1 Corinthians 6 - Iñupiatun Mumiksat Uqalugiksuat

Uqaqsitaaġviŋmuutinagich Ukpiqtuaguqatisi

¹ Iḷari uqaġlaqutiqaġumi ukpiqtuaguqanmiñun, uqaġlaqutini iłuaqsipkaġniagaksraġiŋitkaa isivġiqsimun ukpiqtuaguŋitchuamun, aglaan iłuaqsipkaġumiñaġaa ukpiqtuaġuŋaruamun. Kanŋusuktuksraurusi ukpiŋaitchuamun iłuaqsruqtinnavsiuŋ.

² Naluvisi tamatkunuŋa ilaaguaqtauŋaruanun God-mun isivġiġumaaqtilaaŋanik nunam iñuŋi? Isivġiġumaaġniqavsigik iłuaqsruġumiñaġaluaġmigisi aŋiŋitchuat uqaġlaqutit.

³ Nalummivisi-suli isivġiiyumaaqtilaaptiŋnik isaġuliŋnik? Nalupqinaitchuamik iłuaqsiriyumiñaqtugut uqaġlaqutinik paŋmapak iñuuniptiŋni.

⁴ Tavraasii tainna uqaġlaqutinigniġuvsi iłuaqsrugaksranik, isivġiqsiksraqtuksrauŋitchusi iñuŋmik pisuiññiqsrauyumiñaqtuamik aŋaiyyuliqiruani.

⁵ Kanŋusaaġniaqsaagaluaġivsi. Iñuitpaimña atausiuramik-unnii akunnavsiññi isumattutiqaqtuamik iłuaqsiriyumiñaġluni uqaġlaqutiŋiññik iḷauruat ukpiqtuanun aniqatinun.

⁶ Unauvva piḷġusiġiłhaaġiksi. Aniqatim uuma uqaġlaqutini allamun aniqanmun, iłuaqsipkaġniagaqsiraġigai ukpiqtuaguŋitchuamun isivġiqsimun.

⁷ Uqaġlaqutiqaġniq avanmun sivuniqaqtuq akiiḷipkaqtuamik piḷuunmun. Uqaġlaqutiqaqsaaniġmiñ, killukuaqtausitchiunnii, saglutaqtausitchiunniiḷu.

⁸ Aglaan uvva ilivsi killukuaqtałhamaaġniqsusi saglutaġaqługiḷḷu allat, nanmiñiq unnii aniqatisi ukpiġunmi.

⁹ Nalupqinaitchuamik iḷitchuġiŋarusi tamatkua iñuich nalaunŋasiŋaitchuat sivuġaani God-im qiḷaŋmukkumiñaisilaaŋannik, God-im atanniqsimavianun. Sagluqiraunasi, iñuuruat piḷuunmi tamatkualu ukpiqtuat God-auŋitchuamun, allatuqtillu naaggaunnii atunim timiqaġaluaŋŋaġmiŋ atuutiruat pigiitchuakun,

¹⁰ naaggaunnii tigguuraqtit sigñaturuallu taaŋŋaqtillu uqamaqłuurririḷḷu tigligayuktiqpaiḷḷu qiḷaŋmukkumiñaitchut God-im atanniqsimavianun.

¹¹ Qaŋauvlugu iḷasi tainnasiuŋagaluaġmiruat. Aglaan paŋmapak salummaqtauŋavlusi piḷuutivsiññiñ, ilaaguaqtauvlusi God-mun, aasii ilaan akuqtuqłusi nalaunŋarualivḷusi, qanuq Ataniq Jesus Christ tuquŋaruq pisigivlugich piḷuutisi, aasii God-ipta Ilitqusiġiksuaŋan ukpiliqsinŋagaasi.

Atuqsigik Timisi God Nanġausiaqaġumiñaqsiḷugu

¹² Supayaat piñaiḷauŋitchut uvamnun, tainna uqaġuurusi. Aakkaluaq, aglaan supayaat anniqsuił̣haiññalaiñmiut. Supayaat piñaiḷauŋitchut uvamnun. Aakkaluaq, aglaan supayaamun atanniqsimaaqtitchumiñaiñmiuŋa.

¹³ God savaŋaruq niqimik niġiraksrauvlugu aqiaqqumiglu niqim akuqtuqtiksraŋanik, naaggauvva God-im maqulipkaġniaġik iluqaaktun. Aglaan iñuum timaa savaaguŋaitchuq, allatuutigitqulugu. Aglaan savaaguruq savautigitquvlugu Ataniġmun, aasii Atanġum aŋalataksraġigaa.

¹⁴ Tainnatuttauq God-im aŋipkaŋammatun Ataniq tuqqunmiñ, uvaguttauq aŋipkaġniaġmigaatigut ilaan suaŋŋataata.

¹⁵ Nalupqinaitchuamik puttuqsriŋarusi Christ-mun pigitilaaŋiññik timisi. Timaan iḷagimmatun itkai. Taamna tainnainman, uvaŋa tiguniaqpigu iḷaŋa Christ aasii iḷaliutipkaġlugu aġnamun allatuqtimun? Naaggapiaġataq.

¹⁶ Nalupqinaitchuamik puttuqsrirusi aŋun iḷaliutiruaq inmiñik aġnamun allatuqtauruamun timiqasiutitilaaŋanik, qanuq Bible-ni aglausimaruq inna, “Malġuuruak atausiŋŋuġniaqtuk.”

¹⁷ Aglaalli iñuk iḷaliutiruaq Ataniġmun atausiŋŋuqatauruq ilaanun ilitqutchimi.

¹⁸ Suuramikunnii piḷuusiqinasi allatuutikun. Iñuk piḷuksikami allanik piḷuutinik, piḷuksisiqalaitchuq timimiñik. Aglaan iñuk piḷuksikami allatuutikun, ilaa piḷuksiruq atuqługu timini.

¹⁹ Iḷisimapiaġataqtusi timisi aŋaiyyuvigitilaaŋiññik Ilitqusiġiksuamun God-im aitchuutigiŋakkaŋanun ilivsiññun. Ilivsiññik pigiŋitchusi,

²⁰ qanuq tauqsiagurusi akiḷiqł̣usi tuqqutaanik Jesus. Taamna pisigilugu, aŋalatchigik timisi God nanġausiaqaġumiñaqsiḷugu.