1 Corinthians 11 - Iñupiatun Mumiksat Uqalugiksuat

Aġnat Matuqagaksraġigaich Niaqqutiŋ Aŋaiyyuruani

¹ Piḷġusiqaġitchi uvaptun tuvraiñiaġmatun Christ-mik.

² Nanġaġivsi pisigivlugu itqaumaniqsi, tuvraiñiqsiḷu iḷisaurrutigiŋakkamnik ilivsiññun.

³ Aglaan kaŋiqsitqugivsi Christ-gum qaukłiutilaaŋanik iñupayaamun, iñuum niaquġimmatun. Tainnatuttauq, uiguruaq niaquummatun inmiuq aġnamun, aasiisuli God niaquummatun Christ-mun.

⁴ Kiñaliqaa aŋun aŋaiyyuruaq naagga uqaqtauruaq God-mun nasaqtuqłuni iḷisimanaqtinŋitkaa Christ qaukłiġitilaaŋanik inmiñun.

⁵ Suli kiñaliqaa aġnaq aŋaiyyuruaq naagga uqaqtauruaq God-mun niaqquni matuiḷaaqługu iḷisimanaqtinŋitkaa uiñi qaukłiutilaaŋanik inmiñun. Inmiñik nalliummatinialaruq aŋunmiŋnun, nutchani iḷivḷugich kivraŋaruatun aŋutitun.

⁶ Aġnam matutuġniaŋitkumiuŋ niaqquni, saliraksraġigai nutchani aŋutitun. Aasii kanŋunaġniqpan aġnaq saliŋamman, matutuġliuŋ niaqquni.

⁷ Aŋutim matutugaksraġiŋitkaa niaqquni qanuq ilaa savaaguŋaruq irrusiatun God-im, aasii salapqiqsimavlugu God-im kamanautaa. Aġnavli salapqiagaa aŋutim kamanautaa.

⁸ Aġnaġliasii savaaguŋaruq aŋunmiñ. Aŋun savaaguŋaitchuq aġnamiñ.

⁹ Aŋun savaaguŋaiñmiuq anniqsuqsaġlugu aġnaq, aglaan aġnaq savaaguŋaruq anniqsuqsaqługu aŋun.

¹⁰ Tavra aġnam matutuqtuksraġigaa niaqquni nalunaiñŋutaulugu ilaan qaukłiqaqtilaamiñun aŋunmik, isaġulgich iluqaġmiŋ tautuglugu suqpagiŋitchumagaat.

¹¹ Aasiivsauq Atanġum sivunniuġutaani aŋutillu aġnallu anniqsuutigiiksuksrauniqsut avanmun,

¹² qanuq aġnaq savaaguŋagaluaqtillugu aŋunmiñ, aŋun paŋmapak animmiraqtuq aġnamiñ, tamarra supayaat qairut God-miñ.

¹³ Nalaunŋatilaaqsiuŋ ilivsiññik. Aġnaq aŋaiyyugumi God-mun niaqquni matuiḷḷugu nalaunŋava?

¹⁴ Ilivsi iḷisimarusi iḷisautiraksraitchusi aŋun nuyaqtusiruaq kanŋunaqtilaaŋanik.

¹⁵ Aglaan aġnam nuyaqtuniŋa qiñiyunaqsiḷġutauruq ilaanun. Qanuq nusaŋi aitchuutaurut ilaanun matugitquvlugich.

¹⁶ Kiñapayaaq uqavaaġumakpan taavrumuuna, uvagut piksraitchugut allamik piḷġutchimik, naaggaunnii aŋaiyyuliqiruaŋi God-im.

Atanġum Nullautchiġvia

¹⁷ Aglaan ukunuuna iḷisaurrutitigun nanġaŋitkivsi, qanuq katinnavsi atautchimun anniaġutiłhaaġuurusi nakuurualiqiniġmiñ.

¹⁸ Qanuq uvva aŋaiyyuliaqavsi inmikkuaŋasiñisuugaasi. Tainna kilgusiaqaŋaruŋa, aasii taamna ukpiġikavsakkiga.

¹⁹ Qanuq inmikkuaŋasiraġaġniq ittuksrausugnaġniqsuq akunnavsiññi, tamatkua iḷumun ukpiqtuaguruat satqummiquvlugich.

²⁰ Katinnavsi atautchimun, Atanġum nullautchiġvianik niġiŋitchusi,

²¹ qanuq niġiñiġmi, iñullaa isagutiraqtuq ilaan niqaunmiñik, allali iñuk kaaktillugu allasuli imiŋasivḷuni.

²² Suvisi? Aimaaġviqaqtusi niġġiviksranik imiġviksraniglu. Suuŋiḷaġigisi aŋaiyyuliqiruaŋi God-im tutqiisaaqługich tamatkua piksraitchuat. Qanuq uqallagniaqpik ilivsiññun? Nanġaġniaqpisi taavrumuuna? Naagga, nanġaġniaŋitkivsi.

²³ Qanuq Atanġum salapqiŋagaa uvamnun iḷisaurrutigiŋakkaġa ilivsiññun una. Taivrumani unnuami aitchuutausaġviŋmiñi, Atanġum Jesus tiguŋagaa punniq,

²⁴ aasii quyyatigiqqaaqługu God-mun, ilaan avguŋagaa aasii uqallakłuni, Tavra taamna ittuq timiptun aitchuutigikkaptun tuqqutivlusi. Tainna pisiuŋ itqautigilugu uvamnun.

²⁵ Tainnatun suli ilaan tiguŋagaa qallugauraq wine-mik imalik nullautchianikamiŋ, uqallakłuni, Una wine qallugauramiittuaq ittuq uvaŋa auptun maqipkaqtauyumaaqtuatun, God nutauruakun sivunniuġurriyumiñaqsiḷugu iñuŋnik tuqqutipkun. Imiġuvsiuŋ piyumagiksi itqautigilugu uvamnun qanutun akulaisigilugu imiġaluaġuvsiuŋ.

²⁶ Tavra qanutun akulaisigilugu niġiguvsiuŋ punniq imiġlusiḷu qallugauramiñ, taavrumuuna maniuġiksi Atanġum tuqqutaa qaitqigñiŋanun aglaan.

²⁷ Tainnainman taamna, kiñaliqaa niġiruaq punniġmik imiqtuaġlu Atanġum qallugauraŋaniñ nalliummatiŋitchuakun piḷġutchikun, pasirauyumiñaqtuq qutchiksuakun isumakkutigiŋiññiḷugu Atanġum tuqqutaa.

²⁸ Taamna pisigilugu iñuk qanuqitilaaqqaaqtuksraupiaqtuq inmiñun, aasii niġiḷuni punniġmik imiġluniḷu qallugauramiñ.

²⁹ Qanuq kiñaliqaa niġiruaq imiqtuaġlu itqaumagiŋiḷḷaan sivuniŋa Atanġum tuqqutaata tatavsausiaksriuqtuq inmiñun.

³⁰ Tainnauvva piŋavlutiŋ iñugiaktuat iḷasi sayaitchut, naŋittuagurullu, suli iḷasi tuquvlutiŋ.

³¹ Qanuqitilaaġuugupta uvaptiŋnun nalaunŋaruakun, Atanġum ilaan qanuqitilaaġayaitkaatigut.

³² Tavra Atanġum ilaan qanuqitilaaġmatigut aasii paqitaġivluta pasiraksrauvluta, ilaan tatavsaġayukkaatigut, uvagut suksraunġiqsauqatautquŋił̣ł̣uta isuitchuamun piqatigilugich nunam iñuŋi.

³³ Aniqatiitkaa, taamna tainnainman, utaqqisillaayumausi qakuguliqaa katitkuvsi atautchimun niġisuglusi Atanġum nullautchiġvianik.

³⁴ Kiñaliqaa kaakkumi niġisuiqsaaġli aimmiḷuni. Qanuq niġiqatigiikavsi atautchimi, aullasivsi iḷaanni tatavsausiaqaqtitpiaġaasi. Allatigun sutigun piraksriġñiaġivsi qaiguma.