1 Corinthians 4 - Iñupiatun Mumiksat Uqalugiksuat

Christ Tiliraŋi

¹ Uvagut iḷisaurrit isummatigiraksraurugut Christ-mun kivgaġiniḷuta, aitchuusiaqaqłuta savaaksrapiaġatamik iḷisaurriruaguluta God-im iḷumun ittuaŋanik kaŋiqsiñaiñŋaruamik sivuani.

² Tavraasii kivgat niġiugiraurut ataramik ukpiġnaqtuksraupiaqługich.

³ Kivgalluatauŋavik uvaŋa? Qanupayaaq ilivsi allallu iñuich isummatigigaluaqpanŋa uŋiarrisaġiŋitkiga. Uvamnun unnii pimaqłuktualiŋitchuŋa.

⁴ Isummatigiŋitchuŋa pasiñaġumiñaġluŋa kivgaumaqłuŋniḷuŋa, aglaan taamna sivuniqaŋitchuq pasiñaġumiñaiññiḷuŋa. Ataniq isivġiiruq uvamnik.

⁵ Uqaġnasi iñuich pasiraksraġuġniḷugich isivġiġvium sivuani, Atanġum qaiviksraŋata sivuani. Atanġum qaigumi, ilaan salapqiġñiaġai iluqaisa iriqsimaruat, suli salapqiġḷugich iñuich nalunaqtuakun sivunniuġutiŋich. Tavraniasii iñupayaaq nalaunŋaruakun God-im akiḷiġñiaġaa.

⁶ Aniqatiit, uvamniglu Apollos-miglu urriqasiŋaruŋa anniqsuqsaqłusi, iḷitchitquvlusi qanuq iñuusiksravsiññik uvaptiktun tuvraġlugich Bible, nallipayaaqsi kamasaaquŋił̣ł̣ugu, iviġaumaġiłhaaquŋił̣ł̣ugu iñuk atausiq allamiñ iñuŋmiñ.

⁷ Anniqsuusiat pigikkasi iluqaġmiŋ God-miŋŋaqtaurut. Aasii aitchuusiaġiniqavsigik, summan uqavigaaqpisi aitchuusiaġiŋitchuatun iḷivḷugich?

⁸ Ilivsi Corinthians isummatigisaaniktusi ilivsiññun pigiliutianignivḷugich iluqaisa pigisuktasi. Isummatigisaaniktusi ilivsiññun piiḷḷiuŋiññivḷusi quviasaaġusianik qiḷaŋmiñ. Isummatigirusi ilivsiññik umialiktun iḷivḷusi, kamanałhaaġnivḷusi uvaptiŋniñ, aasii pigiraksraġiŋił̣ł̣ugich uvagut iḷisaurrutivut. Umialliqsimanniquyumagaluaġmigivsi umialiktitun, piqatauyumiñaqsiḷuta atanniqsimannignivsiññi.

⁹ Iḷaanni isumasuuruŋa God-mun aqulliqpiaġuutipkaġasugaluta takłauriruani iñuŋni, uvagut tililauruaguut, tigutaaqtatun tuqutauyasiruatun, qiñiqsitaaliutivluta isuannun akimavlutiŋ aŋiḷġaqtuat takłaurivḷutiŋ, takunnaqtitchukłuta iñuŋnullu isaġuliŋnullu atunim.

¹⁰ Isumakkusiaqaqtugut isumalluaġiitchualivḷuta Christ pisigivlugu, aglaalli ilivsiññun isummatigirusi isumaturualivḷusi ukpiqtuasii. Aasiisuli uvagut suaŋaiññiraurugut ilivsiḷi isummatigipkaqtillusi suaŋarualivḷusi. Kamanaqtualiraummiusi aglaalli uvagut suuŋitchualirauvluta.

¹¹ Paŋmapaŋmun aglaan ikarraġmun kaaksiurugut imiġuksiuvlutalu, annuġaagiḷḷiuġmiugut, pimaqłuktaqtauvluta, aimaaġviiñmiugut.

¹² Siġġaqinialgiñmiugut savautigivlugich argavut. Uqamaqłuurraukapta, quviasaaqłiirugut, nagliksaaqtitaukapta igḷutuutirugut.

¹³ Saŋutaukapta iḷammiuġniḷuktugut. Irrusiñiŋarugut paŋmapaglu irrusiġigikput suaqłuŋisun nunam natiġluŋisun supayaam.

¹⁴ Aglaŋitkitka taapkua kanŋusaaqsaġlusi, aglaan siḷġiqsuqsaqłusi piviuttaġikkaptun miqłiqtuptun.

¹⁵ Kisiññaitchuanik unnii iḷisaurriqaġaluaġuvsi qapiŋaisaaqtiksravsiññik ukpiġutivsiññi, atausisualuŋmik iñuŋmik piqaqtusi aapaummatun ittuamik ilivsiññun, qanuq uvaŋa aapauruatun ilivsiññun alġaqsruutigiŋagiga tusaayugaaġiksuaq, aasii ilivsi anitqiŋarusi ukpiqłusi Christ-mun.

¹⁶ Tuvraqupiaqtuŋaasii ilivsiññun.

¹⁷ Aasii ikayuqsaqłusi tainna pitquvlusi, tiligiga ilivsiññun piviuttaġiraġa ukpiġnaqtuaġlu Timothy, miqłiqtuġimmatun itaġa pisigivlugu ukpiqtuaguŋaniŋa uvapkun. Itqaqtinniaġaasi iñuuniaġusimñik atausiŋŋuqatigikapkuqaŋa Christ, uvaŋa iḷisaurrisiptuttauq sumiḷiqaa aŋaiyyuliqiruani.

¹⁸ Iñuich iḷasi arguaŋarut, qaiñiaŋiññasugaluŋa ilivsiññun.

¹⁹ Aglaan ullayasigivsi, Atanġum pisuutigikpagu, iḷitchuġiniaqtuŋa arguaŋaruat tamatkua uqaqpagaaqsiññaqtilaaŋannik naagga piqapiaqtilaaŋannik God-im suaŋŋataanik.

²⁰ Qanuq God-im atanniqsimmataa iñuŋnun uqaqsiññaġniġuŋitchuq, iñuuniġuruq God-im suaŋŋataagun.

²¹ Sutquyumavisi? Ullagniaqpisi tatavsaġiaġlusi, naagga piviuttaqqunmi?