1 Kings 4 - Iñupiatun Mumiksat Uqalugiksuat

Solomon-gum Atanauraŋich

¹ Solomon umialiguŋaruq Israel-mun.

² Aasii ukuniŋa atanauraqaqłuni: Aŋaiyyuliqsiqpak: Azariah iġñiŋa Zadok-gum

³ Aglaktiŋik: Elihoreph-lu Ahijah-lu, iġñiŋik Shisha-m Agliusimaruanik qaunaqsri: Jehoshaphat iġñiŋa Ahilud-gum

⁴ Qaukłiŋat aŋuyaktit: Benaiah iġñiŋa Jehoiada-m Aŋaiyyuliqsiqpaak: Zadok-lu Abiathar-lu

⁵ Qaukłiŋat ataniġnaqutiqaqtuat irvianni: Azariah iġñiŋa Nathan-gum Umialignun siḷġiqsuiri: aŋaiyyuliqsiqpak Zabud iġñiŋa Nathan-gum

⁶ Qaukłiŋat igluqpagmi kivgauruat: Ahishar Qaukliŋat taluqsralliaġivlugich savaktit: Adoniram iġñiŋa Abda-m

⁷ Solomon inillaiŋaruq qulit malġugnik (12) iñugnik inillaaŋiñi Israel kavanausaqługich. Niqiqaqtitchiyumaaqtuksrat inauviḷḷaamigniñ umialigmun igluqatiŋiḷu, iñullaa savaaqaqsaqłuni atausimi tatqimi ukiumi.

⁸ Ukua uvva atiŋich taapkua qulit malġuuruat (12) qaukłiich suli qimiġani inauviḷḷaaŋich: Benhur—qimiġaŋiñi Ephraim

⁹ Bendeker—iniqpaŋiñi Makaz, Shaalbim, Beth Shemesh, Elon, suli Beth Hanan

¹⁰ Benhesed—iniqpaŋiñi Arubboth suli Socoh suli iluqaan nunaŋa Hepher-m

¹¹ Benabinadab tuvaaqatiqaqtuaq Solomon panianik Taphath-mik—iluqaan nunaŋa Dor-m

¹² Baana iġñiŋa Ahilud-gum—iniqpaŋich Taanach, Megiddo, suli iluqaan nunaŋa qaniŋaniittuaq Beth Shan-gum, qaniŋani nunaaqqiŋata Zarethan, kiluliñaaŋani nunaaqqiŋata Jezreel, tikiḷġataqługu Abel Meholah-gum suli avanitchiani iniqpaŋata Jokmeam;

¹³ Bengeber—nunaqpaŋani Ramoth Gilead suli nunaaqqiŋich Gilead-miittuat qitunġaŋich Jair-m, kiŋuniiġiraŋich Manasseh-m, suli nunaŋa Argob Bashan-mi, piŋasukipiaguruat (60) nunaaqqiqpaich katiłłutik, payaŋaiyaqtat katchiñik suli patukpagnik ayaqaqhutik upkuaqpaŋich

¹⁴ Ahinadab iġñiŋa Iddo-m—nunaŋani Mahanaim

¹⁵ Ahimaaz tuvaaqasiŋaruaq Basemath-mik iḷaŋannik Solomon paniutiŋisa—nunaŋani Naphtali-m

¹⁶ Baana iġñiŋa Hushai-m—nunaŋani Asher-m suli nunaaqqiŋani Bealoth-gum

¹⁷ Jehoshaphat iġñiŋa Paruah-m—nunaŋani Issachar-m

¹⁸ Shimei iġñiŋa Ela-m—nunaŋani Benjamin

¹⁹ Geber iġñiŋa Uri-m—nunaŋani Gilead, atanniqsimaŋaraani Umialigum Sihon-gum Amor-miuguruam suli Umialigum Og-gum Bashan-mi. Atausiqsuli kavanaq ataniġnaqutiqaŋaruq irvianni.

Solomon Piḷḷuatautiqaqłuni Umialgumman

²⁰ Iñuŋich Judah-vlu Israel-guvlu iñugiaktigiŋarut qaviatun taġium siñaaniittuatun; niġiugaqtuaguŋaniqsut, imiqhutiŋ, suli quviasukhutiŋ.

²¹ Solomon atanniqsuŋagaich iluqaisa nunaqpauruat Euphrates River-miñ aglaan Philistia-mun suli Egypt killiŋanun. Akiḷiisuuŋarut akiḷiigaksranik ilaanun suli savautivlugu iñuuniqtutilaaŋatun.

²² Suġautat Solomon pigiraksraġiraŋich uvlumi innatun inŋarut tallimakipiaq malġukipiaq qulitun (150) bushel-gich palauvagiksaat suli 300-tun bushel-nik palauvaksranik;

²³ qulinik pamiqsaanik immuliviich, iñuiññanik (20) pamatanik immuliviich, suli tallimakipianik (100) imnaiñik, ilagivḷugich gazelle-gich, roebuck-gich, suli qaugaich.

²⁴ Solomon-gum atanniqsimaŋagaa nuna ualiñaaŋaniñ Euphrates River-m, Tiphsah-miñ Euphrates-mi tikiḷġataqługu iniqpak Gaza. Umialgupayaaqtuat ualiñġani Euphrates savautiŋagaat, suli aŋuyautaiñŋaruq iluqaiññun siḷalliġiramiñun nunauruanun.

²⁵ Iñuuniqtutilaaŋatun, Judah-ġmiut Israel-miullu iñuuniaŋarut anayanniuŋił̣ł̣utiŋ Dan-miñ Beersheba-muaglaan, iluqaġmiŋ nanmiñiq siiġñiviqallaavlutiŋ suli fig napaaqtuŋiñik.

²⁶ Solomon 40,000-tun iñugiaktigiruanik tuttuqpaqaġviqaŋaruq aksraktuuraŋisa tuttuqpaŋiñun, suli 12,000-tun iñugiaktigiruanik aŋuyaktit tuttuqpaŋiñik.

²⁷ Qulit malġuuruat (12) kavanaŋich, tatqimi piviksramiḷḷaamigni, niqiqaqtittaġniġaat Umialik Solomon pigiraksraġiraŋiññik ilaata suli iluqaiññun niġisuuruanun igluqpagmi; piqaqtittaġigaat supayaamik pigiraksraġiraŋiñik.

²⁸ Kavanallaam-suli piqaqtittaġigaa barley-ñik suli ivigruanik, piqaqtuksraumman, aksraktuurat tuttuqpaŋisalu allallu tuttuqpaich.

²⁹ God-im isumattutiqaqtinŋagaa Solomon suli kaŋiqsiñmik, iḷisimanmik kamanaqtuamik aktilaaġnaġumiñaitchuamik-unnii.

³⁰ Solomon isumatułhaaŋaniqsuq isumaturuaŋiñiñ iñuich kivaliñaam tuŋaaniittuat naakkaunnii isumaturuaŋiñiñ iñuŋisa Egypt.

³¹ Isumaturuaguniqtauŋaruq iñupayauraniñ: isumatułhaaqhuni Ethan-miñ Ezrah-ġmiumiñ, suli Heman, Calcol, suli Darda, iġñiŋich Mahol-gum. Iḷitchuġilluataŋagaat iluqaiññi nunauruani.

³² Agliurriŋaruq 3,000-tun iñugiaktigiruanik uqalugaanik suli 1,000 sipiłługu atuutinik.

³³ Uqalugaaġutigiŋagaich napaaqtut suli nauriat, Lebanon napaaqtuŋich cedar-miñ suli hyssop-muaglaan nauruat katchiñi; uqautigivlugich niġrutit, tiŋmiat, paamġuġuuruat, suli iqaluich.

³⁴ Umialgich nunapayauramiñ tusaavlugu isumattutaa tilisisuuŋarut iñugnik naalaġnisaqtuaquvlugu.