1 John 2 - Iñupiatun Mumiksat Uqalugiksuat

Christ Ikayuqtikput

¹ Miqłiqtuuratkaa, tuyuġivsi taapkuniŋa piḷuksitquŋił̣ł̣usi. Aglaan kiñapayaaq piḷuksiñiqpan, qiññuaqtuurriqaqtugut Aapamun, Jesus Christ-mik nalaunŋaruamik.

² Aasii God-im suliqutigiŋaiġumiñaġai itqaumayumiñaiġḷugich piḷuutivut pisigilugu Christ inuaŋaitchuaguvluni akiḷiutauŋaruaq piḷuutiptiŋnun tuqukami. Ilaa tuquŋaruq pisigisuŋaġnagich uvagułhiñaq piḷuutivut, aglaallu piḷuutiŋich iñupayaurat.

³ Aasii kamagiguptigik God-im pitquraŋi, nalupqisukkumiñaitchugut iḷisimatilaaptiŋnik ilaanik.

⁴ Iñuk uqaqtuaq iḷisimaniḷugu God aasii kamaksriŋił̣ł̣uni pitquraŋiñik sagluruaguruq, suli God-im iḷumun ittuaŋa ukpiġiŋitkaa.

⁵ Aglaan kialiqaa kamagituiññaqpagich God-im uqaluŋi ilaan piviuttaġipiallakkaa God, aasii tainnainman nalupqisukkumiñaitchugut iñuutilaaptiŋnik ilaa atausiŋŋuqatigimaaqługu.

⁶ Iñuk uqaqtuaq ilaa iñuunivḷuni atausiŋŋuqatigimaaqługu God iñuutuiññaqtuksrauruq Jesus Christ iñuusipiaġataŋatun.

Nutauruaq Pitquraq

⁷ Piviuttaġirauruasii, tuyuŋitkivsi nutauruamik pitquramik, aglaan utuqqauruamik iḷisimaŋakkavsiññik ukpiliqqaaqavsi. Taamna utuqqauruaq pitquraq quliaqtuaguruq tusaaŋakkaqsi.

⁸ Aasiivsauq pitquraq tuyuutigikkaġa ilivsiññun nutaummiuq, suli iḷisimanaqtuq God-mun iḷumun ittuaġitilaaŋanik Christ iñuusiagun, ilivsiḷuami iñuusivsigun. Qanuq taaqtuaq qaaŋiqsaiññaqtuq aasii iḷumun qaummaq qaummaġiksianiktuq.

⁹ Iñuk uqaqtuaq qaummaġmiinnivḷuni uumikłiḷḷaġmi aniqanmiñik taaqtuamiittuq-suli.

¹⁰ Iñuk piviuttaqaqtuaq aniqanmiñik nayuutiruq qaummaġmi, aasii sumik piitchuq inmiñi aniqanmi piḷuksisigiyumiñakkaŋanik.

¹¹ Aglaan iñuk uumikłiqsuaq aniqanmiñik taaqtuamiittuq, suli pisuaqtuq taaġmi, suli naluruq sumun iglautilaamiñik, qanuq taaqtuam tautuksipkalaitkaa.

¹² Miqłiqtuuraat, tuyuġivsi qanuq piḷuutisi suliqutigiŋaiqsaurut itqaumayumiñaiqł̣ugich pisigivlugu Christ piraŋa.

¹³ Aapauruasii, tuyuġivsi qanuq iḷisimagiksi ilaa ittuaq aullaqisaamiñqaŋa. Nukatpiat, tuyuġivsi qanuq akiiḷiŋagiksi Tuunġaq.

¹⁴ Miqłiqtuut, tuyuŋagivsi qanuq iḷisimagiksi Aapa. Aapauruasii, tuyuŋagivsi qanuq iḷisimagiksi ilaa ittuaq aullaqisaamiñqaŋa. Nukatpiat, tuyuŋagivsi qanuq suaŋarusi, suli uqalua God-im nayuutiruq iḷuvsiññi, suli akiiḷiŋagiksi Tuunġaq.

¹⁵ Piviuttaġinagu suuramikunnii nunam iñuŋisa piḷġusiat. Kialiqaa piviuttaġikpagu nunam iñuŋisa piḷġusiat, piviuttaġiŋitkaa Aapa.

¹⁶ Qanuq supayaat nunam iñuŋisa piḷġusiġikkaŋich sut piḷuksisuguuruam timim kipiġniuttaġikkaŋi, sut iñuich qiñikkaŋich pigiyumavlugiḷḷu, suli supayaat mattumani nunamiittuat iñuich kamasaaġutigikkaŋich, nalliŋich unnii qaisauŋaitchut Aapamiñ. Iluqaġmiŋ qaisaurut nunam atanauraŋaniñ.

¹⁷ Nunam iñuŋisa piḷġusiŋich kipiġniuttaġikkaŋiḷḷu piiġumaaqtut, aglaalli iñuk kamaksriruaq God-im pitqutaanik iñuuniaqtuq isuitchuamun.

Akiḷḷiḷiqsuutiruaq Christ-mun

¹⁸ Miqłiqtutkaa, piviksram isua qalliruq, aasii tusaaŋarusi akiḷḷiḷiqsuutiruaq Christ-mun qaiñiaġnivḷugu. Tavra paŋmapak iñugiaktuat akiḷḷiḷiqsuutiruat Christ-mun iñukpallianiŋarut. Taamna pisigivlugu iḷisimarugut piviksram isua qallisilaaŋanik.

¹⁹ Tamatkua iñuich piqataupiaġlutiŋ uvagut iñuptiŋnun piŋaitchut, aasii tainnaiłłutiŋ qimautiŋarut uvaptiŋniñ. Piqataupiaġumiŋ uvaptiŋnun, nayuġumiñaŋagaluaġaatigut. Tavra qimaŋagaatigut iḷisimanammaġiksitquvlugu nalliat unnii piqataupiaŋisilaaŋanik uvaptiŋnun.

²⁰ Aglaan Christ iḷiŋagaa Ilitqusiġiksuaq iḷuvsiññun, aasii taamna pisigivlugu iluqasi iḷisimagiksi iḷumun ittuaq.

²¹ Tuyuġivsi nalurualigaluaġnasi iḷumun ittuamik, qanukkii iḷisimagiksi taamna, aasii iḷisimammigiksi sagluuruaq iḷaitchuq iḷumun ittuamik.

²² Kiña sagluturuaguva? Iñuk ayyairuaq Jesus Christ-guniŋanik, God Tiliraŋanik. Tavra iñuk akiḷḷiḷiqsuqtuaq Christ-mik ayyairuq Aapamik Iġñiġmiglu.

²³ Kiñaliqaa ayyairuaq Iġñiġmik ayyaimmiuq Aapamik. Iñuk akuqtuiruaq Iġñiġmik akuqtuimmiuq Aapamik.

²⁴ Tavraasii ukpiqsimaaġniapiaġitchi kamagilugulu tusaagayuŋaraqsi ukpiliqqaaqavsi. Tainna piguvsi, ataramik atausiŋŋuqatigimaaġniaġiksi Iġñiq Aapalu.

²⁵ Aasiuvva unniqsuqłiiŋagaatigut iñuggunmik isuitchuamik.

²⁶ Tuyuqtuŋa ilivsiññun sivuniġivlugich tamatkua sagluqinnikkumaruat ilivsiññik,

²⁷ aglaan Christ iḷiŋagaa Ilitqusiġiksuaq iḷuvsiññun. Sivisutilaaŋatun Ilitqusiġiksuam inniŋan iḷuvsiññi iḷisaurrituŋitchusi iñulimaamik. Qanuq Ilitqusiġiksuam puttuqsrisiqaqtitaaġaasi sum nalaunŋatilaaŋanik, suli iḷisaurrutiŋi iḷumun ittuagurut sagluuŋitchut. Tavraasii kamagiugaqsigik Ilitqusiġiksuam iḷisaurrutiŋi aasii atausiŋŋuqatigimaaġlugu Christ.

^28-29 Tavraasii miqłiqtutkaa, iñuutuiññaġitchi atausiŋŋuqatigimaaġlugu Christ, attaqsrautaitchumausi niptaqpan, iriqtuġumaŋiḷḷusi ilaaniñ pisigilugu kanŋusugniqsi Uvlumi qaġġiviani. Iḷisimavlusi Christ nalaunŋaruagutilaaŋa nalupqisukkumiñaitchusi kiñaliqaa nalaunŋarualiqiri aniŋatilaaŋanik ilaaniñ.