1 Kings 18 - Iñupiatun Mumiksat Uqalugiksuat

Elijah-lu Uqaqtiŋiḷḷu Baal-gum

¹ Qakugulimman, piŋayuanni ukiut sialuŋaitpakhuni, Ataniq uqallaktuq Elijah-mun, “Ullauttuiñ Umialik Ahab-mun, aasii sialuktinniaġiga.”

² Tavraasii Elijah aullaqimaruq. Niqaiḷḷiuġniq Samaria-mi piaġiiḷipiallaŋamaruq,

³ tavra Ahab-gum ququaŋagaa Obadiah, qaunaksrauruaq igluqpagmik. (Obadiah ukpiqtuaguruaq nanġaisuuvluniḷu Ataniġmik,

⁴ Jezebel tuquġaimman Atanġum uqaqtiŋiñik, Obadiah-m tallimakipiaguruat (100) iriŋagaich qaiġusugnun malġuigułługich malġukipiaq qulit (50), aasii niqiqaqtinŋagaich imiqaqtiłługiḷḷu.)

⁵ Ahab uqallaktuq Obadiah-mun, “Aullaġlunuk takusaġluk maqsralupayaaqtuanun suli immat igliġviŋiñun paqinniaġmagaamnuk ivigaanik iñuuyumiñaqsiḷugich tuttuqpaiḷḷu kakaktillu. Iḷaanni tuqutaksraitpiaġivut niġrutivut.”

⁶ Sivunniqł̣utiŋ sugnamun nunakun takuniaqtilaamignik, aullaqiŋaruk Ahab ilimigun, suli Obadiah allakun ilimigun.

⁷ Obadiah iglaullaġmi, kasuŋagaa Elijah. Iḷisaġigaa, kurraġvigivlugu, apiġigaa, “Ilviupiaqpich, aŋuun?”

⁸ “Aaŋ, Elijah-auruŋa,” kiugaa. “Aullaġlutin uqallautisaqtuġuŋ umialgiñ umialik mauŋaġniḷuŋa.”

⁹ Obadiah-m kiugaa, “Sumik imña savaŋaruaŋa anayanniuqtinniaqpiŋa tuqutauniġmun umialikun Ahab-kun?

¹⁰ Iñuuruakun Atanikun, God-igirakkun, uqallautigikpiñ iḷumutun umialgum ivaqpaŋagaatin nunaupayaaqtuani. Atanniqsimaruam piiññimmatin ilaan nunamiñi, Ahab-gum ataniġnaqutiqaqtuaq unniqsuqłiipkaġaġigaa paqinnaiññivḷutin.

¹¹ Aasii uvva uvamnun kiligiaqugiñ maaniinniḷutin?

¹² Ilitqusiata aasii Atanġum aullatiniqpatin nalunaqtuamun inimun aullaġluqqaaqtuŋa? Tavraasii, uqallautigupku Ahab maaniinniḷutin aasii paqinŋitkumisin, tuqunniaġaaŋa. Itqaumalutin uvaŋa ukpiqtuagutilaamnik Ataniġmun nukatpiaġruunimniñ-qaŋa.

¹³ Tusaaŋaitpich Jezebel-gum tuquġaġmagich uqaqtiŋich Atanġum iriŋaratka tallimakipiat (100) qaiġusugnun, malġuigułługich malġukipiaq quliullaavlugich (50), aasii niqiqaqtinŋaratka imiqaqtiłługiḷḷu?

¹⁴ Tavra aasii qanuġlutin piraksriġumiñaqpiŋa uqallautisaqtuqulugu umialik maaniinniḷutin? Tuqunniaġaaŋa!”

¹⁵ Elijah-m kiugaa, “Iñuuruakun Atanikun Sapiġñaqtuaguruakun, savautirapkun, unniqsuqłiiruŋa ullautipiaġniaqtuŋa umialigmun uvlupak.”

¹⁶ Tavraasii Obadiah-m tautugiaŋagaa umialik Ahab aasii uqautivlugu, aasii Ahab-gum kasuġiaŋagaa Elijah.

¹⁷ Ahab-gum tautukkamiuŋ, uqallaktuq, “Uvaniittutilliqaa—iłuiḷḷiuqtitchiriqpak Israel-mi!”

¹⁸ “Iłuiḷḷiuqtitchiriqpauŋitchuŋa,” Elijah-m kiugaa. “Ilviḷḷu—aapagirallu. Kamaksriŋaitchusik Atanġum piraksriutiŋiñik suli aŋaiyyuvigivlugich iñuuraqpaŋich Baal-gum.

¹⁹ Piraksrikkich iluqaisa iñuŋich Israel kasuġiaquluŋa Mount Carmel-mi. Qaipkaġlugich 450-iuruat uqaqtiŋich Baal-gum suli 400-guruat uqaqtiŋich goddess Asherah-m niġiugaġuuruat Jezebel niġġiviani.”

²⁰ Tavra Ahab-gum tiliŋagaich iluqaisa Israel-miuguruat uqaqtiŋiḷḷu Baal-gum katitquvlugich Mount Carmel-mi.

²¹ Elijah-m ullakługich uqallaktuq, “Qanutun-suliimña sivisutigiruami sivunniġñiaqpisi? Ataniq God-aukpan, aŋaiyyuvigisiuŋ; aglaan Baal God-iukpan, aŋaiyyuvigilugu!” Iñuich aglaan qanuq uqallaŋaiñŋarut.

²² Tavra Elijah uqallaktuq, “Kisuŋŋuŋaruŋa uqaqtiuruaŋa Ataniġmun, aglaan marra 450-iurut uqaqtiŋich Baal-gum.

²³ Qaġġirrisitchi malġugnik immulivium aŋusalluŋigñik; uqaqtiŋisa Baal-gum igḷua piḷugu, tuqullirruŋ, avguġlugu qavsiullugu, aasii iḷiḷugu qirugnun—aglaan ikipkaġnasiuŋ. Tainnaptauq piñiaġmigiga igḷua immulivium aŋusallua.

²⁴ Uqaqtiŋich Baal-gum aŋaiyyuyumaut Baal-mun god-imignun, aasii aŋaiyyuniaqtuŋali Ataniġmun, aasii kiuruaq igniġmik qaipkaiḷuni—God-iuniaqtuq.” Iñuich iviġaumagivlugu, uqallaktut, uqallalluataqtutin.

²⁵ Tavra Elijah-m uqallautigaich uqaqtiŋich Baal-gum, “Iñugiaktusi, immulivium aŋusallua itqanaiqqaaluguuna pisiuŋ. Aŋaiyyulusi god-ivsiññun, aglaan ikuallaktinnasigik qiruich.”

²⁶ Immulivium aŋusallua qaġisiŋagaat, itqanaiqługu, aasii ququlaŋarut atqagun Baal-gum uvlaami isagutivlutiŋ uvluq qitiqqaġataqtillugu. “Baal kiusigut!” saqłaalaŋarut. Aglaan kiggusiaqaŋitchut. Aasii aŋayualavlutik avataani ikipkaiviḷiaġmiŋ.

²⁷ Uvluq qitiqqaġman, Elijah-m kipagirraqsigaich: “Nipatusivsaaġlusi aŋaiyyusitchi! Ilaa god-auruq! Immaqanuq isumaqpaktuq, naakka aptava, naakka imña kukiḷukpa? Naakkaimña siquva aasii iqiiqsaqtaksrauva!”

²⁸ Tavraasii uqaqtit aŋaiyyugaluaŋarut nipatusivḷutiŋ suli kiḷḷiaqłutiŋ ilimignun savigñik allaniglu satkunik, piraġausitiŋ maliġivlugich, aunaalaliġataqłutiŋ.

²⁹ Tavraasii uvluq qitiqqaŋaiġataġman, piaqłaanġiqł̣utiŋ uqaġaluaŋarut uqaqtit, tikiḷġataqtillugu aitchuiviksraq anaqamman; aglaan kiuriqaŋitchut, sumik unnii nipimik tusaaŋitchut.

³⁰ Tavraasii Elijah-m uqallautigaich iñuich, “Qalliḷaaġitchi uvamnun,” aasii ullakkaat avałługu. Iluaqsrunagutigaa ikipkaivik Ataniġmun siquminŋaruaq.

³¹ Qulit malġugnik (12) uyaġaksraqtuq, iñugiaktilaaŋatitun maŋŋuuruat iġñiŋich Jacob. Aŋun taamna ilaata Atanġum atchiŋaraŋa Israel-mik.

³² Taapkuniŋa uyaġagnik nappatqikkaa ikipkaivik nanġaiviksraq Ataniġmun. Nivakłuni iḷuqsrivḷugu avataagun, imaqaġumiñaqsivḷugu sisamanik gallon-nik.

³³ Innillakkaich qiruich ikipkaivigmun, aasii avguqługu immulivium aŋusallua, aasii iḷivḷugu qirugnun. Uqallaktuq, “Immiqsigik sisamat aŋiruat imiqaġviich imiġmik aasii kuviḷugich aitchuutiksraunmun qirugnullu.” Kamagigaat,

³⁴ aasii uqallaktuq, “Kiikaasuli,” aasii kamagiŋagaat. “Piŋayuanni suli,” uqallautigaich—aasii piŋasuiqsuaŋagaat.

³⁵ Imaq maqiŋaruq avataanun ikipkaivium suli siḷiviłługu tamanna iḷuqsraq.

³⁶ Tikiñman aitchuiviksraq anaqami, God-im uqaqtiŋa Elijah ikipkaivigmuktuq aasii aŋaiyyuvluni, “Atanġuruatiin, God-iŋa Abraham, Isaac-guvlu suli Jacob-gum, nalupqinaiġuŋ akkupak ilvich God-autilaaġnik Israel-mun suli kivgautilaamnik iliŋnun suli savaaġiratka iluqaisa savakkitka ilvich piraksriutikkun.

³⁷ Tusaallagniaŋŋa, Ataniiq, kiuŋŋa, ukua iñuich iḷitchuġiyumaut ilvich, Ataniq, God-autilaaġnik Israel-mun suli uummatiŋich saatqiktillugich iliŋnun.”

³⁸ Atanġum igniq kataktitkaa, aasii ikipkaqługu ikipkautauruaq, qiruiḷḷu, uyaġaiḷḷu, misaiqługulu imaq iḷuqsramiittuaq.

³⁹ Iluqaġmiŋ iñuich tautukkamirruŋ, palluŋarut nunamun aasii uqaqłutiŋ, “Ataniq God-auruq; Ataniq kisimi God-auruq!”

⁴⁰ Elijah piraksriiruq, “Tigusigik uqaqtiŋich Baal; nalliat unnii qimaktinnagu!” Iñuich tiguŋagaich iluqaisa, aasii Elijah-m unuŋautiŋagaich Kishon River-mun aasii tuqułługich.

Qasuġman Nunam Sialullaisugrugniŋa

⁴¹ Tavra Elijah-m uqallautigaa Umialik Ahab, “Aullaġlutin niġisaqtuaġiñ imiġutinlu. Tusaagiga imma sialukpak qalliruaq.”

⁴² Ahab niġisaqtuqtillugu imiġutinlu, Elijah mayuŋaruq qaaŋanun Mount Carmel-gum, tavraniasii pułłuni nunamun, niaqquni sitquugmi akunġagnukługu.

⁴³ Uqallautigaa kivgani, “Alatkaġiaġiñ taġium tuŋaanun.” Kivgaq aullaqqaaqłuni utiqtuq, uqaqłuni, “Sumik tautuŋitchuŋa.” Tallimat malġugni Elijah-m qiñiġiaqtitaġaa.

⁴⁴ Tallimat malġuanni utiqami uqallaktuq, “Tautuktuaŋa nuvuyałauramik iñuum argaŋatun aktigiruamik, qaiñmuktuq taġiumiñ.” Elijah-m tiligaa kivgani, “Ullaguŋ Umialik Ahab aasii uqallautilugu ikulunigguuq aksraktuuramiñun aisauraġli sialugmun nutqaqtinŋaiñŋaġmi.”

⁴⁵ Akkupaniaq siḷa matuŋaruq taaqtuanik nuvuyanik, anuqłiġuġmivluni, aasii sialukpaaqsivḷuni. Ahab ikuvluni aksraktuuramiñun utiqsauraŋaruq Jezreel-mun.

⁴⁶ Suaŋŋataa Atanġum tunŋaruq Elijah-mun; tavsiaġiksaaqługich annuġaani aqpamik aullaqiŋaruq Ahab sivulikługu Jezreel-munaglaan.