1 John 1 - Iñupiatun Mumiksat Uqalugiksuat

Uqaluk Iñuunaqtuaq

¹ Tuyuġivsi sivuniġivlugu taggisiqaqtuaq Uqaluŋmik iñuunaqtuamik. Ilaa inŋaruq aullaqisaamiñqaŋa. Uvagut tusaaŋagikput tautuŋagikpullu naipiqtuqługu isumalaaġutigivlugu, suli aksiukkayukługu argaptiŋnik.

² Taamna iñuk iñukpalliġman tautuŋagikput, aasii quliaqtuaġutivlusi ilaanik iñuuruamik isuitchuamiñ, itqatauŋavluni Aapamun, aasii iḷitchuġipkaqługu uvaptiŋnun.

³ Taamna tautuŋakkaqput tusaaŋavlugulu quliaqtuaġigikpulli ilivsiññun piqasiutitquvlusi uvaptiŋnun iḷammiuġunmi Aapamun pigikkaptiŋni Iġñiŋanullu Jesus Christ-mun.

⁴ Aasii tuyuutigigikput taamna quviasuutikput naamatquvlugu.

God Qaummatauruq

⁵ Uvva uqaluk uvagut tusaaŋakkaqput Iġñiŋaniñ aasii quliaqtuaġigikput ilivsiññun, God qaummataunivḷugu suli ilaani taaqtuagitchuq suuramikunnii.

⁶ Uqaġupta piqaġniḷuta iḷammiuġunmik ilaanun iñuuniaqtuiññallapta piḷuunmi taaqtuamiinmatun, saglurugut, suli iñuuŋitchugut nalaullugu iḷumun ittuaq.

⁷ Aglaan iñuuniaqtuagugupta qaummaġmi, ilaatun qaummaġmiittuatun, piqaqtugut iḷammiuġunmik avanmun, suli auŋata Jesus ilaan Iġñiŋan salummaqsimaaġaatigut piḷuutipayaaniñ.

⁸ Uqaġupta piḷuutaiññiḷuta, sagluqirugut uvaptiŋnik, suli God-im iḷumun ittuaŋa ukpiġiŋitkikput.

⁹ Aglaan quliaġuptigik piḷuutivut God-mun, ilaa ukpiġiyumiñaġikput qanuq ilaa pisuuruq nalaunŋaruanik, ilaan suliqutigiŋaiġñiaġai itqaumayumiñaiġḷugich piḷuutivut, suli salummaġluta iluqaaniñ killuliqutiptiŋniñ.

¹⁰ Uqaġupta piḷuksiŋaiññiḷuta, God saglurualigikput, suli uqalua ukpiġiŋitkikput.