1 Kings 14 - Iñupiatun Mumiksat Uqalugiksuat

Tuqumman Jeroboam-gum Iġñiŋa

¹ Taimani Umialik Jeroboam-gum iġñiŋa Abijah naŋiliŋaruq.

² Jeroboam uqallautigaa nuliani, “Iḷisaġnaiyaġlutin kimunliqaa iḷisaġiyumiñaiġḷutin uvamnun nuliaġitilaaġnik, Shiloh-mugiñ, tavrani samma God-im uqaqtiŋa Ahijah iñuuruq, uqallaŋaruaq umialguniaġnivḷuŋa Israel-mun.

³ Saagautilugu qulinik punniġnik, cake-ñiglu, suli misuġuqtuunmun honey-mik. Apiqsruqsaġiñ qanuq piñiaqtilaaŋa iġñiqpuk, aasii samma uqallautiniaġaatin.”

⁴ Tavraasi Ahijah-m aimmiviŋanuktuq. Utuqqalivḷuni Ahijah ayauŋamaruq.

⁵ Atanġum uqallautiŋagaa Ahijah, “Jeroboam-gum aġnaat qaiñiaġnivḷugu apiġiyyaġlugu iġñiġmigun, naŋittuakun. Aasii Atanġum uqallautimagaa Ahijah uqaluksraŋanik. Jeroboam aġnaat tikiññami, allatun iñuktun inŋuaŋaruq.”

⁶ Aglaan Ahijah-m tusaagamiuŋ isiġiaqtuaq, uqallaktuq, “Isiġiñ. Iḷisimaruŋa Jeroboam-mun nuliaġitilaaġnik. Summan imña allatun iñuktun inŋuaqpich? Tusaayugaaġiitchuamik qaisaksraqaqtuŋa iliŋnun.

⁷ Uqallautisaqtuġuŋ Jeroboam inna uqallaktuq Ataniq, God-iŋat Israel-guruat: ‘Naliġaaġiŋaraqpiñ akunġanniñ iñuich suli aullarriġuqłutin iñugiramnun Israel-mun.

⁸ Umialguniq piiŋaraġa David kiŋuvaaŋiñiñ aasii qaił̣ł̣ugu iliŋnun. Aglaan irrusiqaŋaitchutin kivgaġiraptun David-tun, kamaksrisuuruatun piraksriqsuutimnik, maliġuaqłuŋa iluqaaqługu uummatini suli savakłuni iviġaumagiramnik kisian.

⁹ Ilvich pigiił̣haaqtuanik pigiiḷḷiqiŋarutin sivugni atanniqsuiruaniñ. Ayyaŋagiŋma suli qinnaliqsiłłuŋa iñuuraqpaliuqłutin suli manigmik kaviqsuanik arriliuġlutin nanġaaksraġnik.

¹⁰ Taamna pisigilugu suksraunġiqsinniaġiga umialguraġaġniqsi suli tuqupkaġlugich iluqaisa aŋutit kiŋuvaasi, nutaugaluaqpata suli utuqqanaagugaluaqpata atilugich. Piiqsinniaġitka qitunġaġiiksuat iḷasi; maqqunik ikipkaimmatun.

¹¹ Nallipayaaŋich Jeroboam iḷaŋich tuquruat iniqpagmi niġiñiagaich qimmich, suli nalliŋich tuquruat avani suiḷaami nunami niġiñiagaich tigmiapaich. Uvva Uvaŋa, Atanġuruaŋa, uqaqtuŋa.’”

¹² Aasii Ahijah-m uqautigaa Jeroboam tuvaaqataa, “Aisauraġiñ. Tikiḷḷuqqaaqtutin nunaaqqimun, iġñiġiñ tuquniaqtuq.

¹³ Iluqaġmiŋ iñuŋisa Israel qivġuniaġaat suli iḷuviġlugu. Kisimitualuk Jeroboam iḷaŋiñi iḷuviqtauniaqtuq, kisiankii Atanġum God-iŋata Israel, iviġaumagitualukługu Jeroboam igluqatiiŋiñi.

¹⁴ Ataniq inillaiŋaruq umialiksraŋanik Israel nutqaqtitchiñiaqtuamik Jeroboam-gum iḷaŋisa umialguniŋannun. Tavra uvlupak-unnii tainnaittuq.

¹⁵ Atanġum tatavsaġniaġaa Israel, uulillagniaqtuq ivigruatun immami. Kaŋŋiaġniaġaich iñuŋich Israel maaŋŋa nunalluatamiñ aitchuutikkaluamiñiñ maŋŋuuŋiñun, suli siammayaaġlugich avuŋatchianun Euphrates-gum River-m, qinnaliqsinŋagaatkii iñuuraqpaliuqłutiŋ napaqutanik goddess-mun Asherah-mun.

¹⁶ Atanġum aġiuniaġaa Israel pisigilugich Jeroboam piḷuusiqiaŋich suli iñuŋich Israel aullativlugich piḷuunmun.”

¹⁷ Jeroboam aġnaat airuq Tirzah-mun. Isiġmiuġlu iglumiñun, miqłiqtuq tuquniqsuq.

¹⁸ Iñuŋisa Israel qivġuŋagaat suli iḷuviqługu, Atanġum uqallausiatun kivgaġmigun, God-im uqaqtaagun Ahijah-kun.

Tuqumman Jeroboam

¹⁹ Allat savaapayaaŋich Umialgum Jeroboam-gum, aŋuyagman suli qanuġlu aullarriŋatilaaŋa, iluqaġmiŋ agliusimarut makpiġaani Inillaaniŋaruat Savaaŋisigun Umialiŋisa Israel.

²⁰ Jeroboam atanniqsuiŋaruq umialguvluni iñuiññaq-malġugni (22) ukiuni. Tuquŋaruq suli iḷuviqtauvluni, aasii iġñiŋata Nadab inaŋiŋagaa umialiguqłuni aquagun.

Judah-m Umialiŋa Rehoboam

²¹ Solomon iġñiŋa Rehoboam malġukipiaq atausimik (41) ukiuqtutigiŋaruq umialiguqami Judah-mi, aasii umialguŋamaruq akimiaq malġugni (17) ukiuni Jerusalem-mi, iniqpagmi Atanġum naliġaaġiŋaraani iluqaaniñ nunaŋaniñ Israel iniksraqtaaġivlugulu ilimiñun aŋaiyyuviutquvlugu. Rehoboam-gum aakaŋa Naamah Ammon-miu.

²² Iñuŋich Judah-m piḷuusiqiŋarut akiḷḷiġivlugu Ataniq suli sigñatikun qinnaliqsiłhamavlugu taipkunaŋŋa kiŋuniimigniñ.

²³ Nappaisuuŋarut nanġaiviksranik god-iŋŋuanun, uyaġagnik naparuanik, suli napaqutanik iñuuraqpagnik Asherah-mun qutchiksuani qimiqqani suli napaaqtupayaat atiŋiññi.

²⁴ Pigiipiksuaqtuat suli, tamaani inŋarut aŋutillu aġnallu akiitchuuruat god-iŋŋuanun nanġaiviŋiñi. Iñuŋisa Judah-m atuŋagaich kanŋunaqtuat piḷġusiŋich iñuich Atanġum uŋunŋagaluaqtaŋisa nunamiñ Israel-miuguruat nunamuqqaaġmata.

²⁵ Tallimaŋanni ukiut Rehoboam umialigupkaqtił̣ł̣ugu, Egypt-mi Umialgata Shishak-gum, pigruġvigiŋagaa Jerusalem.

²⁶ Aullautiŋagaich iluqaisa suġaliŋich Aŋaiyyuvikpagmiñ igluqpagmiḷḷu, iḷagivlugich kaviqsuamik manigmik savaat akkiaġautit Solomon savaaŋich.

²⁷ Simmausiqsaqługich, Umialik Rehoboam patukpagmik akkiaġautiliuŋaruq aasii qaunagipkaqługich atanaurauruanun munaqsriruanun igluqpaum upkuaŋiñik.

²⁸ Umialik Aŋaiyyuvikpagmutuaġaġimman, munaqsrit tigumiaġaġigaich akkiaġautit aasii utiqtinmivḷugich munaqsrit tutquġviŋannun.

²⁹ Sunapayaaq Umialgum Rehoboam-gum savaaġiŋaraŋa agliusimaruq makpiġaani Inillaaniŋaruat Savaaŋisigun Umialiŋisa Judah.

³⁰ Taimani tavra Rehoboam-lu Jeroboam-lu ataramik aŋuyautiugaġuuŋaruk avanmun.

³¹ Rehoboam tuquŋaruq suli iḷuviqtauvluni umialguŋaruat iḷuvvivianni David Iniqpaŋani. Aakaŋata atiŋa Naamah Ammon-miu, aasii iġñiŋata Rehoboam-gum, Abijah-m, inaŋiŋagaa umialiguqłuni aquagun.