1 Kings 12 - Iñupiatun Mumiksat Uqalugiksuat

Salliuruat Maŋŋuqatigiich Paaqłagmata Rehoboam-mik

¹ Rehoboam Shechem-muŋaruq, iñupayaaŋich Israel-mi katinmata umialliutisaqługu.

² Jeroboam, iġñiŋa Nebat-gum, Egypt-mun qimaaŋaruaq Umialigmiñ Solomon-miñ, tusaagami tusaayugaanik taapkuniŋa, utiŋaruq Egypt-miñ.

³ Iñuŋisa salliñaaguruat maŋŋuqatigiich qanniŋagaat, aasii ullakługu iluqaġmiŋ Rehoboam uqallautigaat,

⁴ “Aapavich Solomon suammativluta aŋalanŋagaatigut suli uqumaitchuanik akigaaqaqtiłłuta. Akigaaġiravut uqigḷiḷaaġupkich suli iñuusiqput siġġaġnaipayaaġlugu uvaptiŋnun, savautiniaġiptigiñ.”

⁵ “Qaitqikkumausi piŋasuni uvlianikkupta aasii kiuniaġivsi,” ilaata kiugaich. Tavraasii aullaqtut.

⁶ Umialgum Rehoboam-gum apiġigaich utuqqanaat aŋutit siḷġiqsuqtigisuuŋaraŋich aapami Solomon-gum. “Qanuq kiutqunayaqpisigik uvamnun apkua iñuich?” ilaan apiġigaich.

⁷ Iliŋisa kiugaat, “Savautilluataġukkupkich taapkua iñuich, kiusaġitin iviġaumagiraŋannik, aasii savautiłhaiññaġuuniaġaatin.”

⁸ Aglaan suliqutigigaluaġnagich piraksriutaat utuqqanaat aasii ullautisiññaŋaruq nukatpianun iñuguqatigiŋaramiñun suli ilaan siḷġiqsuqtigiliutiŋavlugich.

⁹ “Qanuq pitqunayaġniqpisiñŋa?” apiġigaich. “Qanuq uqallautiyumagitka iñuich apiqsriruat akigaaġiratiŋ uqigḷiḷaaquvlugich?”

¹⁰ Iliŋisa kiugaat, “Inna uqallautigisigitin: ‘Argagma iqitquuraŋa siḷiłhaaqtuq aapaa tavsituġvianiñ!’

¹¹ Uqallautilugich, ‘Aapaa uqumaitchuanik akigaaqaqtinŋagaluaġaasi; uqumaiḷiḷaaġniaġitka. Ipigaqtuġaġigaasi ipiġaqtuutinik; ipiġaqtuġniaġivsiḷi scorpion-nik!’”

¹² Piŋasut uvlut pianigmata Jeroboam-lu iñupayaallu utiqtut Umialik Rehoboam-mun, piraksriutaatun.

¹³ Umialgum suliqutigigaluaġnagu utuqqanaat piraksriutaat suammativlugich uqautigaich iñuich,

¹⁴ nukatpiat piraksriutaatitun. Rehoboam uqallaktuq, “Aapagma uqumaitchuanik akigaaqaqtinŋagaluaġaasi; uqumaiḷił̣haaġniaġitka. Ipiġaqtuġuuŋagaluaġaasi ipiġaqtuutinik; ipiġaqtuqpagniaġivsi scorpion-nik!”

¹⁵ Pisuutigiŋagaa Atanġum taamna uqallausiatun Jeroboam-mun iġñiŋanun Nebat-gum, God-im uqaqtiŋagun Ahijah-kun Shiloh-ġmiu. Tainnamik umialgum suliqutigiŋaitkaich iñuich.

¹⁶ Iñuich iḷitchuġigamiŋ umialigmun naalaġniñiaŋisilaamignik, kiuŋagaat uqaqłutiŋ, “Suunnaġiŋaiŋagikput David! Kiŋuvaaksraitchugut iġñiŋaniñ Jesse-m. Tupivsiññugitchi Israel-miuguruasii! Qaunaġisiññakki ilvich iñugiratin, kiŋuvaaguruatiin David-mun.” Tavraasii Israel-miuguruat tupimignuayaaŋarut,

¹⁷ Rehoboam umialliutivlugu kisian iñuuruanun nunaŋani Judah-m.

¹⁸ Tavraasii Umialgum Rehoboam-gum tiliŋagaa Adoniram, qaukḷiġiraŋat taluqsralliaġivlugich savaktiuruat, Israel-miunuquvlugu, aglaan uyaġagnik miḷḷuuqługu tuqunŋagaat. Tavraasiiḷi, Rehoboam ikuliqami aksraktuuramiñun qimaŋaruq Jerusalem-mun.

¹⁹ Tavra taamna pianiŋman Israel paaqłaŋasuusiŋamaruq David kiŋuniiŋiñun.

²⁰ Israel-miupayaurat tusaagamiŋ Jeroboam utiġnivḷugu Egypt-miñ, aiyugaaŋagaat kasimaqatigisukługu aasii umialliutivlugu Israel-mun. Kisimiŋ maŋŋuqaqtuat Judah-miŋ maliġuaqtauŋarut David kiŋuniiŋiñik.

Shemaiah-m Uqaqtauniŋa God-mun

²¹ Rehoboam tikiññami Jerusalem-mun, ququaŋagaich 180,000-tun iñugiaktigiruat aŋuyaktit maŋŋuqaqtuat Judah-miglu Benjamin-miglu. Aŋuyakkumaalliŋaruq atanniqsimallasitqigukługich salliuruat maŋŋuqatigiich Israel-mi.

²² God-im aglaan uqallautigaa Shemaiah, God-im uqaqtiŋa,

²³ una kiliktuun qaitquvlugu Rehoboam-mun suli iluqaiññun kiŋunġuruanun Judah-mun Benjamin-mullu:

²⁴ Uvva inna Ataniq uqallaktuq: “Pigruġviginagich iḷauraġniatin, iñuŋich Israel. Aisitchi, iluqavsi. Pisuutipkun uvaŋa nalautittuaq piŋaruq.” Iluqaġmiŋ kamagiŋagaat Atanġum piraksriutaa aasii aivḷutiŋ.

Jeroboam-gum Tunutkaa God

²⁵ Umialguruam Jeroboam-gum payaŋaiyaŋagaa nunaaqqiŋa Shechem, qimiġaŋiññiittuaq Ephraim-gum, aasii tamaani iñuuniaġvigiugallakługu. Tavraasii aullaqami payaŋaiyaŋamammigaa nunaaqqiq Penuel.

^26-27 Jeroboam isumaŋaruq, “Umialiqaġniq nuunniaqpalliqsuq kiŋuniiŋiñun David. Ukua uvva, iñuich ikipkautikun aitchuiyyaġumiŋ igluanun Atanġum Jerusalem-mi, uummanmigni iñuich saatqigñiaqtut, Rehoboam-mun umialigmun, aasii tuqulluŋa, aasii utiqłutiŋ Rehoboam-mun, Judah-ġmiu.”

²⁸ Isummatigigaluqamiuŋ, malġugnik aŋusallugnik nuġġaliuŋaruq kaviqsuamik manigmik aasii uqallautivlugich iñuich, “Siġġaġnaqpaitchuq Jerusalem-mugniaġuvsi aŋaiyyusaqtuġlusi. Iñuŋich Israel, uvva god-isi Egypt-miŋŋaurrigiŋarasi!”

²⁹ Inillaŋagaa igḷua kaviqsuamik manigmik aŋusalluq nuġġaliaq Bethel-mun aasii igḷua Dan-mun.

³⁰ Aasii tavra iñuich piḷuusiqiŋarut, aŋaiyyuyyaqtaqłutiŋ Bethel-mullu Dan-mullu.

³¹ Jeroboam nappaiŋamammiuq nanġaiviksranik qimiqqat qaaŋiññi, aŋaiyyuliqsiksraqtuqłuni qitunġaġiiksuaniñ kiŋuniiġiŋitchaŋiññik Levi-m.

Nanġaiñiq Bethel-mi Suksraunġiqsauruq

³² Jeroboam aullaġniiŋamammiuq niqinaqillaaviksramignik akimiaŋanni (15) uvlut tallimat piŋayuanni tatqich, niqinaqiusiatitun Judah-mi. Ikipkaivigmi Bethel-miittuami aitchuiŋamaruq ikipkautitigun kaviqsuamik manigmik savaamun aŋusallumun nuġġaliamiñun, suli Bethel-muktiłługich aŋaiyyuliqsit nanġaiviḷiamiñun.

³³ Aasii akimiaŋanni (15) uvlut, tatqich tallimat piŋayuanni, ilaan uvluq nalunaiqsaġiŋavlugu, Bethel-muŋaruq suli aitchuivḷuni ikipkaivigmi, niqinaqiniqtiŋ quvianġuvigivlugu inillaŋarani iñuŋiñun Israel.