1 Kings 5 - Iñupiatun Mumiksat Uqalugiksuat

Solomon Itqanaiyaqtuq Nappaisaġukłuni Aŋaiyyuvikpagmik

¹ Tyre-ġmiut Umialgat Hiram qaŋapak avilaitqatausuuŋaruq David-mun, aasii tusaakami Solomon umialiguŋatilaaŋanik aquagun aapami David, tilisiŋaruq pirigiramiñik ilaanun.

² Solomon-gum tuyuġaa kiliktuunmik Hiram:

³ “Iḷisimarutin aŋuyakkaluamiiġuuvlutiŋ aapaga David aŋuyaktuksrausuuŋaruq akiḷḷiġivlugich avalliiguruaniñ nunauruaniñ, nappaiyumiñaiñŋaruq aŋaiyyuvigmik nanġaiviksramik Ataniġmun God-imiñun akimapkaġataqtillutiŋ Ataniġmun akiḷḷipayaaŋiññiñ.

⁴ Aglaan uvva Atanġum God-igma aŋuyautairrutiqaqtitkaaŋa avalliipayaamniñ. Akiḷḷiitchuŋauvva, suli anayanniuŋitchugut pigruġviginiaġnasugiluta.

⁵ Atanġum unniqsuqłiiŋagaa aapaga David, ‘Iġñiqpich, umialiguqtinniaqtaġma aqukkun, nappaġniaġaa aŋaiyyuvikpak uvamnun.’ Aasiuvva sivunniŋaruŋa nappaqsaġukługu aŋaiyyuvikpak nanġaiviksraq Ataniġmun God-imnun.

⁶ Tainnamik tiliyumagitin iñuktin Lebanon-mun kivluiyyaqulugich cedar-t napaaqtuŋiñik uvamnun. Iñugiraġma savaqatiginiaġaich, suli akiḷiññiaġitka iñuktin qanuq sivunniġuvich. Iḷisimalluataqtutin, iñutka iḷisimmaaġiitchut kivluiñiġmik napaaqtunik ilvich iñugiraġniñ.”

⁷ Hiram iviġapiallaŋaruq akuqtuqamiuŋ Solomon kiliktuutaa, aasii uqallakłuni, “Nanġaġli Ataniq uvlupak qaitchiŋaruaq David-mun isumaturuamik iġñiġmik umialiksramik kamanaqtuamun nunaqpauruamun!”

⁸ Tavraasii Hiram tuyuqtuq Solomon-mun uumiŋa: “Akuqtuġiga tuyuutin, suli itqanaitchuŋa savagukługu apiqsriaġiran. Piqaqtinniaġikpiñ cedar-nik suli pine napaaqtunik.

⁹ Iñugma agraŋagaich kipiŋaruat napaaqtut Lebanon-miñ taġiumun aasii qiḷiqsruutillaalugich immakuallasiḷugich siñaagun suqpanun pitqugupkich. Tavraniasii iñugma qiḷiiyaġlugich, iñukpich savaaġigisigaich. Piraksralliasii, niqiksraqaqtitqugitka igluqatiitka.”

¹⁰ Tavra Hiram-gum piqaqtinŋagaa Solomon cedar-nik suli pine napaaqtuŋiñik pigisuktaŋiñik,

¹¹ aasiiḷi Solomon-gum aitchuŋagaa Hiram 100,000-tun iñugiaktigiruanik bushel-nik palauvaksranik suli 110,000 gallon-nik pigiksuanik olive uqsruanik ukiutuaġaġimman niqiksraŋiñik iñuŋisa.

¹² Atanġum taŋŋiqł̣ugu unniqsuqłiisiñi aitchuŋagaa Solomon isumattunmik. Aŋuyautairrun inŋaniqsuq akunġagni Hiram-guvlu Solomon-guvlu, suli sivunniuqatigiiŋaruk avanmun.

¹³ Umialik Solomon iñuksraŋaruq 30,000-tun iñugiaktigiruanik taluqsralliaġivlugich savaktiksranik iluqaaniñ Israel-miuniñ,

¹⁴ aasii Adoniram qaukłiḷiutivlugu taapkunuŋa. Inillaŋagaich piŋayuigułługich 10,000-gullaavlugich aŋutit, aasii 10,000-gullaaruat atausimi tatqimi Lebanon-miitiłługich suli malġugni tatqigñi iliŋisa aimaaġviŋanni.

¹⁵ Solomon 80,000-tun iñugiaktigiruanik uyaġagnik navguiriqaŋaruq qimiġaligaami nunami, 70,000-tun iñugiaktigiruat iñuich agraqtausaqługich uyaġagnik,

¹⁶ aasii inillaivḷuni 3,300-tun iñugiaktigiruanik aullarriliḷḷaavlugich savaktuat.

¹⁷ Umialik Solomon piraksriimman avguiŋarut kaŋiġalluaġiksuanik aŋiruanik uyaġagiksuanik maŋŋuksraŋiñik Aŋaiyyuvikpaum.

¹⁸ Solomon-guvlu Hiram-guvlu savaktiŋisa suli iñuich iniqpaŋaniñ Byblos itqanaiyaiŋarut uyaġagnik qirugniglu nappaqsaqługu Aŋaiyyuvikpak.