1 Corinthians 16 - Iñupiatun Mumiksat Uqalugiksuat

Aitchuutit Ukpiqtuaguqatinun

¹ Paŋmapak tuyuġivsi kiusaqługu apiqsruutiksi tuyuutivsiññi, aitchuiñikun maniŋñik ilaaguaqtauŋaruanun God-im iñuŋiñun. Uqallautigivsi pitquvlusiḷi piraksriutipiaġataptun Galatia-mi aŋaiyyuliqiruanun.

² Savaiññipayaani atausiullaalusi ilaaguaqsiḷḷaayumausi maniŋñik, aasii tutquġlugich piḷḷuataġniġumi iñuk, aitchuisaġataŋitchumausi qaiguma.

³ Qaiguma tuyuutiginiaġitka aitchuutisi piqasiġḷugich tuyuutinik Jerusalem-miittuanun, aatchumagaich taamuŋa ukpiġnaqtuatigun kivgatigun ilivsi piriksraqtaaġiniakkavsigun.

⁴ Iłuaqpalliaqsikpan piviksraq aullaġumiñaġluŋa, iliŋisa malikkumiñaġniaġmigaanŋa.

Paul Sivunniuqtuq

⁵ Ullagniaġivsi Macedonia-kuaqqaaġluŋa, qanuq sivuniqaqtuŋa Macedonia-kuaġumavluŋa.

⁶ Aasii iḷaanni nayuqtuallagniaġivsi naaggaunnii ukiiḷuŋa. Tavraasii ikayuġumiñaġniaġivsiŋa iglauniksramni sumun aullaġaluaġuma.

⁷ Atanġum pisuutigikpagu, uvliuqtuallaguktuŋa ilivsiññi, qanuq tautugumaŋitkivsi akkupaurałhiñaq nalautchaaqsiññaġlusi.

⁸ Aglaan Ephesus-miinniaqtuŋa Pentecost-liqiniġmi,

⁹ qanuq qanutun alġaqsruiviksraġa ittuq uvani tusaayugaaġiksuamik, aasiivsauq akiḷḷiḷiqsuiruat savaamnik iñugiagmiut.

¹⁰ Timothy qaikpan, qaunagiyumausi tagialatquŋiḷḷugu akunnavsiññi, qanuq savaaqaqtuq savaaŋanik Atanġum, uvaptuttauq.

¹¹ tavraasii kialiqaa suuŋiḷaġiŋaiḷḷiuŋ ilaa. Aullaqsaqpan ilivsiññiñ, upaluŋaiyaġumagiksi quviasugluni iglauyumauq, suli uvamnukkasuaġluni, qanuq niġiugigiga tikiññiksraŋa piqatiqaġluni aniqatinik.

¹² Uqallautiniaġivsi Apollos-kun aniqatiptigun. Kiaqsrupiaġaluakkaġa ullaquvlusi piqasiġḷugu allanik aniqatinik, aglaan God-im nalupqinaitchuq pisuutigiŋiññiġaa paŋmapak aullaqtuksraulugu. Ullaŋniaġaasi piviksranikkumi.

Uqaluguiqsaaġutit

¹³ Quviqtaiḷisitchi pigiitchuamun, tuniqsimatitchi ukpiġutivsiññi, qapiŋairrutiqaġitchi, saŋŋisitchi Ataniġmun.

¹⁴ Sunapayaaq pikkaqsi, pisiuŋ piviuttaqqutikun.

¹⁵ Aniqatiit, iḷisimarusi igluqatiŋi Stephanas ukpiqqaaqtuaguŋarut nunami Greece-mi, aasii ikayuipiaġataŋarut ukpiqtuanik.

¹⁶ Kiaqsruġivsi isummatigilluataquvlugich ikayuġlugiḷḷu tainnatchich iñuich, suli kimupayauraq savaqatauruamun siġġaqiqatauruamullu.

¹⁷ Quviasuutigigiga qaiñiŋat Stephanas Fortunatus-lu Achaicus-lu qanuq ikayuŋagaanŋa ilivsi pisiksraġaluavsisuttauq maaniitkuvsi.

¹⁸ Iliŋisa qapiŋaiqsaaŋagaanŋa ilivsivsauq qapiŋaisaaqłusi. Isummatigilluataqsigik tainnaittuat iñuich.

¹⁹ Aŋaiyyuliqiruat nunaŋani Asia-m tuyuqtut paġlatinik. Aquila-lu Priscilla-lu piqatiqaqłutiŋ aŋaiyyuliqiruanik aŋaiyyuliaġuuruanik iglumiŋnun tuyuqtut ilivsiññun paġlatipiaġatanik ukpiqtuaguqanmiŋnun.

²⁰ Iluqaġmiŋ aniqatit tuyuqtut paġlatinik. Paġlatisitchi avanmun ukpiqtuat paġlatikaaŋannik.

²¹ Uvaŋa Paul aglakkitka ukua paġlatit uvamnik.

²² Kiñaliqaa piviuttaqqutaitchuaq Ataniġmun, suksraunġiqsauli. Ataniqpuut, qaġġiiñ.

²³ Ataniqput Jesus nagliktuutiqpaqaġli ilivsiññun.

²⁴ Iluqata atausiŋŋuqatigikaptigu Christ Jesus tuyuutigigiga piviuttaqqutiga ilivsiññun. Amen.