1 Kings 16 - Iñupiatun Mumiksat Uqalugiksuat

¹ Atanġum uqallautiŋagaa God-im uqaqtaa Jehu iġñiŋa Hanani kiliquvlugu Baasha uumiŋa:

² “Suliqirauŋiñŋagaluaqtuatin, aglaan aullarriliutiŋaraqpiñ iñugiramnun Israel-mun. Aasii uvva piḷuksiŋammiutin Jeroboam-tun suli iñugiratka piḷuksipkaqługich. Piḷuusiqiaŋisa qinnaliqsinŋagaanŋa,

³ tavraasii piiqsinniaġikpiñ qitunġatillu, piusiptun Jeroboam-mun.

⁴ Nallipayaaŋich qitunġaqpich tuquruat iniqpagmi niġiñiaġaich qimmich, suli nalliŋich tuquruat avani suiḷami nunami niġiñiaġaich tiŋmiaqpaich.”

⁵ Savaapayaaŋich Baasha-m suli uluġiił̣ł̣uni savaaŋich agliusimaruq makpiġaani Inillaaniŋaruat Savaaŋisigun Umialiŋisa Israel.

⁶ Baasha tuqumman iḷuviŋagaat Tirzah-mi, aasii iġñiŋa Elah umialiguqłuni.

⁷ Kiliktuun qairuaq Ataniġmiñ akiḷḷiġivlugu Baasha qitunġaŋiḷḷu God-im uqaqtiŋaguaqługu Jehu-kun pisigivlugich piḷuusiqiaŋich Baasha-m akiḷḷiġivlugu Ataniq. Qinnaliqsiłługu Ataniq pisigiłhiñaġaluaġnagu pigiiḷḷiqiaŋa, piusiatun Umialgum Jeroboam-gum sivuani, aglaan pisigivlugulu tuquġaiŋamman iluqaiññik Jeroboam qitunġaŋiñik.

Israel-gum Umialiŋa Elah

⁸ Iñuiññaq itchaksraŋanni (26th) ukiimman umialguvluni Umialik Asa Judah-mi, Elah iġñiŋa Baasha-m umialiliutiŋaruq Israel-mi, aasii atanniqsuivḷuni Tirzah-mi malġugni ukiugni.

⁹ Zimri, iḷaŋat atanauraŋisa qaunaksriuruaq avvaŋiñik umialgum aksraktuuraŋisa, sivunniuŋaruq nalunaqtuakun paaqłakługu. Uvlut iḷaŋanni Tirzah-mi, Elah imiŋasiŋamaruq igluani Arza-m, munaqsriuruam igluqpagmik.

¹⁰ Zimri isiŋaruq iglumun aasii iñuaqtaġivlugu Elah, inaanun aasii ilaa umialiguqłuni. Taamna nalautinŋaruq iñuiññaq tallimat malġuanni (27th) ukiut umialgumman Umialik Asa Judah-mi.

¹¹ Zimri umialiguġluqqaaqtumi tuquġaŋagaich iluqaisa iḷaŋich Baasha-m. Aŋutipayaurat iḷaŋich suli avilaitqatiiŋiḷḷu tuquġaŋagaich.

¹² Tavraasii, uqaluk nalaułługu Atanġum uqallautaa akiḷḷiġivlugu Baasha God-im uqaqtaagun Jehu-kun, Zimri-m tuquttaŋamagaich nanmiñiq iḷaŋich Baasha-m.

¹³ Pisigivlugu aŋaiyyuuġniŋat iñuuraqpagnun suli Israel-guruat piḷuusiqipkaqługich, Baasha-vlu iġñiŋatalu Elah-m qinnaliqsinŋagaak Ataniq, God-iŋat Israel.

¹⁴ Sunapayaaq savaaŋa Elah-m agliusimaruq makpiġaani Inillaaniŋaruat Savaaŋisigun Umialiŋisa Israel.

Israel-gum Umialiŋa Zimri

¹⁵ Iñuiññaq tallimat malġuanni (27th) ukiimman umialguvluni Umialik Asa Judah-mi, Zimri atanniqsuirauŋaruq Tirzah-mi Israel-mun tallimat malġugni uvluni. Israel aŋuyaktiŋisa avanŋagaat iniqpaŋa Gibbethon Philistia-mi,

¹⁶ aasii tusaagamiŋ Zimri sivunniuqłuni nalunaqtuakun paaqłakługu umialik iñuaqtaġinivḷugu, tavra iluqaġmiŋ nalupqinaiŋagaat qaukłiq Omri, umialliutivlugu Israel-mun.

¹⁷ Omri aullaŋarut Gebbethon-miñ aasii avałługu Tirzah.

¹⁸ Zimri iḷitchuġigami iniqpak pisaġitilaaŋanik, igluqpaum iḷulliġmun sapukutaŋanuŋaruq, igluqpak ikipkaqługu, aasii tuquvluni igniġmi.

¹⁹ Taamna nalautinŋaruq pisigivlugich piḷuusiqiaŋich akiḷḷiġivlugu Ataniq. Tuvraqługu sivulliñi Jeroboam, iviġaktuaŋaiññiġaa Ataniq ilaataptauq piḷuusiqiamigun suli Israel-guruat piḷuusiqipkaqługich.

²⁰ Sunapayaaq savaaŋa Zimri-m, iḷagivlugu sivunniulluataŋaiññiŋa, agliusimaruq makpiġaani Inillaaniŋaruat Savaaŋisigun Umialiŋisa Israel.

Israel-gum Umialiŋa Omri

²¹ Iñuŋich Israel avigaaŋasiŋamarut: iḷaŋisa umialiliutisukługu Tibni, iġñiŋa Ginath-gum, aasiiḷi allat iviġaumagivlugu Omri.

²² Iñuich akimaŋamarut Omri-qaġuktuat; tavraasi Tibni tuqumman, Omri umialliutiŋagaat.

²³ Tavra iñuiññaq qulit atausiŋanni (31st) ukiut umialgumman Umialik Asa Judah-mi, Omri umialiguŋamaruq Israel-mi, aasii atanniqsuivḷuni qulit malġugni (12) ukiuni. Sivulliġñi itchaksrani ukiuni umialguŋamaruq Tirzah-mi,

²⁴ aasii tavra tauqsiŋamagaa qimiġaŋa Samaria-m 6,000 qatiqtuanik manigñik iñugmiñ atiqaqtuamiñ Shemer-mik. Omri-m sakpukusiqsuŋamagaa qimiġaq, nappaivḷuni nunaaqqimik tavrani, aasii atchiqł̣ugu Samaria-mik, atchiutivlugu Shemer, qimiqqam iñukkaluaŋa.

²⁵ Omri pigiiḷḷiqiŋamaruq akiḷḷiġivlugu Ataniq qaaŋiqł̣ugich unnii sivulliiñi.

²⁶ Jeroboam-tuttauq sivumiñi, qinnaliqsinŋamagaa Ataniq, God-iŋa Israel, piḷuusiqivluni suli aullativlugich iñuich piḷuunmun iñuuraqpagnullu aŋaiyyupkaqtaqługich.

²⁷ Sunapayaaq savaaŋa Omri-m iluqaisalu iñiqtaŋich agliusimaruq makpiġaani Inillaaniŋaruat Savaaŋisigun Umialiŋisa Israel.

²⁸ Omri tuquŋaruq aasii iḷuviqługu Samaria-mi, aasii iġñiŋa Ahab aquagun umialiguŋamaruq.

Israel-gum Umialiŋa Ahab

²⁹ Iñuiññaq akimiaq piŋayuanni (38th) ukiut umialgumman Umialik Asa Judah-mi, Ahab iġñiŋa Omri-m umialiguŋaruq Israel-mi, aasii atanniqsuivḷuni Samaria-mi iñuiññaq malġugni (22) ukiuni.

³⁰ Ahab iġñiŋa Omri-m piḷuusiqiŋaruq akiḷḷiġivlugu Ataniq qaaŋiqł̣ugich unnii sivuani qaukłiuŋaruat.

³¹ Naamagiŋaitkaa tainnaptauq piḷuusiqiugaqami Umialiktun Jeroboam-tun; tavra suli tuvaaqasiŋaruq Jezebel-mik, panianik Umialgum Ethbaal Sidon-mium, aasii aŋaiyyuvigivlugu Baal.

³² Aŋaiyyuviḷiuŋamaruq Baal-mun Samaria-mi, ikipkaiviḷiuqługu, aasii aŋaiyyuvikpagmun iḷivḷugu.

³³ Napaqutaliuŋamammiuq iñuuraqpagmik Asherah-mun. Savaaqałhaaŋamaruq qinnaliutiksraŋiñik Atanġum, God-iŋata Israel, iluqaiññiñ umialiuŋaruaniñ Israel-mi sivumiñi.

³⁴ Umialgupkaqługu Ahab, Hiel Bethel-mium nappatqiŋamagaa Jericho. Atanġum uqallausiatun Joshua-kun iġñiŋagun Nun-gum, Hiel-gum iġñiŋa aŋayukłiq Abiram tuquŋamaruq maŋŋuŋiñik Jericho-m savaktillugu, aasii nukaqłiq iġñiŋa Segub tuquvluniptauq nappaipkaqługu upkuaqpagnik.