1 Corinthians 7 - Iñupiatun Mumiksat Uqalugiksuat

Apiqqutit Katitinnikun

¹ Paŋmapak sivuniġilavut qanuqirrutit tuyuutitigun apiqsruqtuutigirasi. Piḷḷuatauruq aŋun nuliagitkumi.

² Aglaan pisigilugu ikł̣igutchaktitauniaġniq allatuunmun, iñullaa nanmiñiq nuliaqaġli suli aġnallaa nanmiñiq uiqaġluni.

³ Aŋun taŋŋiimaaqtuksrauruq uiguruam piraksraŋiñik nuliamiñun, tainnatuttauq aġnaq piruksraummiuq uimiñun. Avanmun anniqsuutigiiksuksrauruk pigiraksraġikkaġmikkun.

⁴ Nuliaguruam kisimiñun pimaaqtuġumiñaitkaa timini, uiŋata pigimmigaa. Tainnatuttauq uiguruam kisimiñun pimaaqtuġumiñaiñmigaa timini, nuliaŋan pigimmigaa.

⁵ Pisuŋirrutinatik avanmun aglaan sivunniullaŋaguptik qanutun killiksriġḷutik aŋaiyyuuqtuallagniksraptiŋnun. Aglaan atautchimuvsaaġumautik, iḷaanni Satan-gum ikł̣igutchaktinniaqpiaġaatik pisigilugu aŋalalluatalguiññiqtik ilivsiŋñun.

⁶ Taamna uqausiġigiga, tuvaaqatinigukpan iñuk piñaġumiñaqsivḷugu, pitqurriutipiaġlugu piŋitkiga.

⁷ Piyummatigigaluaġmigiga iñupayaaq iñuuniallatquvlugu tuvaaqataiḷḷuni uvaptuttauq, aglaan ukpiqtuallaat inmikkun aitchuusiaqaqłutiŋ God-miñ, iḷaŋich tuvaaqatinikkumiñaqłutiŋ, aasiivsauq allat tuvaaqataiḷḷutiŋ.

⁸ Tuvaaqatiniŋaitchuanun uiḷgaŋaruanullu uqallaktuŋa, iłuaqtuagunivḷugu iliŋich itpata tuvaaqataiḷḷutiŋ uvaptun.

⁹ Aglaan aŋalattaġilguitparruŋ inmun qaunakkutilluataq tuvaaqatiniktuksraurut. Qanuq iłuałhaaqtuq tuvaaqatiniktuni, ataramik nagriaġipkaġniġmiñ timim pisuutaanun.

¹⁰ Tuvaaqatiniŋaruanun piraksriiruŋa, ami uvaŋapiaŋiḷaaq aglaan Ataniq, nuliaguruaq avinnani uimiñiñ.

¹¹ Aglaan avinniġumi, tuvaaqataiḷaġli naaggaqaa iḷammiutqigḷi uimiñun. Aasiisuli piraksriiruŋa uiguruam avitaksraġiŋitkaa nuliani.

¹² Allanulli uqallaktuŋa, Ataniŋiḷaaq, kiñaliqaa aniqan tuvaaqatiqaqtuaq ukpiqtuaguŋitchuamik, aasii aġnaata iviġaumagilugu iñuuqatiginiŋa ilaa, ilaan avitaksraġiŋitkaa aġnaqtiŋ.

¹³ Tainnatuttauq kiñaliqaa aġnaq tuvaaqatiqaġumi ukpiŋaitchuamik, uiŋata iviġaumagilugu iñuuqatigikpagu, aġnaata avitaksraġiŋitkaa uiñi.

¹⁴ Qanuq ukpiŋaitchuaq uiŋa atausiŋŋuqatauŋavluni ukpiŋaruamun nuliamiñun katitinnamiŋ, qallił̣haaqtuq God-mun tuvaaqatiniŋaiññiġmiñiñ ukpiqtuamik. Tainnatuttauq ukpiŋaitchuaguluni nuliaguruaq qallił̣haaġmiuq God-mun atausiŋŋuqatigiŋavlugu uiñiktaani ukpiqtuaguruaq. Tamatkua tainnainŋitpata, miqłiqtusi avinŋanayaqtut God-miñ, tainnainniġmata iliŋich ilaaguaqtaurut God-mun.

¹⁵ Aglaan ukpiŋaitchuaq tuvaaqatauruaq avitchuaqsikpan, tainna piḷi. Tainna pianikpan, ukpiqtuaguruaq, aŋun naagga aġnaq, pituummiŋaiqsuq tuvaaqanmiñun. Qanuq God-im ququaŋagaatigut iñuutquvluta aŋuyautairrunmi.

¹⁶ Nuliaguruatiin, avinŋitkupku uigikkan iḷaanni annaurraupkaġniaġiñ. Tainnatuttauq uiguruatiin, avinŋitkupku nuliaġikkan iḷaanni annaurraupkaġniaġmigiñ.

Iñuusitchi God-im Iñuutqutaa Tuvraġlugu

¹⁷ Aglaan sivunniiguvsi tamatkuniŋa nalupqigiŋiḷḷugu piyumausi iñuutilaaqsi God-im sivunniutaa tuvraqługu ilivsiññun, illusi irrusiġiŋaravsiññi ukpiqqaaqavsi. Taamna pitqurriutigigiga iluqaiññun aŋaiyyuliqiruanun sumiḷiqaa.

¹⁸ Uvvauna sivuniġigiga. Ukpiqtuaġuŋaruaq nalunaiñŋutaqaaniŋagumi timimiñi Jew-guruatun, ukpiqtitauŋaiñŋaġmi, piiġñiataŋaiḷḷiuŋ nalunaiñŋutani. Aasiivsauq ukpiqtuaġuŋaruaq nalunaiñŋutchiqsauŋaiñŋaġmi Jew-guruatun, nalunaiñŋutchiġñiataktuksrauŋiñmiuq.

¹⁹ Qanuq nalunaiñŋutchiqsauniq naagga nalunaiñŋutchiqsauŋaiññiġḷu suliqutauŋitchuk God-mun. Naumałhaaqtuq kamagiruni God-im pitquraŋi.

²⁰ Iñupayaaq iñuuruksrauruq irrutchimi irvigikkaġmiñi ukpiqtitauqqaaqami.

²¹ Kivgauruaguŋavich ukpiqtitauqqaaqavich? Suliqutiginagu. Aglaan atanġiqsitauyumiñaġuvich, piññaktaaġisaġniaġumagiñ piviksriqsauguvich.

²² Iñuk kivgaullaġmi ukpiliqsitauŋaruaq Ataniġmun, atanġitchuq Atanġum sivuġaani. Tainnatuttauq iñuk kivgauŋitchuaq ukpiliqsitaukami, Christ-mun kivgaliutiruq.

²³ Christ tauqsiŋagaasi, akiḷiutivlusi tuquvluni pisivlusi. Tavraasii ilaa kamagiłhamaagaksraġigiksi tamatkunaŋŋaunnii atanaurauruaniñ nunami.

²⁴ Tavra aniqatiit qanusipayaami irviqaŋagumi iñullaa ukpiqtitauqqaaqami, tavrani illi piqatigilugu God.

Apiqqutit Tuvaaqatiniŋaitchuatigun Uiḷgaŋaruatigullu

²⁵ Paŋmapagli sivuniġilugich tuvaaqataitchuat, pitqurriutiksraitchuŋa Ataniġmiñ. Aglaan ukpiġnaqtuaguvluŋa kivgaunimni nagliktuutaagun Atanġum, qaitkiga uvaŋa isummatiga.

²⁶ Isumaruŋa nalaunŋanasugalugu iñuk iñuukpan irrusiġikkaġmisun, pisigilugu tavraġuqtuaq iłuiḷḷiuġun.

²⁷ Tuvaaqatiqaqpich? Avinniaqsaanak. Tuvaaqataitpich? Tuvaaqataiḷaaġiñ.

²⁸ Aglaan tuvaaqatinikkuvich piḷuksiŋitchutin. Suli niviaqsiaq tuvaaqatinikkumi piḷuksiŋitchuq. Aglaattauq tamatkua tuvaaqatiniktuat isumaaluutiqałhaaġniaqtut tuvaaqataitchuaniñ, aasii taavrumaŋŋa isumaaluutivsaaksramiñ piisitchukkivsi.

²⁹ Uvva una sivuniġigiga aniqatiit. Savaurriviksraq Ataniġmik sivikłipiaġataġman, paŋmapaŋmiñ aglaan tamatkua tuvaaqatiqaqtuat savautilirruŋ Ataniq tuvaaqataitchuatun iḷiḷutiŋ.

³⁰ Tainnatuttauq ipiqtusuutit, naagga quviasuutit, naagga suġalġich piñaiḷutchiqsuqtaksraġiŋitkaatigut savaurriñiksraptiŋniñ Ataniġmik.

³¹ Tamatkualu atugaqaqtuat nunam piŋiñik piññagniaqsiññaġniġmun iñuuŋaiġḷutiŋ, qanuq manna nuna suġauttaqtuummaġmi piiġumaaqtuq.

³² Isumaaluutiqaquŋitkivsi. Tuvaaqataitchuaq isumasuŋaiññaġuuruq qanutchikun savautiyumiñaqtilaaŋanik Ataniq, ataramik iviġagukługu.

³³ Aglaalli tuvaaqatiqaqtuaq isumasuŋaiññaġuuruq nunam suġautaŋiñun, qanuġlugu iviġagumavlugu nuliani.

³⁴ Tainnainniġman, iviġagniatagligik iluqaaktun Ataniġlu nulianiḷu. Tainnatuttauq tuvaaqataitchuaq aġnaq isumaqasuŋaiññaġuuruq qanuġluni savautilluatapiaġumiñaqtilaaŋanik Ataniq iñuggunmiñik iluqaanik. Aglaalli tuvaaqatiqaqtuaq aġnaq isummatiqasuŋaiññaġuuruq nunam suġauttaŋiñik, iviġagumavlugu uiñi.

³⁵ Uqautigivsi tamatkuniŋa ikayuqsaqłusi, suli iñuuniaġniq siġḷiġnaiqsaqługu ilivsiññun. Pitqugivsi sunik nalaunŋaruanik savautilluataquvlugu Ataniq pisuqtilaavsisun avigaaŋaŋaiġḷusi.

³⁶ Iññuk piksrautigiiksinŋaruak katititchumaŋaiġumiŋ pisigilugu savaurriñiq Ataniġmik aasii aŋutim piḷḷuatapiaŋaiqpagu tuvaaqatiksrautini katitinŋaiḷġataqłutiŋ utuqqalisaiññaġmipkaġlugu suli ilaan pisuutini ilaanun suaŋavluni, katitillik. Taamna piḷuutaiuŋitchuq.

³⁷ Aglaattauq aŋun sivunnipiaŋagumi katitinŋisaaġugluni nuliaksraunmiñun, isumaqaġumi katitinŋaisaallagugluni pisigilugu aŋalalluataqługu kipiġniuġutini nuliaksraunmiñun, katitinŋaisaaġumi piḷḷuataġmiuq.

³⁸ Tavra taamna katitittuaq nuliaksrautigikkaġmiñun piḷḷuataqtuq aasii taamna katitinŋaitchuaq piḷḷuatałhaaġniaqtuq.

³⁹ Nuliaguruaq pituummiruq uimiñun iñuuniqtutilaaŋatun uiñi. Uiguruaq tuqukpan, nuliaguruaq atanġitchuq tuvaaqasiutisukkumi kimik pisukkumi, aglaan uiñigluni ukpiqtuaguruamik.

⁴⁰ Aglaalli uvaŋa isummatimni quviasułhaaġniaqtuq kisimġiuqtuaġumi. Piraksriġasugigivsi taavrumiŋa Ilitqusiġiksuaŋaniñ God-im.