1 Corinthians 9 - Iñupiatun Mumiksat Uqalugiksuat

Tilirauruam Ataniġnaqutiŋi

¹ Nalupqinaitchuamik ukpiqtuaguruŋa atanġiqsitauŋaruaq. Atanġum tiliraġigaaŋa allatituttauq tilirauŋaruatun, qanuq tautuŋagiga Jesus Ataniqput, suli ilivsi ukpiqtuaġuŋarusi Ataniġmun uvaŋa alġaqsruiñipkun.

² Allat iñuich uqaġaluaqpata tilirauŋiññiḷuŋa, tiliraupiaŋaniraksraġigivsiŋa, qanuq ukpiġutiksi ukpiġnaqsiḷġutauruq Ataniġmun tiliŋatilaamnik alġaqsruitquvluŋa tusaayugaaġiksuamik.

³ Taavrumiŋa kiggutiqaġuuruŋa iñuŋnun arguasuguuruanun Ataniġmun tiliŋatilaamnik.

⁴ Nalaunŋaruq allatuttauq iñuktitun pamataugupta.

⁵ Nalaunŋammiuq uvaptiŋnun tuvaaqasiqpatigut nuliaguruam iglauraġikapta, tainnatuttauq allatitun tilirauruatun, Ataniptalu aniqatiŋisun, Cephas-tullu.

⁶ Kisimñuk Barnabas-lu uvaŋalu savaktuiññaġlunuk iñuggutiqaqtuksrauviñuk, pamatchiugaqtillusi allanik iñuŋnik? Tainna piraksraġiŋitkiptiguk.

⁷ Iñupayaaq akiḷiiḷaitchuq aŋuyaktiġuqsaqami. Suli iñupayaaq nautchirriikami grapes napaaqtuayaaŋiññik niġiḷaunnani siiġñiaŋiññik piḷaitchuq. Suli iñupayaaq pamiqsaaqaqtuaq immuliviginiaġnagich piḷaitchuq. Tainnatulli iñuk tilirauruaq alġaqsruitquvlugu pamataksraġiŋitkaluaġmiuq inmiñik.

⁸ Uvaŋa, iñugruiññauruaŋaa, taamna tainna uqallausiġivigu? Naumi. Tainna pitqurat iḷisaurrimmiut.

⁹ Pitqurani aitchuutauŋaruani Moses-mun aglausimaruq inna, “Sigguġutituġniaŋitkiñ qimukti tunmaqtuaq palauvaksranun amiġaiyaivḷuni palauvaksranik.” Isumavisi God isumaaluuttaqaġasugalugu qimuktinik kisianik tainna uqallakami?

¹⁰ Naumi. Uvagut isumaaluuttaġiłhaaŋagaatigut, qanuq iñuk nunaliqiruaq savaktuksrauruatun niġiugluni iḷaŋiutiniaqtilaamiñik palauvaksranik, tainnatulli iñuktauq salummairuaq palauvaksranik savaktuksraummiuq niġiugilugu iḷaŋiutiniaqtilaani.

¹¹ Uvagut alġaqsruiŋakapta tusaayugaaġiksuanik ilivsiññun aasii ilivsi ukpiqtuaġuqłusi, pamataksrauŋitpisa?

¹² Allat iñuich qasiḷiaġillakparruŋ pamarrusiaqaġnik ilivsiññiñ, nalaunŋałhaaġaluaqtuq uvagut qasiḷiaġiguptigu pamarrusiaksraq ilivsiññiñ. Aglaan qasiḷiaġiŋaitkikput taamna ilivsiññiñ, qanuq piñaiḷutchiqsuġuŋił̣ł̣ugu tusaayugaaġiksuaq Christ-kun.

¹³ Iḷisimagisi iñuich savaaqaqtuat God-im aŋaiyyuvikpaŋani niqiksraġuurut aŋaiyyuvikpaŋmiñ, suli aŋaiyyuliqsiqpaich savaktuat ikipkaiviŋmi iḷaŋiutisuummiut niġrutiniñ aitchuutauruaniñ tavrani.

¹⁴ Tainnatuttauq Ataniq pitqurriiŋaruq tamatkua alġaqsruiruat tusaayugaaġiksuanik akiññaktuksrauvlugich tamatkunaŋŋa akuqtuiruaniñ tusaayugaaġiksuamik.

¹⁵ Aglaan uvaŋa atuŋaitkiga nalliat-unnii tamatkua nalaunŋaruakun pamarrusiaqautiksrat, naaggaunnii ukuniŋa tuyuŋitchuŋa piññaksaġluŋa tainnatchimik pamarrusiaksramik. Sugiŋił̣haaġiga tuquguma alġaqsruiḷuŋa akiiḷaaġluŋa tammaiñiġmiñ ilivsiññun alġaqsruiñiksramik.

¹⁶ Piraksriusiaqaqłuŋa alġaqsruutigitquvlugu tusaayugaaġiksuaq, kamasaaġutigiyumiñaitkiga alġaqsruiñiq. Alġaqsruiŋitkaluaġuma isumaapiaġataġniaqtuŋa.

¹⁷ Alġaqsruisuksiññaġluŋa alġaqsruiguma akiḷiusiaqaġniaġaluaqtuŋa. Aglaan uvaŋa alġaqsruiŋitchuŋa pisuksiññaġluŋa, aglaan alġaqsruiruŋa God-im aitchuŋavluŋa savaaksrapiaġatamik.

¹⁸ Sumik aasii akiḷiusiaqaqpik? Quviasuunmik piññaktaamnik alġaqsruiñiġmiñ tusaayugaaġiksuamik pamarrusiaqaġaluaġnaŋa iñuŋniñ, nalaunŋagaluaŋŋaan apiqsriñiksraġa pamarrusiaksramik tamatkunaŋŋa ukpiqtuaniñ.

¹⁹ Tavra uvaŋa kivgauŋitkaluaŋŋaġma iñuŋmun, uvamnik iḷiuqtuŋa kivgatun iñupayaanun, uvapkun kiikaa iñuich qanutun ukpiliqugaluaqługich Christ-mun.

²⁰ Jew-guruanun iḷisuummiuŋa Jew-guruatun, uvapkun Jew-guruat ukpiliqugaluaqługich. Iñuŋnun pitquratigun Moses-kun qaisauruatigun iñuuniaqtuanun, iḷisuummiuŋa iñuuniaġusiatitun tamatkua tainna iñuuniaġusiqaqtuat, uvapkun ukpiliqugaluaqługich. Isummatigiŋitchuŋa uvamnik pituksimarualiḷuŋa iñuuruksrauluŋa tainnaittuatigun piḷġutchisigun.

²¹ Jew-guŋitchuanun iñuuniaqtuaguŋitchuanun pitquratigun Moses-kun qaisauruatigun, iḷisuummiuŋa iñuuniaqtuatun pitquraitchuakun, uvapkun iliŋich ukpiliqugaluaqługich. Kipuqłaglugich pitquraŋi God-im piḷaiñmiuŋa tainna pikama, qanuq pitquraŋisa Christ aŋalatkaanŋa.

²² Iñuŋnun tutqiiḷiyaruanun ukpiġunmiŋni iñuusuuruŋa tutqiiḷitchaiḷivḷugich, uvapkun iliŋich ukpiqtuaguquvlugich. Qanupayaaq iñuk irrusiqaġman, ilaatun piñiḷugaqtuŋa pisigivlugu qanusipayaakun piñaġumiñaqpan iñuich iḷaŋich uvapkun ukpiqtuaguquvlugich.

²³ Tainna pisuuruŋa pisigivlugu tusaayugaaġiksuaq, iḷaŋiutisukłuŋa quviasaaġutiŋiñiñ.

²⁴ Iḷisimarusi aqpaliurraqtuani, iluqaġmiŋ aqpaliurraqtuat akimaniataguurut, aglaan atausiq akiññaguuruq. Iñuunivsiññi Christ-mun, akiññallasivḷuni aqpaliurraqtuatulli pisitchi.

²⁵ Anaktaqtitun inmiñun qaunagilluataqtuatun supayaatigun, aitchuusiaġisukługu niaquġun maqullaruaq, tainnatulli uvagut ukpiqtuaguruaguut iñuulluataqtuksraurugut, aitchuusiaġiyumiñaqsiḷugu niaquġun akiññaktaaksraq maquyumiñaitchuaq.

²⁶ Taamna tainnainman, aqpaliurraqtitun ittuŋa akimasaqłuni aqpattuatun, naaggaqaa qakiqtaqtitun akimasaqłuni qakiqtaqtuatun.

²⁷ Aŋalalluataqtuŋa uvamnik, suli atanniqsimagiga timiga, iḷaanni alġaqsruiŋaqqaaġluŋa allanun, nalliummatiŋaiqsualiñasugaluŋa.