1 Kings 6 - Iñupiatun Mumiksat Uqalugiksuat

Solomon-gum Nappaġaa Aŋaiyyuvikpak

¹ 480-tun iñugiaktigiruat ukiut qaaŋianiŋmata Israel iñuŋich aullaqqaaqtillugich Egypt-miñ, Solomon sisamani ukiuni umialiuganiŋman Israel-miunun, tuglianni tatqich, tatqiŋani Ziv, Solomon-gum isagutisaġataŋagaa Aŋaiyyuvikpak.

² Iḷua taktigiŋaruq sisamakipiaq qulit (90) isigagniqtun, aasii iñuiññaq qulit (30) isigagniqtun iraqtutigivluni, suli malġukipiaq tallimat (45) isigagniqtun qutchiksigivluni.

³ Isiġiami ini akimiaq (15) isigagniqtun taktigivluni aasii iñuiññaq qulit (30) isigagniqtun iraqtutigivluni, iraqtutilaaŋatun Aŋaiyyuvikpaktun.

⁴ Katchiŋich Aŋaiyyuvikpaum aŋmaruaqallaavlutiŋ, amił̣haaqłutiŋ siḷataani iḷuaniittuaniñ.

⁵ Siḷataata katchiŋisa, saniġallaaŋiñi suli tunuani Aŋaiyyuvikpaum, piŋasunik qiḷagualik iḷaaġutauŋaruq, inillaaŋich tallimat malġuk avvaġmik iḷavlugu (7½) isigagniqtun qutchiksigillaavlutiŋ.

⁶ Inaurallaat alliqpiami tallimat malġuk avvaġmik iḷavlugu (7½) isigagniqtun iraqtutigimaruq, qitiqłiġmi qiḷaguami quliŋŋuġutaiḷaq isigagniqtun iraqtutigivluni, aasii qulliqpiaq qiḷaguaq qulit avvaġmik iḷavlugu (10½) isigagniqtun iraqtutigiŋaruq. Aŋaiyyuvikpaum katchiŋa qiḷaguallaami maptukił̣haaŋaruq alliuruamiñ, inillaat tunŋayumiñaqsivḷugich katchimun nayummatiliġaluaġnagich.

⁷ Uyaġaich atuŋaraŋich Aŋaiyyuvikpaliuqamiŋ savaaguŋarut nivagvigmi uyaġagnun, tavraasii kautaqvaaluqaŋaiñŋaruq anauttanik naakkaunnii savił̣hanik savalġutinik Aŋaiyyuvikpaliuġmata.

⁸ Paaŋa allium iḷaaġutim kiluliñaaŋani saniġaaniittuq Aŋaiyyuvikpaum, mayuġautaqaqłuni qiḷaguamun suli qalliġmun.

⁹ Tavra Solomon-gum nappaaniŋagaa Aŋaiyyuvikpak. Qiḷaliŋagaa ayagutchiqsuqługu suli qirugnik cedar-nik.

¹⁰ Piŋasunik iniligaaq qulliġiiñik iḷaaġutauruaq, inillaaŋi tallimat malġuk avvaġmik iḷavlugu (7½) isigagniqtun qutchiksigillaavlutiŋ, atavluni cedar-t qiruŋiñik Aŋaiyyuvikpagmun.

¹¹ Ataniq uqallaktuq Solomon-mun,

¹² “Kamakkutiqaġuvich pitqurapayaamnun suli piraksriutipayaamnun, taŋŋiġñiaġiga iliŋnun unniqsuqłiisiga aapagnun David-mun.

¹³ Itqatauniaqtuŋa iñugiramnun Israel-gum kiŋuvaaŋiññun uumani Aŋaiyyuvikpagmi nappaqtaġni, suli suksraaġataġumiñaitkitka.”

¹⁴ Tavraasii Solomon-gum naanŋagaa nappaqtani Aŋaiyyuvikpak.

Suġautchiqsuutiŋich Iḷuanun Aŋaiyyuvikpaum

¹⁵ Iḷuani katchich qaaqaŋarut cedar-nik qirugnik natqaniñ qiḷaŋanuaglaan, aasii natiq savaaguvluni pine-nik qirugnik.

¹⁶ Iḷulliq ini, tairaŋat Salumaniqtauruaq, inillaŋagaat kiŋuvanun Aŋaiyyuvikpaum. Taktigiŋaruq iñuiññaq qulit (30) isigagniqtun aasii piḷiaguruat cedar-t qiruŋiñik natqaniñ-aglaan qiḷaŋanun.

¹⁷ Sivuġaani Salumaniqsrauruam ini inŋaruq piŋasukipiat (60) isigagniqtun taktilaaqaqtuaq.

¹⁸ Cedar-mik katchiḷiat qiñiyunaqusiqsuŋagaich sanavlugich naurianik allagiiñik. Iluqani iḷua katchiqaŋaruq cedar-nik, qiñiġnaiqsaqługich uyaġaŋich katchim.

¹⁹ Atanġum Sivunniuġutikun Kiguunniŋa iliŋagaat Salumaniqtauruamun inimun.

²⁰ Taamna iḷulliq ini iñuiññaq qulit (30) isigagniqtun taktigiŋaruq, iñuiññaq qulit (30) isigagniqtun iraqtutigivluni, suli iñuiññaq qulit (30) isigagniqtun qutchiksigivluni, iluqani qaaliŋavluni kaviqsuamik manigiksuamik. Ikipkaivik cedar-mik piḷiaguŋaruaq qaaliŋammiġaaptauq kaviqsuamik manigiksuamik.

²¹ Iḷua Aŋaiyyuvikpaum qaaliŋagaat manigmik kaviqsuamik, suli manigmik kaviqsuamik savaat qivḷiġich inillaŋagaich ikaaqsaaqługich paaŋanun iḷullium inauruam, qaaqaġmiruaptauq manigmik kaviqsuamik.

²² Iluqaqpiuraġmi iḷua Aŋaiyyuvikpaum matuŋaruq kaviqsuamik manigmik, tainnaptauq savaaguvluni ikipkaivik qaniŋani Salumaniqsrauruami Inimi.

²³ Malġuk cherubim savaaguŋaruk olive qiruanik aasii inillakługik Salumaniqsrauruamun, iluqatik akimiaq (15) isigagniqtun qutchiksigillaavlutik.

^24-25 Iluqatik aktilaaŋak atiniqsuk suli qiññaŋik ativlutik. Malġugnik isaġuqallaavlutik, isaġuŋik tallimat malġuk avvaġmik iḷavlugu (7½) isigagniqtun taktigivlutik, tavraasii isaġum isuaniñ igḷuanun suli akimiaq (15) isigagniqtun taktigivlutiŋ.

²⁶ Takitigivlutiŋ akimiaq (15) isigagniqtun.

²⁷ Saniġaqłiġiiksiłługik cherubim Salumaniqsrauruamun iḷiŋagaik, isaġuŋik isivinŋaruak kasuutiyumiñaqsivḷugik qitqani inim, aasii igḷuŋik isaġuŋiksa aksiumallaalugu katchimun.

²⁸ Taapkuak cherubim qaaqaqtuk kaviqsuamik manigmik.

²⁹ Katchiŋich inim suli iḷullium inim qiñiyunaqsaŋagaich sanaranik cherubim-nik, palm napaaqtunik, suli naurianik.

³⁰ Natiuraġniaq-unnii matuqaŋaruq kaviqsuamik manigmik.

³¹ Olive qiruanik saniġaqłiġiigñik upkualiaq inillaŋagaat paaŋanun Salumaniqsrauruam; qulaa paam nuvuġayyuaġikł̣ugu savaŋagaat.

³² Upkuat qiñiyunaqusiqsuŋagaich sanavlugich cherubim-nik, palm napaaqtunik, suli naurianik. Upkuallu, cherubim-lu, suli palm napaaqtuŋich qaaliŋagaich kaviqsuamik manigmik.

³³ Tavraptauq tainna, paaŋa aŋaiyyuvikpaum avaluliuŋagaa olive-gum qiruanik, sisamanik saniġaligaanik.

³⁴ Malġugnik imuraġaaqtuagnik upkualiŋagaat pine qiruanik

³⁵ suli qiñiyunaqusiqsuqługich sanaranik cherubim-nik, palm napaaqtuŋiñik, suli naurianik, atisivḷugu maptutilaaŋa qaaliŋagaich kaviqsuamik manigmik.

³⁶ Iḷulliq siḷalliuruaq nappaŋammigaat sivuġaanun Aŋaiyyuvikpaum, katchiḷiqługu atautchiiñik cedar-nik ayaliuqługu piŋasuullaaruanun qaliġiiñun uyaġagiksuanun.

³⁷ Maŋŋuŋich Aŋaiyyuvikpaum inillaŋagaich tuglianni tatqich, tatqiani Ziv, sisamaŋanni ukiut Solomon umialiguqqaaqtillugu.

³⁸ Tallimat piŋayuanni tatqich, tatqiani Bul, qulit atausimik (11th) ukiuni Solomon umialiguġman qaŋa, Aŋaiyyuvikpak naanŋagaat sivunniuġusimiktitun. Solomon-gum nappaŋagaa tallimat malġugni (7) ukiuni.