1 Kings 11 - Iñupiatun Mumiksat Uqalugiksuat

Solomon-gum Kamagiŋiñmagu God

¹ Solomon-gum nakuaġisuuŋagaich allaniñ nunaniŋŋaqtauruat aġnat. Nuliaġigaluaġmiḷḷaan pania umialgata Egypt, katinŋammiuq aġnanik Hit-miñ, Moab-miñ, Ammon-miñ, Edom-miñ, suli Sidon-miñ.

² Katinŋagaich Ataniq piraksriiŋagaluaqtillugu Israel-miuguruat katitqataquŋił̣ł̣ugich tamatkuniŋa iñugnik, qanukkii Israel-miuguruanik saatitchiñiaġmata allanun god-inun. Piqpagivlugich sanmipiaġataŋagaich.

³ Solomon nuliaŋaruq 700-nik umialigich paniŋiñik suli 300-nik nukaġaqaŋaruq. Taapkua tunutinŋagaat God-miñ,

⁴ aasii tavra utuqqanaaġuġman aŋaiyyusuusipkaŋagaat allaniñ nunaniŋŋaqtauruat god-iŋiñun. Iḷumutuuŋaiññiqsuq Ataniġmun God-imiñun, aapami David piḷġusikaaŋatun.

⁵ Nanġaġuuŋamagaa Astarte, goddess-ŋa Sidon, suli Molech, naġġunapiaġataqtuaq god-iŋat Ammon.

⁶ Piḷuusiqiŋaruq akiḷḷiġivlugu Ataniq suli iḷumutuuġvigiŋaiññiġaa aapami David piusiatun.

⁷ Iġġimi kivaliñaaŋani Jerusalem nanġaiviḷiuŋaruq Chemosh-mun, naġġunapiaġataqtuamun god-iŋannun Moab, suli nanġaiviksramik Molech-mun, naġġunapiaġataqtuaq god-iŋat Ammon.

⁸ Nanġaiviḷiuqłunisuli iluqaiññun allaniñ nunaniŋŋaqtauruat tuvaaqatigmi tivraġiksautinik ikipkaiviksraŋiññik suli aitchuiviksraŋiññik god-illaaŋiññun.

^9-10 Ataniġmun, God-iŋannun Israel, niptaġvigiŋagaluaqtilluni Solomon malġuiqsuaqługu suli piraksriqł̣ugu nanŋaitquŋił̣ł̣ugu allaniñ nunaniŋŋaqtauruat god-iŋiñik, Solomon-gum kamagiŋaitkaa Ataniq aglaan tunułłuni ilaaniñ. Tavraasii Atanġum qinnaliutiŋagaa Solomon,

¹¹ aasii uqallautivlugu, “Pisaaġivlutin navikapku sivunniuġutiliakkaluan uvamnun suli kamagiŋił̣ł̣ugich piraksriutitka, iḷumutun piiġñiaġiga atanniqsuiñiq iliŋniñ aasii qaiḷḷugu iḷaŋannun atanauraġiraqpich.

¹² Aglaattauq, pisigilugu aapagiran David taamna piñiaŋitkiga ilvich iñuuniġni, aglaan iġñiġiñ umialgupkaqtillugu.

¹³ Suli iluġaan atanniqsuirauniq piiġñiaŋitkiga ilaaniñ; aglaan, unitchiñiaġiga atautchiiñik maŋŋuġiiguruanik pisigilugu kivgaġiraġa David suli Jerusalem pisigilugu, iniqpak piksraqtaaġiŋaraġa uvamnun.”

Solomon-gum Akiḷḷiŋich

¹⁴ Tavraasii Atanġum Hadad, umialguruaniñ qitunġaġiiñiñ Edom-mi, akiḷḷiqsruliqsinŋagaa Solomon-mun.

^15-16 Sivisuruami taamna piŋaiñŋaan, David-gum pisaġimmagu Edom, Joab qaukłiuruaq aŋuyaktiŋiñi tavruŋaŋaruq iḷuviġiaqługich tuqutauruat. Iñuniḷu tavraniinŋarut Edom-mi itchaksrani tatqiñi, aasii tavraniillaġmiŋ tuquttaiŋarut aŋutipayauranik Edom-mi

¹⁷ aglaan Hadad allallu aapami Edom-miut kivgaŋich, qimakłutiŋ Egypt-mun annaŋaruat. (Taimani Hadad miqłiqtuurauŋaruq.)

¹⁸ Midian-miñ aullaqłutiŋ Paran-muŋarut, tavraniasii allat aŋutit iḷḷatiŋarut iliŋiñun. Tavraasii Egypt-mukłutiŋ umialigmun ullautiŋarut, aitchuŋagaa Hadad nunamik igluksrił̣ł̣ugulu suli niqiqaqtiłługu.

¹⁹ Hadad-gum iḷauraaliuŋagaa umialik, aasii umialgum qaiñŋagaa ukuani ilaanun, aniqataa Aġnaq Umialik Tahpenes-gum, Hadad-mun tuvaaqatigitquvlugu.

²⁰ Iġñiqaŋaruq Genubath-mik, iñuguŋagaa aġnam umialgum igluqpagmi, tavrani iñuuqatigivlugich umialgum iġñiŋich.

²¹ Hadad tusaagami Egypt-mi David tuqutilaaŋanik suli Joab qaukłiuruaq aŋuyaktinun tuqunivḷugu, Hadad uqallaktuq umialigmun, “Aullaqtinŋa utiġumauŋa uvaŋa nanmiñiq nunamnun.”

²² “Summan?” umialgum apiġigaa, “Sumik imña aitchuŋaitpigiñ? Tainnamik utiġuliqpich aimmivigñun?” “Naumi, taamna sivuniġiŋitkiga, aglaan aullaqtisiññaŋŋa,” Hadad-gum kiugaa umialik.

²³ God-iptauq Rezon iġñiŋa Eliada-m akiḷḷiḷiutipkaŋamammigaa Solomon-mun. Rezon una qimaŋaruaq umialigmiñiñ, Umialik Hadadezer Zobah-ġmiumiñ,

²⁴ aasii aullarriġuŋaruq iñukitchuanun paaqłaŋasuuruanun aŋuyaktinun. (Taamna piŋaruaq David-gum akiisitaniŋmagu Hadadezer suli tuquttaqługich Syria-ġmiut iḷaaluġisuurani.) Rezon-lu iñuniḷu iñuuniaġiaŋarut Damascus-mun, tavraniasii maliġuaqtiŋisa umialiliutiŋagaat Syria-mun.

²⁵ Rezon akiḷḷiqsruŋaruq Israel-guruanun iñuuniqtutilaaŋani Solomon-gum, iḷaksruutauvluni isumaaluktitchiruamun Hadad-tun.

God-im Unniqsuqłiisaa Jeroboam-mun

²⁶ Allasuli akiḷḷiḷiutiruaq Umialigmun Solomon-mun ilaata iḷaŋat atanauraŋisa, Jeroboam iġñiŋa Nebat, Zeredah-miñ Ephraim-mi. Aakaŋa uiḷgaŋaruaq atiqaqtuaq Zeruah-mik.

²⁷ Quliaqtuaq una paaqłagniŋagun. Solomon-gum kivviiraŋa nuna kivaliñaaŋa Jerusalem-gum suli savaqłaaqługich iniqpaum katchiqpaŋich.

²⁸ Jeroboam una piḷguruaguvluni nutaġauŋaruq, aasii Solomon-gum iḷitchuġigamiuŋ savvaqtutilaaŋanik, qaukłiḷiutiŋagaa iluqaiññun taluqsralliaġivlugich savaktiuruanun maŋŋuqaqtuat Manasseh-miglu Ephraim-miglu.

²⁹ Uvlut iḷaŋanni, Jeroboam iglaupkaqługu Jerusalem-miñ, God-mun uqaqtauruam Ahijah-m Shiloh-ġmium kasuŋagaa apqunmi kisimik taavani suiḷaami nunami. Ahijah atuġniqsuq nutauruamik qaliġuamik.

³⁰ Ahijah-m mattaqługu qaliguaq atuqtani, aligaġaa qulit malġuułługu (12),

³¹ aasii uqallautivlugu Jeroboam, “Quliñik aviktanik piksraġiñ iliŋnun, qanuq Ataniq, God-iŋat Israel-guruat, uqaqtuq iliŋnun, ‘Umialguniq Solomon-miñ piiġñiaġiga, aasii qaiḷḷugich ilignun qulit maŋŋuuruat.

³² Solomon-gum piginiaġaich atautchiich maŋŋuuqatigiiksuat pisigilugu kivgaġa David, Jerusalemlu iniqpak piksraqtaaġiŋaraġa uvamnun iluqaiññiñ maŋŋuuruaniñ Israel-mi.

³³ Tainna piñiaqtuŋa qanukkii Solomon-gum ayyaŋagaaŋa suli aŋaiyyusuusivḷuni allaniñ nunaniŋŋaqtat god-iŋiñun: Astarte, goddess-ŋat Sidon-miut; Chemosh, god-iŋat Moab-miut; Molech, god-iŋat Ammon-miut. Suli maliġuaŋaitkaich pitqutitka, nalaunŋarualiqisuglutiŋ, suli pitquratkalu isivġiutitkalu, aapami David-gum piusikaaŋatun.

³⁴ Aglaan iluqaan umialgun piiġñiaŋitkiga Solomon-miñ, suli umialgupkaġniaġiga iñuuniqtutilaaŋatun. Taamna savaaġiniaġiga pisigilugu kivgaġa David, naliġaaġiŋaraġa suli kamakkutiqaŋaruaq pitquramnullu piraksriqsuutimnullu.

³⁵ Umialguniq piiġñiaġiga Solomon iġñiŋaniñ aasii qaiḷḷugich iliŋnun qulit maŋŋuuruat,

³⁶ Solomon-gum aglaan iġñiŋanun pigipkaġniaġitka atautchiich maŋŋuqatigiiksuat, kiŋunġuruamik kivgamnun David-mun atanniqsuqtiqaġuuyumauq Jerusalem-mi, iniqpagmi piksraqtaaġiŋaramni nanġaiviutquvlugu uvamnun.

³⁷ Jeroboam, umialliutiniaġikpiñ Israel-mun, atanniqsimayumiñaġniaġiñ qanutupayaaq nuna isumaktun.

³⁸ Kamagiuraġniatuaġumŋa, pitqurapkun iñuulutin, iviġaktuaġluŋa kamaksriḷutin piraksriqsuutimnik, piḷġusikaaŋatun kivgaġma David, itqatigisuuniaġikpiñ. Umialiguġniaġikpiñ Israel-mun suli nalupqinaitchuami kiŋuniitin atanniqsimaraulutiŋ piiġuvich, piusiptun David-mun.

³⁹ Solomon piḷuusiqiaŋa pisigilugu tatavsaġniaġitka kiŋuniiŋich David, aglaan taimuŋaaglaanŋił̣aaq.’”

⁴⁰ Aasii tavra Solomon-gum tuqunniataŋagaluaġaa Jeroboam, qimakhuniaglaan Umialigmun Shishak-mun Egypt-miumun suli tavraniiłłuni Solomon tuquniŋanuaglaan.

Solomon Tuqumman

⁴¹ Sunapayauraq Solomon savaaġiŋaraŋa, suli ilaan isumattutaagun, iluqaġmiŋ agliusimarut makpiġaani Inillaaniŋaruat Savaaŋigun Solomon-gum.

⁴² Umialguŋaruq Jerusalem-mi iluqaiññi Israel-guruani malġukipiani (40) ukiuni.

⁴³ Tuqumman iḷuviŋagaat David Iniqpaŋani, aasii iġñiŋa Rehoboam inaani umialiguqłuni.