1 Corinthians 2 - Iñupiatun Mumiksat Uqalugiksuat

Tusaayugaaġiksuat Christ-kun Aŋarraurami

¹ Aniqatiit, tikiññama ilivsiññun, alġaqsruiŋaitchuŋa God-im uqaluanik uqayupiaġataqtuam uqaluŋiñik atuġluŋa iñugruiññauvlu isumattutaagun,

² qanuq sivunniŋavluŋa alġaqsruutigisukługu kisian Jesus Christ tuquŋaniŋalu aŋarraurami.

³ Alġaqsruiŋaruŋa ilivsiññun suaŋaił̣ł̣uŋa iqsipiaqłuŋalu uuliksivḷuŋalu iviġaumasukługu God.

⁴ Suli alġaqsruikama, maliksuguksaaŋitkivsi iñugruiññaum isumattutaagun, aglaan uvapkuaqługu Ilitqusiġiksuam iḷitchuġipkaŋagaa suaŋŋatini.

⁵ Tainna alġaqsruiŋaruŋa God-im suaŋŋataanun ukpiliqsitquvlusi, iñuum isumattutiŋił̣aaŋanun.

God-im Isumattutaa

⁶ Aasiivsauq aulayaiġḷuataŋavlutiŋ ukpiġunmiŋni ukpiqtuaguruanun, iḷisaurrisuugaluaġmiugut isumattunmik, aglaan isumattutauŋił̣ł̣uni isummatiqausiatitun ukpiŋaitchuat naagga atanaurauruat nunami, suksraunġiqsauyumaaqtuat.

⁷ Aglaan iḷisaurrutigigikput God-im isumattutaa iriqsimaŋaruaq, kaŋiqsiḷaisaŋat iŋiḷġaan taimani. God savaŋaiñŋaġmiunnii nunamik, sivunniŋaniqsuq taavrumuŋa isumattunmun piqataullasiñiaġnivḷuta ilaan kamanaunmiñun.

⁸ Nalliataunnii atanauraŋisa mattuma nunam taamna kaŋiqsiŋaitkaat, qanuq kaŋiqsiŋagumirruŋ, kikiaktuutinayaitkaat Atanġa qaumaniqpaum.

⁹ Taapkua iñuich kaŋiqsiŋaitkaat aglautiŋaruaq Bible-ni inna, “Iñuum qaŋaunnii tautuŋaitkai naagga tusaayugaaġiŋaitkai, isumagiqqayalaitkai unnii quviasaaġusiaksrautit God-im itqanaiyaŋakkaŋi tamatkunuŋa piviuttaqsriruanun inmiñik.”

¹⁰ Aasii tamatkua quviasaaġusiat, God-im satqummiŋagai uvaptiŋnun Ilitqusiġiksuamigun. Sunapayaaq iriqsimaŋitchuq Ilitqusiġiksuamiñ, taamnaunnii God-im kamanapiaġataqtuaq isumattutaa.

¹¹ Allaptauq iñuk nalummatun iñuum allam isumaŋanik ilitqusiata ilaan kisimi iḷisimakkaŋanik, tainnatun kialiqaa kaŋiqsiḷaiñmigai isumaŋi God-im aglaan Ilitqusiġiksuam kisimi.

¹² Aasii taamna Ilitqusiġiksuaq God-im aitchuutigiŋagaa uvaptiŋnun, iñugruiññaum isumattutigiŋisaŋa, uvagut iḷitchuġitquvluta iluqaiññik anniqsuusianik God-im akiiḷaanik aitchuutiŋiñik uvaptiŋnun.

¹³ Aasii taamna iḷisaurrutigigikput uqaluktigun iḷisausiaptigun Ilitqusiġiksuamiñ, iñugruiññaich isumattutiŋił̣aaŋatigun, sivuniqsiñaqsiñiaqługich iḷumun ittuat, satqummiŋaraŋi Ilitqusiġiksuam iñuŋnun piqaqtuanun Ilitqusiġiksuamik.

¹⁴ Iñuum piqaŋitchuam Ilitqusiġiksuamik aitchuusiaġiyumiñaitkai sut God-im Ilitqusiġiksuaŋan aitchuutiŋi, qanuq asiḷiqqutaurut ilaanun iñuŋmun. Kaŋiqsiyuminaitkai qanuq qanuqitilaaġumiñatualukkaich kisimiŋ iñuich puttuqsripkairiqaqtuat Ilitqusiġiksuamik.

¹⁵ Iñuum puttuqsripkairiqaqtuam Ilitqusiġiksuamik qanuqitilaaġai supayaat, aasii ilaa qanuqitilaaqtiqaġumiñaitchuq allanik kaŋiqsisiqaŋitchuanik inmisun.

¹⁶ Qanuq, “Iñugruiññaq kaŋiqsiḷḷasiyumiñaitchuq God-im isumaŋanik. Tainnainman kimigliqaa iḷisaurriqaġumiñaitchuq God.” Aglaan uvagut piqaqtuaguut Ilitqusiġiksuamik isummasiqaqtugut Christ isummasiatun.