1 Kings 10 - Iñupiatun Mumiksat Uqalugiksuat

Iññiaqattaaġman Aġnaq Umialik Sheba-miñ

¹ Aġnaq umialiŋa Sheba-m tusaagami qanutun Solomon isumaturuagutilaaŋanik, Jerusalem-muŋaruq iḷitchuġisukłuni qanuq kiuniaqtilaamiñik siġġaġnaqtuanik apiqsruqtaġumiuŋ.

² Qaġġirriŋaruq iñugiaktuanik savaktinik, kakaktiniglu pikukturuanik usiaqtuanik avuuġutinik, uyaġagiksuanik, qanutupiaġataġlu kaviqsuanik manigñik. Kasuġamiuŋ aasii Solomon, apiqsruqtaŋagaa iluqaiññik apiqsruutigisuktamiñik.

³ Iluqaiññun kiggutiksraqaŋaruq; siġġaġnaqpaitchuamik piqaŋaiññiqsut kiuyumiñaisaŋanik.

⁴ Aġnaq umialiŋa Sheba-m tusaaŋagaa Solomon isumattutaa suli tautukługu igluqpiaŋa.

⁵ Qiñiŋagaich niqit niġiraŋich niġġiviŋani, inauraŋiḷḷu atanauraŋisa, igluqpaŋaniḷu savaktiŋich suli savallaġmiŋ annuġaat atuqtaŋich, kivgaŋiḷḷu pamatchiruat ilaanik niqinaqimmata, suli ikipkautitigun aitchuutiŋich Aŋaiyyuvikpagmi. Qaallaummiŋaruq suli aliuġusukłuni.

⁶ Uqallautigaa Umialik Solomon, “Tusaaŋaraġa nunamni ilikkun isumaturuagutilaallu iḷumun inniqsuq!

⁷ Ukpiŋaitchuŋaaglaan qaiganikkama kisian suli uvamnik supayaat tautukługich. Aglaan tusaaŋaiññiġiga avvaŋaunnii; isumattutin umialgutitillu qanutun aŋiłhaapiaġataqtut tusaaŋaramniñ.

⁸ Qanutun ipkua quviasuguutigivat iñuktin; suli qanutun quviasuguutigivat kivgaġiratin, nayuutiugaqtuat tavrani suli naalaġnisuuvlutin isumatuniġni uqalugaaqavich!

⁹ Nanġaqtauli Ataniq God-igiran! Maniraġisimaaġaa qanutun iviġaumagitilaaġnik umialiguqłutin Israel-mun. Nakuaqqutaa ilaan Israel-mun isuitchuamun iłłuni, umialigiliutipkaŋaniġaatin iliŋiññun isivġiitquvlutin nalaunŋaruakun suli pitqiksiġautaitchuakun.”

¹⁰ Qaiñŋagaich Umialigmun Solomon-mun aitchuutiligaani: tallimat ton-gukavsaktuanik kaviqsuanik manigñik aŋipiaġataqtuaniglu avuuġutinik suli uyaġagiksuanik. Aktilaaŋat avuuġutit aitchuutaa ilaanun aŋiłhaapiaġataŋaruq sivuani aitchuusiakaaŋiñiñ. (

¹¹ Hiram-gum umiaqpasalaŋich, qaġġirriŋaruat kaviqsuanik manigñik Ophir-miñ, suli qaġġirrivḷutiglu taavaŋŋa iñugiaktuanik qirugiksaanik suli uyaġagiksuanik.

¹² Solomon-gum atuŋagaa qiruk ayappiġviliuqami Aŋaiyyuvikpagmun suli igluqpagmiñun, aasii-suli nuqaqtilignun atugtuuraliuqłuni suli lyres-nik atuqtuuraqtinun. Akisuruaq qiruk Israel-muurrauŋaruaniñ qaŋapak; tainnatchimik qiñiġnatqigataŋaitchuq.)

¹³ Umialik Solomon-gum aitchuŋagaa aġnaq umialiŋa Sheba-m supayauranik apiqsriaġiraŋiñik, allattauq aitchuutikaaguruat aitchulluatautigianikkaluaqługi ilaanun. Tavraasii utiŋaruq kivgaġiraniḷu nunaŋanun Sheba-m.

Solomon-gum Suġaliŋich

¹⁴ Ukiutuaġaġimman Umialik Solomon akuqtuisuuŋaruq iñuiññaq tallimat (25) tons-tun uqumaisigiruanik kaviqsuanik manigñik,

¹⁵ iḷagigaluaġnagich maniññaktaaŋich tauqsiġñiaqtiniḷḷu simmiqsuqtiniḷḷu, suli umialipayaaŋiñiñ Arabia-ġmiut suli kavanaŋiññiñ nunam Israel-miut.

¹⁶ Solomon 200-nik akkiaġausiuŋaruq aasii qaaliqsiłługich akimiaq (15) pounds-tun uqumaisigiruanik kaviqsuamik manigmik.

¹⁷ Mikiłhaaqtuanik-suli 300-nik akkiaġausiuŋaruq, qaaliḷḷaavlugich sisamatun-kavsak pounds-tun uqumaisigiruamik kaviqsuamik manigmik. Inillaktinŋagaich iluqaisa akkiaġautiliat Igluqpaŋanun Forest Lebanon-gum.

¹⁸ Aquppiutaqpaliuqtitchiŋammiuq. Iḷaŋa matuŋavluni tuugaamik aasii iḷaŋa matuŋavluni kaviqsuamik manigiksuamik.

¹⁹ Aquppiutaqpak itchaksranik tunmiġaqaŋaruq, tunuani aasii aqvaluaqtaamik qaaqqaqhuni. Aasii saniġaŋigñi tallik tunŋaviŋiksa lion-qaqłuni, lion-liat isullaaŋiñi iłłutiŋ tunmiġallaam.

²⁰ Qulit malġuk lion-git makitaŋarut itchaksrani tunmiġautani, aquani atausiq lion illaavłuni. Aquppiutaqaŋaitchuq tainnasimik sumi allami umialguviuruami.

²¹ Iluqaġmiŋ Solomon-gum qallugauraŋich savaaguŋarut kaviqsuamik manigmik, suli iluqaġmiŋ niġiñiutiŋich Hall of the Forest of Lebanon-miittuat savaaguŋammiut kaviqsuamik manigmik. Qatiqtuamik manigmik atuŋaiññiqsut, akisuruaguŋiñŋavluni Solomon uvluŋiñi.

²² Umiaqpasalaqaŋamaruq Hiram-gum umiaqpaŋiñik. Piŋasut ukiut pianigaġimmata umiaqpaŋich utiġaqtut, qaġġirrivḷutiŋ kaviqsuanik manigñik, qatiqtuanik manigñik, tuugaanik, apes-nik suli monkey-ñik.

²³ Umialik Solomon umialgułhaaŋaruq isumatułhaaqłuniḷu allaniñ umialiuruaniñ,

²⁴ aasii nunapayaamiittuat ullautiyumaŋarut suli tusaayaqtuaġlutiŋ isumattutaanik God-im aitchuutaanik ilaanun.

²⁵ Qaipayaaqtuam qaġġirrisuuŋamagaat aitchuutimignik—sunik piḷianik qatiqtuamik manigmik suli kaviqsuamik manigmik, qaliġuanik, satkunik, avuuġutinik, tuttuqpagnik, suli kakaktinik. Tainnaviiññaq piraġniqsut ukiutuaġaġimman.

²⁶ Solomon piqaŋamammiuq 1,400-nik aksraktuuranik, suli 12,000-nik aŋuyaktit tuttuqpaŋiññik. Iḷaŋich Jerusalem-miitinŋagaich aasii iḷaŋich inillakługich siamiłługich allanun iniqpagnun.

²⁷ Umialgupkaqtillugu qatiqtuaq manik Jerusalem-mi uyaġagruiññaqtun inŋaruq, suli cedar-t qiruich iḷaŋaniiqł̣utiŋ sycamore-ġruiññatun qimialuŋiñi Judah-m.

²⁸ Umialgum piriŋisa aŋalatchuugaich allaniñ nunaniñ qaipkaqtaŋich tuttuqpaich Egypt-miḷḷu Cilicia-miḷḷu,

²⁹ suli aksraktuurat Egypt-miñ. Hit-miullu Syria-miullu umialiŋich tuttuqpaqaqtitchuuŋagaich aksraktuuraqaqtiłługiḷḷu, tuniuqqaqługich aksraktuurat 600-tullaa iñugiaktigiruanik maniuranik qatiqtuanik manigñik atausimun suli tuttuqpaich 150-tullaavlugich.