1 Corinthians 3 - Iñupiatun Mumiksat Uqalugiksuat

God-im Kivgaŋi

¹ Aglaan taimani nayuqavsi, aniqatiit, iḷisautiyumiñaiñŋagivsi iñuktun iḷiḷusi puttuqsriruatun Ilitqusiġiksuakun, qanuq ukpiqsaqpaallukłusi. Inŋavlusi ukpiŋaitchuatun kaŋiqsiñmi, suli miqłiqtuuratun iłłusi ukpiġutivsiññi.

² Iḷisaurrutitka ilivsiññun siġḷiġnaiñŋarut. Miqłiqtuuraq immułhiñamik imiqtuksraummatun niqipiaqtullasiŋaił̣ł̣uni, tainnatun itqanaiñŋaiñmiusi iḷisaurrutiksranun agliraksraiŋaruat ukpiqtuat kaŋiqsiḷḷakkaŋiññun. Paŋmapak-unnii itqanaiñŋitchusi.

³ Qanuq uvva paŋmapak-unnii iñuuruagurusi ukpiŋaitchuatun. Killuqqutivlusi avanmun, qanaaġutivlusiḷu, ukpiŋaitchuatun ittusi, aullasiqaqtusi iñugruiññatun.

⁴ Qanuq ilivsiññik aŋalattusi iñugruiññatun iḷasi uqaġmata Paul-muktuqtuŋa, allalli uqaqłutiŋ, uvaŋa Apollos-muktuqtuŋa.

⁵ Suliqutauva Apollos? Suliqutauva Paul? Kivgałhiñak uvaguk ukpiġikkaptiguk, Atanġum ukpiliqsinmasi Apollos-kullu uvapkullu God-im piraksriutillaaŋatun uvaptiŋnun.

⁶ Alġaqsruiñiqpuk akunnavsiññi uuktuutiqaġumiñaqtuq nautchirriqirim savaaŋanik. Uvaŋa urriqatigiluŋa nautchirriiruatun nautchiaksranik, aasiiḷi Apollos imiġmik aiḷaqtiġimmatun nautchirriutauruanik, aasiiḷi God-im naupkaqługich.

⁷ Tavraasii iñuk nautchirriiruaq iñuglu aiḷaqtiġiruaq suvigruaguŋitchuk, aglaan God kisimi naumaruq qanuq naupkaiḷḷaruq.

⁸ Nautchirriiruaġlu aiḷaqtiġiruaġlu atiruk, aasii inmikkullaa akiḷiusiaqaġniaqtuk savaallaamikkun.

⁹ Qanuq uvaguk savaqatigiiksuguk God pisivlugu, aasii ilivsiḷi God-im nautchiaqaġvigimmatun. Aasiisuli igluqpaktun inmiusi God-im nappakkaŋatun.

¹⁰ Sanatuvluni qaukłiuruatun igluqpiritun, inillaŋagiga maŋŋuksraq, taŋŋiqł̣ugu savaaksrirrutaa God-im uvamnun. Taavruma maŋŋuliutiruam qaaŋanun allali iñuk nappairuq. Iñullaa qaunakłaaġli qanuq nappaisilaamiñik taavrumuŋa maŋŋuliutauŋaruamun.

¹¹ Allamik maŋŋuksramik iñuk iḷisiyumiñaitchuq taamna anaglugu iḷirauŋaruaq, sivuniqaqtuaq Jesus Christ-mik.

¹² Iñuich aglaan nappaiyumiñaġmiut maŋŋuliutauŋaruamun akisuruanik sunik maqulaitchuanik naaggaqaa akiisuuranik sunik maquyaruanik.

¹³ Iñullaam savaaŋa satqummiġñiaqtuq isivġiġvium uvluani. Qanuq taavrumani uvlumi iñullaam savaaŋa qanuġumiñaġniaġaa igniġum, aasii igniġum uuktuġniaġaa qanusiutilaaŋanik iñullaam savaaŋa.

¹⁴ Iñuum kialiqaa savaaŋa nappaŋakkaŋa maŋŋuliutauŋaruamun, igniġum ikiŋitpagu ilaa akiḷiusiaqaġniaqtuq.

¹⁵ Iñuum kialiqaa savaaŋa ikiraukpan, ilaa akiḷiusiaqaġniaŋitchuq, ilaa annaurraupqaatchiaġmiḷuni igniġmiñ annaurraukami.

¹⁶ Nalupqinaitchuamik puttuqsrimarusi God-im iñuutilaaŋanik iḷuvsiññi. Ilivsi ittusi ilaan aŋaiyyuviatun, suli God-im Ilitqusiġiksuaŋa iñuuvluni iḷuvsiññi.

¹⁷ Kialiqaa maqutpagu taamna God-im aŋaiyyuvia, God-iptauq suksraunġiġñiaġmigaa ilaa. Qanuq God-im aŋaiyyuvia ilaaguaqtauruq ilaanun, aasii ilivsi ilaan aŋaiyyuvigigaasi.

¹⁸ Kiñaliqaa sagluqinani inmiñik. Iñuk akunnavsiññi isumagumi isumatunasugaluni, iñugruiññaich isummasiatitun isummatigikamirruŋ isumattun, ilaa isumalluaġiiġḷi isumattutinikkumauq God-im isumattutaanik.

¹⁹ Qanuq isumattutaat ukpiŋaitchuat asiḷiqqutauruq God-mi. Taamna sivuniġivlugu aglausimaruq Bible-ni inna, “God-im isumatusaaruat pisaupkaġaġigai ilaisa pisaasuqsaaniaġutaannun.”

²⁰ Aasiisuli aglausimavsaaqłuni, “Atanġum iḷisimagai isumaŋich isumaturuat asiḷiqqutautilaaŋat.”

²¹ Tamatkua tainnainniġmata, kiñaliqaa uqavigaaġutiqaŋaiḷḷi iñuich nalliŋiññuktuġniḷuni atautchimunmuktaqtuat, qanuq supayaat pigigisi ikayuqsaqłusi,

²² Paul-lu Apollos-lu Cephas-lu God-im nunaŋalu iñuggullu tuqqullu paŋmapak iñuuniqsiḷu, iñuggutigiyumaakkaqsiḷu, iluqaisa pigigisi,

²³ aasiisuli Christ pigigaasi, aasiiḷivsauq Christ God-im pigimmigaa.