1 Kings 13 - Iñupiatun Mumiksat Uqalugiksuat

God-im Iñua Judah-miñ

¹ Atanġum piraksriutaagun God-im uqaqtiŋa Judah-miñ Bethel-muŋaruq aasii tikił̣ł̣uni Jeroboam makinmiuġlu ikipkaivigmi aitchuisaqłuni tivraġiksautinik ikipkautikun.

² Piraksriutaa Atanġum maliġivlugu, God-im uqaqtaata suksraaŋagaa ikipkaivik: “Ikipkaiviik, ikipkaiviik, uvva inna Ataniq uqallaktuq: Miqłiqtuq, atiqaġniaqtuaq Josiah-mik, aniñiaqtuq qitunġaŋiñun David. Aitchuutiginiaġaich aŋaiyyuliqsiqpauruat savaktuat god-iŋŋuanun, suli ikipkaġniaġai iñuich sauniŋich iliŋni.”

³ Suli God-im uqaqtaa uqallavsaaqłuni, “Una ikipkaivik katagaalaniaqtuq, suli aġraŋich naavitaulutiŋ. Tavra aasii iḷitchuqqutiginiagiñ Ataniq uqaŋatilaaŋanik uvapkuaqłuni.”

⁴ Umialgum Jeroboam-gum taamna tusaagamiuŋ iñua God-im uqaqtuaq suksraaŋagaa ikipkaivik Bethel-mi, tikkuaqługu ikipkaiviŋmiñ piraksriiñiqłaŋaruq, “Tiggusiuŋ taamna aŋun!” Tavrauvvaa umialgum argaŋa aulallaiqsiŋaruq tiggaqsivḷuni panaqługługu.

⁵ Ikipkaivik tavraŋŋatchiaq siqummaalaŋaruq aasii aġraŋich siamiłłutiŋ nunamun, uqallausiatun God-im uqaqtaata uqaqtuam uqaluŋiñik Atanġum.

⁶ Umialgum Jeroboam-gum uqallautigaa God-im uqaqtaa, “Aŋaiyyutiŋŋa Ataniġmun God-ignun, aasii apiġilugu mamititqulugu argaga!” God-im uqaqtaa aŋaiyyuruq Ataniġmun, aasii umialgum argaŋa iłuaqsivḷuni irrusimisun.

⁷ Tavraasii umialgum uqallautigaa God-im uqaqtaa, “Qaiḷutin maliŋŋa aimmivimñun niġisaqtuaġlutin. Aitchuutiksriññiaġikpiñ.”

⁸ God-im uqaqtaata kiugaa, “Aitchuġaluaġumŋaunnii avvaŋiñik suġaliqpich, aullaqatigiyumiñaitkikpiñ naakkaunnii niġiḷuŋa naakka imiġluŋa piqatigilutin maani.

⁹ Atanġum piraksriŋagaaŋa niġitquŋił̣ł̣uŋa naakka imiquŋił̣ł̣uŋa, suli aiñmuquŋił̣ł̣uŋa qaivigirapkun.”

¹⁰ Tavraasii utiŋaitchuq qaivigiramigun Bethel-miñ, aglaan allakun apqutikun.

Utuqqanaaguruaq God-im Uqaqtaa Bethel-mi

¹¹ Taimani utuqqanaaq God-im uqaqtiŋa iñuuniaŋaruq Bethel-mi. Iġñiŋisa qaivḷutiŋ uqautigaat qanuq God-im uqaqtiŋa Judah-miñ piŋatilaaŋa Bethel-mi taaptumani uvlumi qanuġlu uqaŋatilaaŋanik Umialigmun Jeroboam-mun.

¹² Aapaŋata apiġigaich, “Sugnamun aullaqpa?” Aasii iġñiŋisa iḷisautigaat kisukun apqutikun iñua God-im aullaqtilaaŋanik, qairuam Judah-miñ,

¹³ Aasii uqallautigaich aquppiusiquvlugu kakaktini. Aquppiusiŋagaat, aasii aullaqiŋaruq,

¹⁴ aquliraŋagaa God-im uqaqtaa Judah-miñ, paqiłługu aquppiruaq ataani oak napaaqtum. “Uvvailvich God-im uqaqtiŋa Judah-min?” apiġigaa. “Aaŋ,” aŋutim kiugaa.

¹⁵ “Uvaptinnuglunuk niġiqasiġiaŋŋa,” uqallautigaa.

¹⁶ God-im uqaqtaata Judah-miñ aglaan kiugaa, “Ilivsiññukkumiñaitchuŋa piqatigilutin naakkaunnii akuqtuġlugu aiyugaaġutin. Suli niġiqatigiyumiñaitkikpiñ naakka imiqatigilutin maani,

¹⁷ qanukkii Atanġum piraksriŋagaaŋa niġitquŋił̣ł̣uŋa naakka imiquŋił̣ł̣uŋa, suli utiquŋił̣ł̣uŋa qaivigirapkun.”

¹⁸ Tavraasii utuqqanaaguruam uqaqtim Bethel-mium uqallautigaa, “Uvaŋaptauq, uvva, uqaqtaummiuŋa iliktun, aasii uvva Atanġum piraksriutaagun isaġulgum uqallautigaaŋa aggisitquvlutin suli aiyugaaquvlutin.” Aglaan utuqqanaaq uqaqti sagluuŋaruq.

¹⁹ Tavraasii God-im uqaqtaata Judah-min utuqqanaaq aimmivianuqatigiŋagaa aasii niġiqatigivlugu suli imiqłuni.

²⁰ Aquppiuraaqtillugik niġġivigmi, uqaluk Ataniġmiñ qairuq utuqqanaamun uqaqtimun,

²¹ aasii nivliqł̣uni God-im uqaqtaanun Judah-ġmiumun, “Ataniq uqaqtuq: kamagiŋitkiñguuq suli piŋił̣ł̣ugu Atanġum God-ikpich piraksriutaa.

²² Aglaan uvva, utiqłutin aasii niġivḷutin inimi niġġivigitquŋisaŋani. Taamna pisigilugu tuqutauniaqtutin, suli timin iḷuviġniaŋitkaat iḷakpich argaurriviannun.”

²³ Niġianikkamiŋ, utuqqanaam iñuum aquppiusiŋaġaa kakaktiŋa God-im uqaqtaata Judah-ġmiu,

²⁴ aullaqłuniasii. Apqunmi lion-gum kasuqługu tuqutkaa. Timaa aasii apqutiġruiññamiinŋaruq, suli kakaktilu lion-lu makitavlutik saniġaani.

²⁵ Iñuich nalautchaaġutiŋarut aasii tautukługu timaa apqunmi, lion-tauq makitaruaq qaniŋani. Aullaqłutiŋ iniqpagmun kilikkaich tautuktamignik utuqqanaam uqaqtim iñuuviani.

²⁶ Utuqqanaaq uqaqti tusaagami, uqallaktuq, “Taamma God-im uqaqtiŋa kamaksriŋitchuaq Atanġum piraksriutaanik! Aasii tavra Atanġum tiliŋagaa lion ugiaġlugu tuqutquvlugu, uqallausia nalaullugu Atanġum.”

²⁷ Tavra uqallautigaich iġñiġutiini, “Aquppiusiutisiñŋa kakaktimnun.” Aqquppiusigaat,

²⁸ aasii aullaqivluni suli paqiłługu uqaqtim timaa nalaruaq apqunmi, kakaktiŋalu suli lion tamaaniiłłuni. Lion-gum niġiŋaiññiġaa timaa naakkaunnii ugiaġlugu kakakti.

²⁹ Utuqqanaaguruam uqaqtim tiguvlugu timaa, usiḷḷiutigaa kakaktimun, aasii Bethel-muutivlugu qivġuvigisukługu suli iḷuviġlugu.

³⁰ Iḷuviŋagaa nanmiñiq ilaan iḷagmi argaurriviannun, aasii ilaatalu iġñiġutiiŋisalu qivġuŋagaat, uqaqłutiŋ, “Yaqhii, aniqaan, aniqaan!”

³¹ Iḷuvianikkamirruŋ God-im uqaqtaata uqallautigaich iġñini, “Tuqugumali, iḷuviġisigivsiñŋa uumuŋa iḷuvvivigmun aasii inillaglugu timiġma sauniŋi saniġaanun.

³² Uqaluich uqallausiġiŋaraŋich Atanġum piraksriutaagun akiḷḷiġivlugu ikipkaivik Bethel-miittuaq suli akiḷḷiġivlugich nanġaiviḷiat nunaaqqiŋiñi Samaria-m iḷumun nalautinniaqtut.”

Jeroboam-gum Piḷuusiqituiññaġniŋa

³³ Umialguruam Jeroboam-gum Israel-miunun aġiuŋaiñŋagaich pigiitchuat piḷġusiñi aglaan kiikaa aŋaiyyuliqsiqpaksraqtuqłuni kisuniḷḷiqaa qitunġaġiiguruaniñ savaaksrił̣ł̣ugich ikipkaiviḷiamiñi. Kiñapayaaq aŋaiyyuliqsiġuġuktuaq aŋaiyyuliqsiġuqtitaqługu nanġaiviḷiamiñi.

³⁴ Tavra taamna piḷuun igluqatiiŋiñi Jeroboam-gum atanniqsuiñimiñi patchisauruaq katagniŋanni suli suksraunġiqsauniŋanni nunam qaaŋaniñ.