuni qiḷaligaamik, nayummatigivlugich ayaŋich.

⁷ Umialgum Aquppiutaqpaŋata Inaa, taggisiqaġmiruaq Isivġiiviksram Inaa, Solomon sivunniimman sivunniiraksramiñik, katchiqaqtuq cedar-nik qirugnik natqaniñ qiḷaŋanuaglaan.

⁸ Solomon ilaata irviŋich, allami siḷalliuruami tunuani Isivġiiviksram Inaa, tainnaptauq savaaguŋammiut allatun iglutun. Nappaiŋamammiuq tainnasimik nuliamiñun, panigiraanun umialgata Egypt.

⁹ Iluqaġmiŋ tamatkua iglut suli aŋiruaq siḷalliq savaaguŋarut uyaġagiksuanik maŋŋuŋiñiñ qiḷaŋiñuaglaan. Uyaġaich itqanaiyaaguvlutiŋ nivagvigmi uyaġagnun suli avguqtuaŋavlutiŋ uuktuqługich, iḷulliiksrallu siḷataaniittuksrallu uluaqtuutinik savakługich.

¹⁰ Maŋŋuliaŋich uyaġagpaich savaŋagaich nivagvigmi uyaġagnun, iḷaŋich qulit malġuk (12) isigagniqtun taktigivlutiŋ suli iḷaŋich akimiaq (15) isigagniqtun taktigivlutiŋ.

¹¹ Qaaŋanni tamatkua uyaġagiksuat inŋammiut, uuktuqługich aviktuaqtat, suli cedar-t qiruŋiñik nayummatit.

¹² Igluqpaum siḷataani, iḷulliŋalu Aŋaiyyuvikpaum, suli paaŋa isiġiaŋata Aŋaiyyuvikpaum katchiqaŋarut tapiqtaagiḷaanik cedar-t qiruŋiñik nayummatiqaqługich piŋasuullaaruanun qalliġiich avguat uyaġaich.

Huram-gum Savaaksraŋa

¹³ Umialguruam Solomon-gum qanniŋagaa iñuk atiqaqtuaq Huram-mik, suliuqti iñuuruaq iniqpaŋani Tyre-m. Patukpagmik suliuyuruaq.

¹⁴ Aapaŋa, tuquŋaruaq, Tyre-miuguŋamaruq, savayuruaq patukpagnik; aakaŋa aasii iḷaqaqłuni maŋŋuqaqtuaniñ Naphtali-mik. Huram taamna isumaturuaguŋaruq suli sulisuqłuni. Umialgum Solomon aiyugaaġmani qaukłiutquvlugu patukpagnik savaktinun akuqtuŋagaa.

Malġuk Patukpagmik Savaak Ayagutak

¹⁵ Huram malġuugnik patukpagnik ayaliuŋaruq, iñuiññaq tallimat malġuk (27) isigagniqtun qutchiksigillaavlugik suli akimiaq piŋasut (18) isigagniqtun aqvaluġniŋa, aasii inillakługik paaŋanun Aŋaiyyuvikpaum.

¹⁶ Malġugnik savaŋaruq patukpagnik nuvuqutaksragnik, tallimat malġuk avvaġmik iḷavlugu (7½) isigagniqtun qutchiksigivlugik, iḷiraksragnik qaaŋigñun ayyak.

¹⁷ Qaallaaŋik ayyak qiñiyunaqusiqsuŋagaik qiññaliqł̣ugich nuviuqsrautiŋaruatun qivḷitun,

¹⁸ suli malġugnik saniġaqłiġiiksuanik akiḷḷiġiikł̣ugik patukpagmik siiġñatun pomegranate-liuqłutiŋ.

¹⁹ Nuvuqutaliaguruak lilies-tun qiññaliqł̣ugich savaŋagaik, itchaksrat isigagniqtun taktigivlutiŋ,

²⁰ aasii inillaŋagaik aqvaluqtuamun qulaaniittuamun qivḷiqtun ittualiaŋata. 200-tun iñugiaktigiruat pomegranate-gich inŋarut malġuiguvlutiŋ avałługik nuvuqutaliat.

²¹ Huram-gum inillaŋagaik taapkuak malġuuruak patukpagmik savaak ayyak sivuġaanun paaŋata Aŋaiyyuvikpaum: kiluliñaaŋani tuŋaaniittuaq atchiŋagaat Jachin-mik aasii salliñaaŋani tuŋaaniittuaq atchiqł̣ugu Boaz-mik.

²² Nautchiatun lily-tun iłługik patukpagmik nuvuqutaliak iḷiŋagaik qaaŋagnun naparuak ayyak. Tavraasii savaaŋik naparuak ayyak naanŋagaik.

Imiqaġvikpaliaq Patukpagmiŋ

²³ Huram imiqaġviliuŋaruq aqvaluqsivḷugu patukpagmik, tallimat malġuk avvaġmik iḷavlugu (7½) isigagniqtun puqtutigivlugu, akimiaq (15) isigagniqtun qitqata taktilaaŋa, suli malġukipiaq tallimatun (45) isigagniqtun aqvaluġniŋa iłłuni.

²⁴ Avaluata iluqaan siḷataagun siñaata imiqaġvikpaum malġuiñik saniġaqłiġiiksuanik patukpagmik savaanik gourd-nik nautchialiŋagaat, itchaksranik gourds-qallaavluni isigagniqtun, savaŋagaat iḷḷativlugu imiqaġviliamignun ilaanun.

²⁵ Imiqaġvikpak inillaŋagaat tunuannun qulit malġuuruat (12) patukpagmik savaat qimuktit aŋusalluŋich, siḷanmun sanmiruat, piŋasuullaavlutiŋ sanmiruat suŋnamulliqaa.

²⁶ Saniġaŋich imiqaġvikpaum maptutigillaaŋarut piŋasunik titiġniñik. Tamanna qaqłua qaqłuatun inŋaruq qallutim, siḷanmun iłłuni nautchiam lily-m irrusiatun. Imiqaġvikpak imaqtutiqallavluni 10,000 gallons-tun.

Patukpagmik Savaat Iḷḷiviich Aksraktuuraligaat

²⁷ Huram quliñik patukpagmiñ iḷḷivigñik aksraktuuraliuŋamammiuq; itchaksrat isigagniqtun taktigivlaavlutik, itchaksrat isigagniqtun iraqtutigillaavlutik, suli sisamat avvaġmik iḷavlugu (4½) isigagniqtun qutchiksigivlutiŋ.

²⁸ Savaaguŋarut kaŋiġalluaġiksuanik katchiḷianik; aasii avaluliqsuŋavlutiŋ

²⁹ lion-tun ittuanik, immulivium aŋusalluŋisun, suli cherubim piḷiaguruat qiruanun; suli avaluŋiñun, qulaaniḷu ataañiḷu lion-gillu immulivium aŋusalluŋillu, qipiŋaaŋaruat savaat iłłutiŋ.

³⁰ Iḷḷivillaa aksraktuuraligaaq sisamanik patukpagmik savaanik aksraligautiqaŋarut patukpagmik attaviŋattauq savaaguvluni. Iqirġallaaŋiñi patukpagmik savaat iqaqqivium tunŋaviksraŋich; tamatkua tunŋaviich qiñiyunaqusiqsuŋagaich qipiŋaaqsivlugich.

³¹ Qaaŋani kiavyaaŋaruamik iqaqqivium avaluqaqłuni. Qunmun aniŋavluni akimiaq piŋasunik (18) titiġniñik qaaŋaniñ iḷḷivium suli tallimat malġugnik titiġniñik tavraŋŋa anmun. Sanaŋaruanik piqaŋaruq kiavaaġnivḷugu.

³² Aksraligautiŋich iñuiññaq tallimanik (25) titiġniñik qutchiksigiŋarut; ataaniiłłutiŋ qiruich, aasii aksraligautit tunŋaviŋich atavlutiŋ ilaanun iḷḷivigñun.

³³ Aksraligautit piḷiaguŋarut aksraktuurat aksraligautiŋisitun; ataviŋich aksraligautit, siñiġutiŋich, spoke-ŋich, suli qitiŋiḷḷu iluqaġmiŋ savaaguŋarut patukpagmik.

³⁴ Sisamanik tunŋaviqallaavlutiŋ ataani iqirġaŋisa iḷḷiviḷḷaam aksraktuuraligaam, savaaguŋaruaq iḷḷativlugu iḷḷivium aksraktuuraligaamun.

³⁵ Quliŋŋuġutaiḷanik titiġniñik qipiġutiqaŋarut qaallaaŋani iḷḷiviich aksraktuuraligaat; tunŋaviŋich suli qiruich atavlutiŋ tavruŋa iḷḷivium aksraktuuraligaamun.

³⁶ Tunŋaviḷiat qiruiḷḷu titiqtuŋagaich cherubim-nik, lion-nik, suli palm napaaqtunik, suqpatigun iḷḷiviksraqaġaġimmata, qipiŋaaqsivḷugiḷḷu kiavallakługu suliuqłutiŋ.

³⁷ Tavra, tainna, iḷḷiviich aksraktuuraligaat savaaguŋarut; iluqaġmiŋ ativlugich, aktilaaŋallu irrusiallu.

³⁸ Huram qulinik iqaqqiviḷiuŋammiñiqsuq, inillaaksranik iḷḷivigñun. Iqaqqiviḷḷaa itchaksrat isigagniqtun qitqagun taktigiŋamaruq suli 200 gallons-nik imaqallavluni.

³⁹ Inillaŋagaich tallimat iḷḷiviich aksraktuuraligaat talliqpium tuŋaanun isiġiaqvium Aŋaiyyuvikpaum, aasii allat tallimat inillakługich saumium tuŋaanun; imiqaġvikpak aasii iḷivḷugu taliqpianun Aŋaiyyuvikpaum, kaŋiġallugmun siqiñġum nuivikaaŋanun.

Agliusimaruat Aŋaiyyuvikpaum Suġautaŋich

^40-45 Huram utkusiḷiuŋamammiuq, piksrutiniglu, suli iḷuturuanik puggutauranik. Naatchiŋaruq iluqaanik savaamiñik Umialigmun Solomon-mun Atanġum Aŋaiyyuvianiittuksranik. Uvva ukua savaaŋich: Malġuk ayyak Malġuk iḷuturuatun puggutauratun ittuak nuvuqutaliak qaaŋagnun ayyak Nuviqsrautiŋaruatun qiññaligaat qivḷich nuvuqutallaami 400-tun iñugiaktigiruanik patukpaich pomegranates-nik, saniġaqłigiik malġuiguvlutiŋ tallimakipiagullaavlutiŋ avataani nuvuqutam Qulit iḷḷiviich aksraktuuraligaat Qulit iqaqqiviich Imiqaġvikpak Qulit malġuk (12) qimuktit aŋusalluŋich nayummatauvlutiŋ imiqaġvikpagmun Utkusiich, piksrutit, suli iḷuturuat puggutaurat Iluqaġmiŋ taapkua suġautaksraŋich Aŋaiyyuvikpaum, Huram savaaŋich Umialigmun Solomon-mun, savaaguŋarut qivliqsaqtamik patukpagmik.

⁴⁶ Umialgum iluqaisa savaaġipkaŋagaich auktitaqługich patukpagmik arriliuġutinuñ qikuyagmiñ piḷianiñ savagvigmi akunġagni Sukkoth-lu Zarethan-guvlu, Jordan natiġnaŋani.

⁴⁷ Solomon-gum tamatkua patukpagmik savaat uqumaisilaaqtinŋaiññiġaich iñugiakpaił̣ł̣utiŋ, tavraasii qanutun uqumaisilaaŋat iḷitchuġiŋaitkaat.

⁴⁸ Solomon savaktitchiŋamammiuq kaviqsuamik manigmik suġautaksraŋiñik Aŋaiyyuvikpaum: ikipkaivik, niġġivik punniġum aitchuutauruam God-mun iniksraŋa,

⁴⁹ qulit naniqaġviich sivuġaaniittuksrat Salumaniqtauruam Inim, tallimauvlugich kiluliñaam tuŋaani suli tallimat salliñaam tuŋaani; nautchiat, nannich suli tiggutit;

⁵⁰ qallutit, nannimun qamittautit, iḷuturuat puggutaurat, puggutaurat iniksraŋich tivraġiksautit, puggutallu tigumiaġutiksrat aumaruanun aluanun; suli qiiqiġiaksraŋich upkuaŋisa Salumaniqtauruam Inim suli siḷalliani upkuaŋisa Aŋaiyyuvikpaum. Iluqaġmiŋ taapkua savaaguŋarut kaviqsuamik manigmik.

⁵¹ Umialik Solomon naatchiḷġataqami Aŋaiyyuvikpagmik, inillaŋagaich Aŋaiyyuvikpaum tutquqsivianun iluqaisa aapami David ilaaguaqługich qaisaġiŋaraŋich Ataniġmun, qatiqtuaq manik, kaviqsuaq manik, suli allat savaat.