1 Corinthians 5 - Iñupiatun Mumiksat Uqalugiksuat

Aŋaiyyuliqiruat Allatuutaat

¹ Quliaqtuaġipiaŋagaat allatuun innivḷugu akunnavsiññi, allatuun piḷġusiġiŋisaŋat akunġanniunnii ukpiŋaitchuat. Qanuq uvva iñuk iñuuqatiqaqsimaruq aapami nuliaŋanik.

² Naaggauvva arguaŋamarusi. Isumaaqpałhaaqtuksraugaluaqtusi. Iñuk taamna allatuqtuaq anitauli akunnavsiññiñ.

³ Nayuqtigiŋitkaluaŋŋavsi, isumaaluutigipiaġataġiga taamna, irrusiñiktuŋaunnii nayuġmatun iḷivḷusi aasii isivġiivḷuŋa pisivlugu Ataniq Jesus Christ.

⁴ Isivġianikkiga iñuk taamna allatuqtualivḷugu. Kasimakavsi iḷisimaaniŋavlugu isivġiutiga pisivlugu Ataniqput Jesus,

⁵ aitchuutigiraksraġigiksi taamna aŋun Satan-mun naŋiliġumauq timimiñi aasii tuquluni, ilitqusia annaurrauyumauq Ataniqput Jesus Christ qaitqikpan.

⁶ Uqavigaaġniqsi nakuuŋitchuq. Iḷisimagiksi mikiruurakkaluam imaksram puvlaktitchuugaa iluqaan akutaq. Tainnatuttauq piḷuun akunnavsiññi pipkaivsaaġniaġmiuq piḷuutivsaamik.

⁷ Piḷuusiqinasi qanuq iñuuruksraurusi piḷuutaiḷḷusi, Christ tuquŋaruq piiqsaqługich piḷuutivut.

⁸ Jew-guruat itqaġmatun qulaurrusiqivik niqinaqivlutiŋ, tuqułługu imnaiyaaq suli niġivḷutiŋ puvlaksautaitchuamik punniġmik, uvaguttauq qulaurrusiqimmatun pimmiugut. Christ God-im imnaiyaaŋatun ittuq tuqutauŋaruaq pisigivluta, aasiiḷi niġiḷakput puvlaksautaitchuaq punniq arriqaqtuaq piŋŋuaġutauŋitchuamik iḷumun ittuamiglu, niqigiŋaiġḷugu utuqqauruaq puvlaksautilik punniq, arriqaqtuaq uumikłiġñiġmik pigiitchuamiglu.

⁹ Aglaŋaruŋa ilivsiññun tuyuutimni piqatiqaquŋił̣ł̣usi allatuqtinik iñuŋnik.

¹⁰ Sivuniġiŋitkitka suuramikunnii piqatigiŋaiqukapkich avuunnaaqtuqulugich allatuqtauruat mattumani nunami naaggaunnii siŋñaturuat tigligayuktiqpaiḷḷu naaggaunnii ukpiqtauruat God-auŋitchuanun, qanuq tainna piñiaġuvsi aullaqtuksrauniaqtusi nunamiñ.

¹¹ Aglaan tuyuŋagivsi piqasiqsuquŋił̣ł̣usi kiñapayaaq ukpiqtuaguqatiksi piḷuusiqikpan allatuunmik, naagga siŋñanmik, naaggaunnii ukpiqtauruamik God-auŋitchuanun, uqamaqłuurrisuuruamiglu, taaŋŋaqtauruamiglu, naagga tigligayuktiqpauruamik. Sumikunnii niġiqatigiraksraġiŋitkiksi tainnasiq iñuk.

¹² Suniaġlugich isivġigaksraġivik ukpiŋaitchuat? Ukpiqtuaġuŋaruat kisiisa isivġigaksraġigivut.

¹³ God-im isivġiġai tamatkua ukpiqtuaguŋitchuat. Anitchiuŋ piḷuusiqirauruaq iñuk akunnavsiññiñ.