1 Corinthians 8 - Iñupiatun Mumiksat Uqalugiksuat

Apiqqun Niqitigun Aitchuutauruatigun Iñuuraqpaŋnun

¹ Paŋmapak tuyuġivsi sivuniġivlugu tuyuutivsiññi apiqsruutiksi, niġiñikun niqinik ilaaguaqtauŋaruanik iñuuraqpaŋnun. Taavrumuuna apiqsruutikun, iñupayaaq isumaqaqtuq iḷisimałhaaġasugaluni allaniñ ukpiqtuaguruaniñ. Tainnatchim iḷisimmatim iñuk kamasaaġutiqaqtitkaa, aglaan piviuttaqqutim suaŋasiḷaaġai ukpiġutiŋich ukpiqtuat.

² Kiñaliqaa isumaqaġumi iḷisimasiñasugalugu sunapayaaq, iḷisimanaqtisiññaġaa nalutilaani.

³ Aglaan iñuum piviuttaġikpauŋ God, ilaa iḷisimammigaa God-im inmiñun pigitilaaŋanik.

⁴ Aasiuvva niġiñikun niqimik ilaaguaqtauŋaruamik iñuuraqpaŋnun, iḷisimarugut iñuuraqpak uumaŋitchuq, suli allamik God-aitchuq aglaan God atausiuruq.

⁵ Iñuich unnii isumagaluaqpata iñugiakkasugalugich god-it qiḷaŋmiḷu nunamiḷu, aasii taiḷugich god-inik ataniġniglu,

⁶ uvagulli iḷisimarugut atausisualuŋmik God-mik Aapamik, savaŋaruamik supayaanik, suli ilaa pisivlugu iñuurugut. Iḷisimammiugut atausisualuŋmik Ataniġmik, Jesus Christ-mik, ilaagun supayaat savaaguŋavlutiŋ, suli ilaan aitchuŋagaatigut iñuggunmik isuitchuamik.

⁷ Taamnaaglaan ukpiqtuat iḷaŋisa nalugaat. Iñuuniqtutilaamiktun isumasuuŋavlutiŋ iñuuraqpaich uumapiaġasugalugich, aasii niqit ilaaguaqtauruat iñuuraqpaŋnun ilaaguaqtaunasugalugich iḷumutun god-auruamun. Aasii paŋmapak niġisaqamiŋ tamatkuniŋa niqinik, tutqiiññiagaqsivḷutiŋ, isumavlutiŋ piḷuksiñasugivlutiŋ.

⁸ Niqim nalaunŋasipkaġniaŋitkaatigut sivuġaani God-im. Niġigupta piḷuksiḷaaġniaŋitchugut, suli niġiŋitkaluaġupta nalaunŋasiḷaaġniaŋiñmiugut.

⁹ Qaunakłaaġlusiaglaan. Irrusiqaġaluaġuvsi niġiḷḷalusi tainnatchiñik niqinik, niġġiñasi, tutqiisaaġniaġuvsiuŋ aniqan ukpiġutaani suaŋaił̣haaqtuaq ilivsi ukpiġutivsiññiñ.

¹⁰ Qanuq kialiqaa suaŋaił̣ł̣uni ukpiqtuaguruam tautukkumisi niġipkaqtillusi iñuuraqpaum aŋaiyyuviani, ilivsi iḷisimaruasii iñuuraqpaich uumaŋisilaaŋannik, qapiŋaisaaqtauviaqtuq niġiyumiñaqsiḷuni niqimik ilaaguaqtauruamik iñuuraqpaŋnun. Suaŋaiḷḷuni ukpiqtuagugumi aasii tutqiiḷiḷuni,

¹¹ ilaa piḷuksipkaqtauniaqtuq ilivich niġiñipkun. Tainnaqtitkupku, ilivich kaŋiqsisiqałhaaġniqpich suksraunġiqsinniaġaa suaŋaitchuaq ukpiqtuaq. Christ tuquŋammiruaq taamna aniqan suksraunġiqsautquŋił̣ł̣ugu.

¹² Tainna piḷuksikavich anniġiñ aniqatin, ilaa suaŋaiḷḷuqtuamik ukpiġutiqaqtuaq, piḷuksimmiutin Christ-mun.

¹³ Taamna tainnainniġman niqi patchisaukpan aniqanma piḷuksiñiksraŋanun, suuramikunnii niqituġniaŋitchuŋa patchisausuŋiḷḷuŋa aniqanma piḷuksiñiksraŋanun.