1 John 3 - Iñupiatun Mumiksat Uqalugiksuat

¹ Qanutun Aapam piviuttaġitigiŋaniġaatigut. Piviuttaqqutiqaqpaił̣ł̣uni taggisiqaqtitkaatigut God-im miqłiqtuŋiñik, aasii miqłiqtuġipiaġaatigut. Nunam iñuŋi puttuqsriḷaitchut God-mun miqłiqtuġitilaaptiŋnik qanuq iliŋisa naluvlugu God.

² Piviuttaġirauruasii, paŋmapak God-im miqłiqtuġigaatigut. Salapqiŋaitchuq suli suuniaqtilaaqput, aglaan iḷisimarugut Christ salapqiqpan iḷiñiaqtugut ilaatun, qanuq tautugniaġikput irrusiatun.

³ Aasii iñupayaaq qiñiġummatiqaqtuaq Christ-mik piḷuutaiññiaqtuaguruq inmiñik Christ-tun piḷuutaitchuatun.

⁴ Iñupayaaq piḷuusiqiruaq pitquraiḷaqtuq qanuq piḷuun kamaksriŋirrutauruq pitquranik.

⁵ Iḷisimarusi Christ salapqiŋatilaaŋanik piiġiaqługich piḷuutivut, aasii ilaa piḷuutaitchuq.

⁶ Kiñaliqaa atausiŋŋuqatauŋaruaq Christ-mun piḷuusiqiugaŋitchuq, aasii iñuk piḷuusiqiugaqtuaq tautuŋaitchuq ilaanik, iḷitchuġiŋaitkaalu qaŋaunnii.

⁷ Miqłiqtuuraat, iñuŋmun sagluqipkaġnasi. Iñuk nalaunŋarualiqiugaqtuaq nalaunŋaruq, Christ-tun nalaunŋaruatun.

⁸ Iñuk piḷuusiqiugaqtuaq Tuunġaum pigigaa, qanuq tuunġaq piḷuusiqiŋaruq aullaqisaamiñqaŋa. Iġñiŋa God-im salapqiŋaruq suksraunġiġukługich savaaŋi Tuunġaum.

⁹ Iñuk miqłiqtuliutiŋaruaq God-mun anitqikł̣uni piḷuusiqiugaalaitchuq, qanuq God-im irrusia iḷuaniittuq, aasii ilaa piḷuusiqiugaaġumiñaitchuq qanuq God-mik aapaqaqtuq.

¹⁰ Uumuuna iḷisimanaġumiñaqtut kisut miqłiqtuġitilaaŋat God-mun, suli kisut miqłiqtuġitilaaŋat Tuunġaġmun. Kiñapayaaq nalaunŋarualiqiugaŋitchuaq piviuttaqsriŋitchuaġlu aniqanmiñik God-im miqłiqtuġiŋitkaa.

Piviuttaqqutisitchi Avanmun

¹¹ Qanuq una uqaluk tusaaŋagiksi ukpiliqavsiqaŋa, uvagut piviuttaqqutiruksrauvluta avanmun.

¹² Ittuksrauŋitchugut Cain-tun pigiitchuamiñ piruatun iñuktaġivlugu aniqatini. Aasii summan iñuktaġiŋavauŋ? Iñuktaġiŋagaa ilaan savaani pigiił̣ł̣utiŋ aasii aniqataan nalaunŋaruaguvlutiŋ.

¹³ Aniqatiit, allayuaġnasi nunam iñuŋisa uumigikpasi.

¹⁴ Piviuttaġiguptigik ukpiqtuaguqativut iḷisimanaqsigikput annaurrauŋatilaaqput tuqqunmiñ iñuullasivḷuta isuitchuamun. Kiñaliqaa piviuttaqsriŋitchuaq tuquŋaruqsuli.

¹⁵ Kiñapayaaq uumikłiqsuaq aniqanmiñik iñuaqtauruq, aasii iḷisimammiusi iñuaqti iñuggunmik isuitchuamik iḷumiutaitchuq.

¹⁶ Iḷisimagikput piviuttaqqun uumuuna, Christ aitchuutigiŋagaa iñuggutini tuquvluni anniqsuqsaqłuta, uvaguttauq aitchuiruksraummiugut iñuggutiptiŋnik anniqsuqsaġlugich aniqatiivut.

¹⁷ Kiñaliqaa suġalliruaq aasii iḷitchuġivlugu aniqatini piiḷḷiuqtuaq, aasii nagliksrautaił̣ł̣uni ilaanun, pimaaqtuġumiñaitkaa God-im piviuttaqqutaa iḷumiñi inniḷugu.

¹⁸ Miqłiqtutkaa, piviuttaqsriñata uqalułhiñami, aglaan taŋŋipiaġlugu piḷġusikun.

Attaqsrautairrun God-mun

¹⁹ Tainna pigupta iḷisimaniaqtugut iḷumun ukpiqtuagutilaaptiŋnik, attaqsrautiqaġumiñaitchugullu God-im sivuġaani.

²⁰ Irrusiqaġaluaġuptaunnii pasikkunmik iḷuptiŋni attaqsraŋirrutiqaġumiñaqtugut ilaan sivuġaani, qanuq God kamanałhaaqtuq isumaptiŋni pasikkutiniñ, supayauramik iḷisimavluni uvaptigun.

²¹ Piviuttaġirauruasii, isumaptiŋni pasikkunmik piitkupta, attaqsrautaitchugut sivuġaani God-im,

²² aasii akuqtuisuurugut ilaaniñ supayaamik apiqsriaptiŋnik, qanuq kamagigivut pitquraŋi suli pivḷugu suna iviġaumanaqtuaq ilaanun.

²³ Aasiuvva ilaan pitquraŋa, uvagut ukpiquvluta Iġñiġmiñun Jesus Christ-mun suli piviuttaqqutiluta avanmun, kamagilugu Christ pitqurriutaa uvaptiŋnun.

²⁴ Iluqaġmiŋ kamaksriruat God-im pitquraŋiñik atausiŋŋuqatigimaaġaat God, suli God iñuuruq iliŋiññi. Suli uumuuna iḷisimarugut ilaan iñuutilaaŋanik uvaptiŋni, Ilitqusiġiksuaq iḷiŋavlugu ilaan iḷuptiŋnun.