1 John 4 - Iñupiatun Mumiksat Uqalugiksuat

Ilitqusiġiksuaġlu Iḷumun Inŋitchuaġlu Ilitqusiq

¹ Piviuttaġirauruasii, ukpiġinagu iñupayauraq pimaaqtuqtuaq Ilitqusiġiksuaqaġnivḷuni, aglaan naipiqtuqsigik iḷitchuġisaġlugich ilitqusiq pigikkaŋat God-miñ qaisilaaŋanik. Qanuq iñugiaktuat uqaqtauŋŋuaqtuat God-mun aullaŋarut sumulliqaa.

² Uumuuna iḷisimagiksi Ilitqusiġiksuaŋa God-im: Iñupayaaq quliaqtuaqaqtuaq Jesus Christ-mik qaiŋanivḷugu timiqaqłuni piqaqtuq Ilitqusiġiksuamik qairuamik God-miñ.

³ Aasii iñupayaaq quliaqtuaqaŋitchuaq Jesus-mik tainna, piqaŋitchuq Ilitqusiġiksuamik God-miñ. Taamna ilitqusiġigaa akiḷḷiḷiqsuutiruam Christ-mun, tusaaŋakkaqsi qaiyumaaġnivḷugu, aasii paŋmapak nunam iñuŋiñiitaniŋaruq.

⁴ Miqłiqtutkaa, God-im pigigaasi, aasii akiiḷiŋagisi uqaqtauŋŋuaqtuat God-mun, qanuq Ilitqusiġiksuaq iḷuvsiññiittuaq suaŋałhaaqtuq ilitqutchimiñ ittuamiñ nunam iñuŋiñi.

⁵ Iliŋich nunam iñugivlugich uqautiqaqtut kisiŋiññik mattuma iñuutchim piŋiñik, suniglu iviġaumanaqtuanik nunam iñuŋiñun. Tainnainmata nunam iñuŋisa naalaġnigaich.

⁶ Uvagut God-im pigigaatigut. Kiapayaaq iḷisimaruam God-mik naalaġnigaatigut, aasiiḷi kialiqaa God-im pigiŋisaŋan naalaġniŋitkaatigut. Taapkunuuna iḷitchuġigikput allagiiksilaaŋak Ilitqusiġiksuavlu iḷumun ittuam ilitqusiatalu killukuaŋaruam.

God Piviuttaqqutauruq

⁷ Piviuttaġirauruasii, piviuttaqqutita avanmun qanuq piviuttaqqun God-miŋŋaqtauruq, aasii kiñaliqaa tainnatun piviuttaqqutiqaqtuaq iḷisimanaqtitkaa miqłiqtuutilaani God-mun, iḷisimagaalu God.

⁸ Iñuk piviuttaqqutaitchuaq naluruq God-mik, qanuq God piviuttaqqutauruq.

⁹ Innauvva piviuttaqqutaa God-im salapqiŋaruq akunnaptiŋni, God-im tilivḷugu Iġñitualuni nunamun, uvagut iñuutquvluta ilaagun.

¹⁰ Uvva innaittuq piviuttaqqun, piviuttaġiŋaitkaluaġikput God aglaan ilaan piviuttaġiŋaniġaatigut suli tilivḷugu Iġñini tuqutquvlugu ilaan suliqutigiŋaiġukługich itqaumayumiñaiġḷugich piḷuutivut.

¹¹ Piviuttaġirauruasii, God-im tainnatun piviuttaġitigiŋaniqpatigut, piviuttaqqutiruksraugaluaġmiugut avanmun.

¹² Iñuum qaŋaunnii tautuŋaitkaa God, aglaan piviuttaqqutigupta avanmun, God iñuuruq iḷuptiŋni piviuttaqqutaalu naamasiŋaruq iḷuptiŋni.

¹³ Uvva nalupqisuŋirrutiksraqput atausiŋŋuqatigiŋatilaaŋanik God suli ilaa iñuutilaaŋanik iḷuptiŋni, ilaan iḷiŋavlugu Ilitqusiġiksuani iḷuptiŋnun.

¹⁴ Aasii tautuŋakkaqput quliaqtuaġigikput Aapa tilisiŋanivḷugu Iġñiġmiñik Annaurrigipkaqsaqługu iñuŋnun.

¹⁵ Kialiqaa quliaqtuaġigumiuŋ Jesus Iġñiġiniḷugu God-mun, God iñuuruq iḷuani, ilaallu God atausiŋŋuqatiŋagaa.

¹⁶ Tavraasii iḷisimagikput ukpiġigikpullu God-mun piviuttaġitilaaqput. God piviuttaqqutauruq, iñuk aasii piviuttaqsriruaq atausiŋŋuqatauruq God-mun, suli God iñuuruq iḷuani.

¹⁷ Tainnauvva piviuttaqsripkaqtaurugut God-im piviuttaqsrisiatun, tavraasii attaqsrautiqaġumiñaitchugut uvluani isivġiġvium, qanuq iñuuniqput mattumani nunami inmiuq Christ iñuusiġiŋakkaŋatun. Sivuuqqataitchuq piviuttaqsriruaq.

¹⁸ Piviuttaqsrikapta God-im piviuttaqsrisiatun, ilaa sivuuġagiŋitkikput. Tavraasii iñuk sivuuqqatiqaqtuaq piviuttaqsriŋitchuq God-im piviuttaqsrisiatun, qanuq iqsisiqaqtuq suli God-mun tatavsaġniaġnivḷuni.

¹⁹ Piviuttaqsrirugut qanuq God-im piviuttaġiqqaaŋagaatigut.

²⁰ Kiñaliqaa uqallakkumi, Piviuttaġigiga God, aasii uumigilugu aniqatini, sagluruq, qanuq iñuk piviuttaqsriŋitchuaq aniqanmiñik tautuŋakkaġmiñik, qanuġluni piviuttaqsriyumiñaitchuq God-mik tautuŋaisamiñik.

²¹ Aasiuvva pitquraksriusiaqput Christ-miñ, iñuuvguuq piviuttaġiniġumiuŋ God piviuttaġiraksraġimmigaa aniqatini.