1 Kings 3 - Iñupiatun Mumiksat Uqalugiksuat

Solomon Aŋaiyyutaa Isumattutiqaġukhuni

¹ Solomon sivunniiqatigiŋagaa umialga Egypt tuvaaqasiqł̣uni panianik. Qaġġisiŋagaa iñuutquvlugu David Iniqpaŋani naatchiḷġataġnimiñuaglaan igluqpagmik, Aŋaiyyuvikpagmik, suli katchimik avaluliqł̣ugu Jerusalem.

² Taimani iñuich aitchuisuuŋarut sumiḷiqaa ikipkaivigñi Aŋaiyyuvikpak nappaŋaił̣ł̣unisuli Ataniġmun.

³ Solomon-gum nakuaġiŋagaa Ataniq suli maliġivlugich piraksriqsuutiŋich aapami David, aglaattauq tuqutchisuuvluni niġrutinik aasii aitchuutigivlugich ikipkautikun sumiḷiqaa ikipkaivigñi.

⁴ Atautchimi Gibeon-muŋaruq aitchuiyyaqłuni ikipkautikun tavranikii qutchiksuaq ikipkaivigiksuaq iłłuni. Aitchuiŋaruq qavsiiqsuaqługu iñugiaktigiruanik 1,000-tun ikipkautikun aitchuutinik sivuani.

⁵ Tavrani unnuaġmagu Ataniq niptaŋaruq Solomon-mun siññaktukun aasii God-im apiġivlugu, “Sumik uvamniñ aitchuqugaluaqpich?”

⁶ Solomon-gum kiugaa, “Iḷisimanaqtitchuugiñ nakuaqqutiqpaiñ aapamnun David-mun, kivgaġiraġnun, aasii iñulluatauŋaruq, qiksiksrautiqaqłuni, pitqiksiġautaił̣ł̣uni sivuġaġni. Suli igliqtitkiñsuli kamanaqtuaq ataramiglu ittuaq nakuaqqutin iġñiksrił̣ł̣ugu paŋmami aullarriġuqtuamik inaani.

⁷ Atanġuruatiin God, inaanullapkaŋagiŋma aapaa umialiguqłuŋa, nutaġauraugaluaqtilluŋa suli qanuq aŋalatchiñiaqtilaamnik nalugaluaqtilluŋa.

⁸ Uvva aasii uvaŋa akunġanni iñuksraqtaaġiŋaraqpich iñugisukługich ilvich, iñuich qanutun iñugiakpaił̣ł̣utiŋ kisinnaġumiñaitchuat.

⁹ Tavra isumattutiksriñŋa aŋalallayumagitka iñuktin nalaunŋaruakun suli iḷisimallaluŋa suna nakuutilaaŋaniglu suli pigiitchuagutilaaŋanik. Tainna piŋisuaqpan, qanuġluŋa aŋalatchumiñaġniaqpik ukuniŋa kamanaqtuanik iñugnik?”

¹⁰ Atanġum iviġaumagigaa Solomon taaptumiŋa apiqsrimman,

¹¹ aasii uqallautivlugu, “Qanukkii apiqsriŋarutin isumattutiksraġnik aŋalatchisukłutin nalaunŋaruakun, sivisuruamiglu iñuusuglutin apiqsriŋiññavich naakka umiallaguglutin naakkaunnii tuqutqulugich uumigiritin,

¹² qaiññiaġiga apiqsriaġiran. Isumattutiksrivsaaġniaġikpiñ suli kaŋiqsimmatiksraġnik kia unnii pigiŋaisaŋanik sivuani naakkaunnii aqukkun iñuqaġniaŋitchuq iliktun ittuamik.

¹³ Aitchuġniaġmigikpiñ apiqsriaġiŋisaġnik: iñuuniqtutilaaġni suġaliqaġniaqtutin suli qutchiksiraulutin, qaaŋiġḷugu kiñapayaaq umialguŋaruaq.

¹⁴ Aasii kamagiuraġniaġumŋa suli kamagilugich pitquratka piraksriutitkalu, aapavich David piusiŋatun, sivisuruamik iñuggutiqaqtinniaġikpiñ.”

¹⁵ Solomon iqiiġami puttuqsriruq God-mun uqautitilaamiñik siññaktukun. Tavra Jerusalem-muŋaruq, qikaqhuniasii sivuġaani Atanġum Sivunniuġutaata Kiguunniŋani suli aitchuivḷuni ikipkautitigun iḷammiuġutitigunlu Ataniġmun. Taaptuma aquagun niqinaqipkaiŋaruq atanaurapayaamiñun.

Solomon Isivġiimman Siġġaġnaqtuamik

¹⁶ Uvlut iḷaŋanni malġuk akiitchuk qaiŋaruk aasii ullakługu Umialik Solomon.

¹⁷ Igḷua uqallaktuq, “Umialguruatiin, unalu aġnaq iñuuruaguk atautchimi iglumi, aasiuvva iġñiruami aŋutaiyaamik aimmivimñi tavraniitillugu.

¹⁸ Malġuk uvluk pianigmagnik iġñiqqaaqtilluŋa, ilaali iġñimmiuq aŋutaiyaamik. Kisimñuk ittuguk iglumi—allamik iñuitchuq.

¹⁹ Tavraasii unnuat iḷaŋanni naniqługu iḷiḷgaurani ipinniġaa.

²⁰ Makiłłuniasii unnuami, iġñiġa piñiġaa saniġamniñ siñiktilluŋa, aasii siñigvigmiñukługu; aasii iḷivḷugu tuquŋaruaq iḷiḷgauraq siñigvimñun.

²¹ Uvlaaġman, iqiiqama miḷuktitchaqapku iḷiḷgauraġa, tautukkiga tuquŋaniqsuq. Aglaan qiñimmaġiksaaġapku uvaŋa miqłiqtuġiŋiññiġiga.”

²² Aġnaq aglaan alla uqallaktuq, “Naumi! Iñuuruaq miqłiqtuq uvaŋa pigigiga, aasii tuquŋaruaq ilvich piñ!” Sivulliuruam aġnam kiugaa, “Naumi! Tuquŋaruaq miqłiqtuq ilvich pigigiñ, aasii iñuuruaq uvaŋa piga!” Tavra qapiqtaiḷiruk sivuġaani umialgum.

²³ Tavraasii Umialik Solomon uqallaktuq, “Iluqasik uvva iñuuruaq miqłiqtuq miqłiqtuġiniġiksik aasii tuquŋaruaq pigiŋiññivḷugu.”

²⁴ Tavraasii umialik qanniqsuq savikpagmik, aasii qaġġisimmarruŋ umialigmun,

²⁵ uqallaktuq, “Aviksiuŋ iñuuruaq miqłiqtuq malġuullugu aasii aitchuġlugu aġnallaa avvaġmik.”

²⁶ Aakagipiaqtaŋata, piqpakkutiqaqpakłuni iġñauramiñun, uqallautigaa umialik, “Umialguruatiin, tuqunnagu miqłiqtuq! Qairruŋ ilaanun!” Aglaan igḷua aġnam uqallaktuq, “Qaiññagu nalliptignun unnii; ki avigli malġuullugu.”

²⁷ Tavraasii Solomon uqallaktuq, “Tuqunnagu miqłiqtuq! Qaitchiuŋ sivulliġmun aġnamun—aakagipiaġaa.”

²⁸ Iñuŋisa Israel tusaagamirruŋ Solomon-gum sivunniutaa, qiksigilipiaŋagaat, iḷitchuġivlutikkii God-mun isumattutiksriñŋatilaaŋanik natqiksruiḷḷasivḷugu.