1 Corinthians 12 - Iñupiatun Mumiksat Uqalugiksuat

Ilitqusiġiksuam Aitchuutiŋi

¹ Aniqatiit, tuyuġivsi paŋmapak apiqsruutisi sivuniġivlugich Ilitqusiġiksuam aitchuutiŋigun. Kaŋiqsimaqłuquŋitkivsi tamatkunuuna.

² Iḷisimarusi ukpiqtuaġuŋaiñŋavsi asiñuurrauŋarusi aŋaiyyusukłusi iñuuraqpaŋnun uqalaiḷanun, aasii tainna pikavsi aŋalatiłłusi tamatkunuŋa iñuuraqpaŋnun.

³ Paŋmapak-aasii kaŋiqsitqugivsi taamna kiñaliqaa aŋalatittuaq Ilitqusiġiksuamun uqallakkumiñaipiaqtuq inna, Jesus suksraunġiqsauli. Suli kiñaliqaa uqallakkumiñaiñmiuq iḷumutun inna, Jesus Atanġuruq, Ilitqusiġiksuam pipkaŋisuaqpani.

⁴ God-im aitchuġaatigut iñugiaktuanik allakaaġiiñik ikayuqtiksraptiŋnik savautiguptiŋni, aglaan atautchim atiruam Ilitqusiġiksuam pigipkaġai iluqaisa uvaptiŋnun.

⁵ Allakaaġiiksuat savaaksrat God-mun ittut, aglaan iluqata savautigikput atausiq Ataniq.

⁶ Suli allakaaġiiksuat savaurriñġich inmiut savaaqaqtuni God-im savaaŋiñik, aglaan atausiuruam God-im iluqata savaktitkaatigut savaamiñik.

⁷ Ilitqusiġiksuam iḷitchuġipkaġuugaa God-im suaŋŋataa atausiullaavluta uvaptigun, anniqsuqsaqługich aŋaiyyuliqiruat iluqaisa.

⁸ Ilitqusiġiksuam uqaqtillagaa iñuk isumattutikun, allasuli iñuk uqaqtillavlugu iḷisimmatiqaqtiłługu atausiuruam Ilitqusiġiksuam.

⁹ Atausiuruam Ilitqusiġiksuam allaptauq iñuk suaŋalluktuamik ukpiġutiqaqtillagaa, suli alla aitchuusiaqaqtillavlugu iłuaqsiriñiġmik atausiuruam Ilitqusiġiksuam.

¹⁰ Suli Ilitqusiġiksuam allaptauq savaktillavlugu aliuġnaqtuanik, aasiisuli alla iñuk uqaqtaullavlugu God-mun, allasuli iñuk puttuqsrisiqaqtillavlugu nalliaŋnun Ilitqusiġiksuamullu naagga iḷumun ilitqusiuŋitchuamullu iñuk aŋalatilaaŋanik, allasuli uqaqtillavlugu iñugiaktuanik uqautchiñik naluraŋiñik, aasiisuli sut uqautigikkaŋi, allamun iñuŋmun mumiksillavlugich nalugaluaġmiruamun taavrumiŋa uqautchimik.

¹¹ Iluqaġmiŋ tamatkua ikayuusiat aitchuutaurut uvaptiŋnun atiruamiñ Ilitqusiġiksuamiñ atausisualuuruamiñ, aasii autaaqługich atausiullaavluta uvaptiŋnun, aitchuutit isummatigikkani pigiraksraġivlugich uvaptiŋnun.

Timi Atausiq Sulliñiqaqtuq Iñugiaktuanik

¹² Qanuq timitun atausiuruatun aasii iñugiaktuanik sulliñiqaqłuni, suli iluqaġmiŋ iḷaŋi timim iñugiakkaluaqtillugich atausiuvluni timi, tainnatuttauq atausiŋŋuqatigiŋagikput Christ,

¹³ qanuq atausiullaavluta iḷaummatun ittugut Christ timaanun. Ilitqusiġiksuam atausiuruam iluqata atausiŋŋuŋagaatigut, atautchisun timitun, paptaiġutikun Jew-gugaluaġupta naagga Jew-guŋitkaluaġupta, kivgaugaluaġupta naagga kivgauŋitkaluaġupta. Aasii atausiuruaq Ilitqusiġiksuaq aitchuutauruq atausiullaavluta uvaptiŋnun.

¹⁴ Timi sulliñiqaqtuq iñugiaktuanik. Atausił̣hiñauluni sulliñiġuŋitchuq.

¹⁵ Isigaich uqallakkumiñaqpata inna, Uvaŋa argauŋił̣ł̣uŋa timim sulliñiġiŋitkaaŋa. Taavruma uqallautim iḷauŋaipayaaġumiñaitkaa timimun.

¹⁶ Suli siun uqallallakpan, Qanuq irauŋił̣ł̣uŋa sulliñiġiŋitkaaŋa timim. Taavruma uqallautim iḷauŋaipayaaġumiñaiñmigaa timimun.

¹⁷ Timi iluqani iraukpan, iñuk tusaallayumiñaitchuq. Timi-suli iluqani siutaukpan, iñuk naiḷaiññayaġmiuq.

¹⁸ Aglaan God-im tainna savaŋaitkaatigut. God-im savaŋagai timivut iñugiaktuanik sulliñiqaqługich, aasii ilaisigullaa inillakługich timim sulliñillaaŋa sumun pisukamiuŋ.

¹⁹ Timi iluqani atausił̣hiñauluni sulliñiġugaluaqpan timaunayaitchuq.

²⁰ Aglaan God-im savausiatun timimik, iñuk timiqaqtuq atautchimik sulliñiqaqtuamik iñugiaktuanik.

²¹ Iri uqallakkumiñaitchuq argaŋnun, Anniqsuutigiŋitkikpiñ, naaggaunnii niaquq isigaŋnun, Anniqsuutigiŋitkikpiñ.

²² Aglaan uvva, iḷaŋi timim qiññaqaqtuat anniqsuutauvigruaŋitchuatun piitchuipiaqtut.

²³ Aasiisuli tamatkua timim sulliñiŋi qiñiyunapiaŋitchuat isummatigilluataġuummigivut qanuq piitchuiñmiut. Suli sulliñiŋi timim kanŋugiravut taalutaqaġivut.

²⁴ Qaunagilluatałhaaġivut tamatkunaŋŋa timim sulliñiŋiñiñ kanŋugiŋisaptiŋniñ. God-im savaŋagai timivut, uvaptiŋnun qaunagilluatałhaaquvlugich timim iḷaŋi isummatigikkavut anniqsuutaupiaŋiññasugalugich.

²⁵ Tainna God-im sivuniqaŋagaa timi itquvlugu, sulliñipayauraŋi timipta atautchisun itquvlugich, qaunagilluataquvlugich iluqaisa atunim. Tainnatun God sivuniqaŋaruq iluqaisa ukpiqtuat iñuuniaqatigiiquvlugich atilutiŋ.

²⁶ Atausiq iḷauruaq isumaaluusiqpan, iluqaġmiŋ iḷauruat isumaaluutigigaat, naagga atausiq iḷauruaq isumakkusiaqaġluataqpan, iluqaġmiŋ quviatchaktaurut.

²⁷ Iluqavsi atausiurusi, iñullaaguvlusi sulliñiġimmatun Christ timaata itkaasi.

²⁸ Aasii aŋaiyyuliqiruat akunġanni God piksraŋaruq sivulliġivlugu, iñuich tilirauvlugich alġaqsruitquvlugich, igḷuani uqaqtiksranik God-mun, piŋayuagni iḷisaurriksranik, maanna aliuġnaqtuanik savallaruanik, tamatkuniŋalu iłuaqsiriḷḷaruanik, ikayuiruksraniglu, ataniġnaqutiqaqtuallu, uqallaruallu allakaaġiiñik uqautchiñik naluramiŋnik.

²⁹ Uvva inna. Tamatkiġḷutiŋ ukpiqtuaguruat tilirauŋitchut alġaqsruiyyaqulugich, suli tamatkiġḷutiŋ God-mun uqaqtauŋiñmiut. Tamatkiġḷutiŋ iḷisaurrauŋiñmiut, naaggaunnii tamatkiġḷutiŋ aliuġnaqtuanik savalaiñmiut.

³⁰ Iluqaqpiaġmiŋ piqaŋiñmiut iłuaqsiriñiġmik. Suli tamatkiġḷutiŋ uqallasiḷḷaruaguŋiñmiut allanik uqautchiñik naluramiŋnik naagga mumiksiḷḷasiḷutiŋ tamatkuniŋa allanik uqautchiñik.

³¹ Tavraasii kipiġniupiaġitchi anniqsuutaułhaaqtuanik aitchuusiaqaġuglusi. Paŋmapak uqallautiniaġivsi nakuułhamaaqtuamik aitchuusianiñ.