1 John 5 - Iñupiatun Mumiksat Uqalugiksuat

Akimaruagurugut

¹ Iñupayaaq ukpiqtuaq Jesus Christ-gunivḷugu Tiliraŋa God-im, miqłiqtuġigaa God-im, suli iñupayaaq piviuttaqsriruaq Aapamik piviuttaqaġmiuq miqłiqtuanik.

² Uumuuna iḷisimarugut piviuttaqsrisilaaptiŋnik miqłiqtuŋiñik God-im, piviuttaġikaptigu God suli kamagivlugich pitquraŋi.

³ Aasii piviuttaqsriñiq God-mik sivuniqaqtuq inna, uvagut kamagilugich pitquraŋi. Aasii pitquraŋi siġḷiġnaitchut.

⁴ Kialiqaa God-im miqłiqtuata akiiḷiyumiñaġai ikł̣igutchaktinniaġutit pipkaġniutauruat nunam iñuŋisun. Aasii akimmatigisuugikput ukpiġutiqaqtuiññaqłuta Ataniġmun Jesus Christ-mun.

⁵ Kiuva akiiḷiññiktuaq nunam iñuŋisa piḷġusiŋiñik? Taamnauruq ukpiqtuaq Jesus Iġñiġinivḷugu God-mun.

Ukpiġnaqsiḷġutit Jesus Christ-kun

⁶ Jesus Christ taamnauruq qaiŋaruaq aasii paptaiqsauvluni imiġmik suli maqipkaqługu auni tuquvluni. Qaiŋaitchuq imiłhiñakun, aglaan imikullu aukullu. Aasii Ilitqusiġiksuam ilaan ukpiġnaqsiḷiŋagaa taavruma iḷumun itilaaŋa, qanuq Ilitqusiġiksuaq iḷumun ittuaguruq.

^7-8 Ilitqusiġiksuaġlu imiġlu auglu taapkua piŋasut atirut iḷitchuġipkaiñiġmiŋni.

⁹ Ukpiġillaguptigik iñuich quliaqtuaŋich, God-im quliaqtuaŋa ukpiġnałhaaqtuq. Tavraasii taapkunuuna piŋasutigun God-im nalupqinaiŋagaa Jesus inmiñun Iġñiġitilaaŋanik.

¹⁰ Iluqaġmiŋ ukpiqtuat God-im uqaluanik Iġñiġmigun iḷumiŋni iḷisimarut taavruma iḷumun itilaaŋanik. Kialiqaa ukpiġiŋitkumiuŋ taamna, ilaan sagluturualigaa God, qanuq ilaan ukpiġiŋitkaa God-im uqalua Iġñiġmigun.

¹¹ Aasiuvva God-im uqallautiŋagaatigut ilaan iñuupkaġniaġnivḷuta isuitchuamun, aasii taamna iñuggun Iġñiŋaniittuq.

¹² Kiñaliqaa God-im Iġñiŋan iñuuvigikkaŋa iñuuniaqtuq isuitchuamun. Kiñaliqaa Iġñiġum iñuuvigiŋisaŋa iñuuniaŋitchuq isuitchuamun.

Iñuggun Isuitchuaq

¹³ Tuyuqtuŋa taapkuniŋa ilivsiññun ukpiqtuanun Iġñiŋanun God-im, iḷisimatquvlusi piqaqtilaavsiññik iñuggunmik isuitchuamik.

¹⁴ Una pisigivlugu attaġiŋitkikput ilaa, apiqsrikapta supayaamik nalaułługu pisuutaa tusaagaatigut.

¹⁵ Aasii iḷisimagupta tusaallatilaaptiŋnik apiqsripayaaqapta, iḷisimarugut aitchuusiaqaġniaqtilaaptiŋnik apiqsriaptiŋnik ilaaniñ.

¹⁶ Kialiqaa tautukkumiuŋ aniqatini piḷuksiruaq aŋaiyyutiraksraġigaa God-mun suliqutigiŋaiqulugu aasii God-im suliqutigiŋaiġñiaġaa itqaumayumiñaiġḷugu piḷuutaa, ami piḷuksisiqaŋitpan piḷuunmik nalupqinaitchuamik tuqqutauyumiñaġluni. Iñuk piḷuksisiqaġumiñaġmiuq piḷuunmik nalupqinaitchuamik tuqqutiksramun. Uqallautiŋitkivsi ilivsiññun aŋaiyyutigitqulugu taamna God-mun.

¹⁷ Iluqani killuliqiniq piḷuutaugaluaqtuq, piḷuutiqaġmiuq tuqqutauyumiñaitchuanik.

¹⁸ Iḷisimarugut kiñaliqaa God-im miqłiqtua piḷuusiqiugaalaitchuq, qanuq Iġñiŋata God-im qaunagigaa, aasii Tuunġaum anniġumiñaitkaa.

¹⁹ Iḷisimarugut God-mun pigitilaaptiŋnik, aasiiḷi iluqaisa nunam iñuŋi atanniqsimagai Tuunġaum.

²⁰ Aasii iḷisimarugut Iġñiŋa God-im qaiŋaruq aasii kaŋiqsipkaqłuta iḷitchuġiyumiñaqsivḷugu iḷumun ittuaq God. Aasii uvagut atausiŋŋuqatauŋarugut iḷumun ittuamun God-mun, Iġñiŋanullu Jesus Christ-mun. Ilaa iḷumun ittuaq God, suli isuitchuamun iñuggutauruaq.

²¹ Miqłiqtutkaa, iḷaksianagich iḷumun inŋitchuat god-it.