1 Kings 21 - Iñupiatun Mumiksat Uqalugiksuat

Naboth-gum Siiġñiviŋa

¹ Qaniŋani Umialgum Ahab-gum igluqpaŋata Jezreel-mi Naboth siiġñiviqaŋaruq.

² Uvlut iḷaŋanni Ahab-gum uqallautiŋagaa Naboth, “Qairruŋ una siiġñiviiñ uvamnun; qanittuq uvva igluqpamnun, atuġukkiga nautchiivigilugu naurianik niġiñaqtuanik. Allamik nakuułhaaqtuamik aitchuġumiñaġikpiñ naakka, tainna pisuksimaguvich, akiḷiḷḷuataġumiñaġikpiñ.”

³ “Kiŋuvaannaktaaġiŋagiga kiŋuniimniñ,” Naboth-gum kiugaa. “Atanġum qaitquniaŋitkaa iliŋnun!”

⁴ Ahab aiŋaruq, isumaaqłuni suli qinnaŋavluni pisigivlugu Naboth-gum uqallautaa ilimiñun. Nallaŋaruq siñigvimiñun, saałługu katchi, suli niġisunġiqł̣uni.

⁵ Nuliaŋata Jezebel-gum ullakługu apiġigaa, “Summan imña isumaaqpich? Summan niġisuŋitpich?”

⁶ Ilaata kiugaa, “Pisigivlugu Naboth Jezreel-mium uqallautaa uvamnun. Tauqsiġukkaluaqtaġa siiġñiviŋat grapes-git naakkaunnii, pisukpan, allamik aitchuġlugu, aglaan uqallaktuq qaiññiaŋiññivḷugu siiġñiviŋat grapes-git uvamnun!”

⁷ “Uvvami, umialguvich Israel-mun naakka umialguŋitpich?” Jezebel-gum kiugaa. “Makillutin, quviasugiñ, suli niġiḷutin. Aitchuġniaġikpiñ siiġniviŋanik Naboth Jezreel-mium!”

⁸ Tavraasii Jezebel tuyuqtuŋaruq, aglallaavlugich Ahab atqanik, nipirrusiqł̣ugich ilaata nalunaiŋutaanik, aasii tuyuġivlugich atanaurauruanun suli qaukłiuruanun iñuuniaqtuanun Jezreel-mi.

⁹ Tuyuutit uqaluliqługich inna: “Nalunaiqsisitchi uvlumik niġiŋaiḷaġviksramik, ququaġlugich iñuich katitqulugich, aasii Naboth qutchiksiḷiġlugu akunġanni iñuich.

¹⁰ Inillaiḷusi malġugnik iñumaqłuugnik pasiuqulugu ilaanun uqamaqłuutiniḷugu God suli umialik. Aasii iniqpagmiñ annisilugu uyaġagnik miḷḷuuġlugu tuqullugu.”

¹¹ Atanaurauruat suli utuqqanaaguruat Naboth-gum iniqpaŋaniittuat piraksriutaagun Jezebel-gum piŋamarut.

¹² Nalunaiqsiŋamarut uvlumik niġiŋaiḷaġviksramik, ququaqługich iñuich atautchimun, aasii Naboth qutchiksivḷugu inillakługu akunġannun.

¹³ Malġuuk aasii iñumaqłuuruak takkuanni pasiunagutiŋagaak Naboth uqamaqłuŋanivḷugu God-mun suli umialigmun, aasii tavra annisiŋagaat iniqpagmiñ suli uyaġagnik miḷḷuuqługu tuqułługu.

¹⁴ Kiligiaqtinŋagaat Jezebel Naboth tuqutaunivḷugu.

¹⁵ Tusaaluqqaaqtumi Jezebel, uqallaktuq Ahab-mun, “Naboth Jezreel-miu tuquŋaruq. Pigiliutiuŋ siiġñivik tunisuŋitchaŋa iliŋnun.”

¹⁶ Tavrauvva Ahab siiġñivigmukłuni pigiliutigaa Naboth-gum siiġñiviŋa.

¹⁷ Tavraasii Atanġum uqallautimagaa Elijah, God-im uqaqtiŋa Tishbe-miñ,

¹⁸ “Ullaguŋ Umialik Ahab Samaria-ġmiu. Paqinniaġiñ Naboth-gum siiġñiviŋani, pigiliutisaġumaalliġaa.

¹⁹ Uqallautilugu uvaŋa, Atanġuruam, uqallautiniḷugu, ‘Iñuaqtaġianikkapku iñuk, tavrasuli piññaktaaġiaqsimmiviuŋ nunaŋa?’ Uqallautilugu uumiŋa uqallautimnik: ‘Taaptumani inimi qimmich alugvianni Naboth-gum auŋanik, aluŋniaġmigaat suli ilvich augiñ!’”

²⁰ Ahab-gum tautukkamiuŋ Elijah, uqallaktuq, “Paqilgitpiŋa, akiḷḷiiŋ?” “Aaŋ, nalauttutin,” Elijah-m kiugaa. “Iluġaaqłutin tavra savaktutin iłuaŋitchuamik Atanġum sivuġaani.

²¹ Tavraasii Atanġum uqallautigaatin, ‘Suksraunġiqsauniaqtutin. Piiqsillutin suli iluqaisa aŋutauruat nanmiñiq iḷatin, nutaġauruat suli utuqqauruat atilugich.

²² Qitunġatin irrusiñigniaqtut qitunġaŋisun Umialgum Jeroboam iġñiŋata Nebat suli qitunġaŋisun Umialgum Baasha-m iġñiŋata Ahijah-m, pisigilugu qinnaguksaaqamŋa aullativlugich Israel-guruat piḷuunmun.’

²³ Aasii pisigilugu Jezebel, Ataniq uqallaktuq, ‘Qimmich niġiñiaġaat timaa katchiŋani Jezreel.’

²⁴ Nallipayaaŋich nanmiñiq iḷatin tuquruat iniqpagmi niġirauniaqtut qimmitigun, suli nallipayaaŋich tuquruat nunami suiḷaami niġiñiaġmigaich tiŋmiaqpaich tuquŋaruaqtuqtit.” (

²⁵ Allamik iñuqaŋaitchuq kipiġniuttaqaqtigiruatun pigiitchualiqisukłuni Atanġum sivuġaani Ahab-tun—kiaqsruqtiqaqłuni nuliamiñik Jezebel-mik.

²⁶ Ahab savaŋaruq qanutun kanŋunaqtigiruanik nanġaikami iñuuraqpagnik, Atanġum uŋunŋaraŋisitun Amor-miut nunaŋanniñ, kiŋuvaaŋich Israel-gum sivunmugmata.)

²⁷ Elijah uqaŋaiġataġman, Ahab-gum aligaŋagaich annuġaani, mattaqługich, suli ativluni miitchugnik. Niġisunġiqhuni, siñighuni atuqłuni miitchugnik, suli ipiqtusuktualiqhuni.

²⁸ Ataniq uqallaktuq God-im uqaqtaanun Elijah-mun,

²⁹ “Iḷitchuġiviuŋ Ahab inmiñun qumalluktilaaŋanik sivuġamni? Tainna uvva pimman, suksraunġiun ilaanun tutinniaŋitkiga iñuuŋŋaan; iġñiŋata iñuuniŋani suksraunġiġñiaġitka Ahab-gum qitunġaŋich.”