1 Corinthians 10 - Iñupiatun Mumiksat Uqalugiksuat

Kiliktuusiat Iñuuraqpaktigun

¹ Aniqatiit, itqaqsiuŋ suna piŋatilaaŋanik iŋiḷġaan maŋŋuuptiŋnun nunagluktuami. Nuvuyaŋata God-im aullatiŋagai iluqaisa, suli iluqaġmiŋ pisuaŋarut paliumaruakun nunakun ikaaqługu imaq.

² Tamatkunuuna nalautamikkun nuvuyakullu imikullu piqasiutiŋarut Moses-mun, aasii tamatkunuuna paptaiqsaummatun piŋarut Moses-mun.

³ Aasiisuli iluqaġmiŋ niqiqaŋarut God-im pamarrutiŋiñik aliuġnaqtuakun,

⁴ iluqaġmik suli imiqaġmivḷutiŋ imiġmik God-im pamarrutaanik aliuġnaqtuakun. Qanuq imiġiŋagaat imiq maqipkaqtitauruaq aliuġnaqtuakun uyaġagruaġmiñ, aasii taamna uyaġagruaq arrilisauruq Christ-mun.

⁵ God-im qaunagilluataġaluaŋŋaisa, iñugiagniqsrat iviġaummatigiŋaitkai, aasii ilaan suksraunġiqł̣ugich nunagluktuami.

⁶ Tavra tamatkua piŋaruat taimani kiliktuutaurut uvaptiŋnun, kilikłuta kipiġniuquŋił̣ł̣uta pigiitchuanun, maŋŋuuruat piḷġusiatitun.

⁷ Ukpiqtaunasi sunun God-auŋitchuanun taipkua iḷaŋisa piḷġusiatitun. Taavrumuuna aglausimaruq Bible-ni inna, “Iñuich aquvinŋarut niqinaqisaqłutiŋ imiġukłutiglu, aasii makinmivḷutiŋ uamitchukłutiŋ.”

⁸ Allatuqtauŋitcha taipkua iḷaŋisitun, 23,000 tuqummata uvlumi atautchimi.

⁹ Uvagut uuktugaksraġiŋitkikput Atanġum qimmaksaliyairrutaa taipkua iḷaŋisa piḷġusiatitun, suksraunġiqsauruat tuqunaliŋnun nimiġianun kiŋmaqtiłługich.

¹⁰ Suli uqamayuktuksrauŋitchugut iḷaŋisasuli piḷġusiatitun, suksraunġiqsittuat isaġulganun tuqqutim.

¹¹ Iluqaġmiŋ tamatkua nalautaġikkaŋich piŋarut iliŋiññun, uvaptiŋnun arriḷisautquvlugich, suli aglaaguvlutiŋ uvagut kiliktautquvluta piḷuksitquŋił̣ł̣uta, uvagut iñuuruaguut aqulliġñi uvluni.

¹² Tavraasii kiñaliqaa isumaqaġumi suaŋarualiḷuni ukpiġunmiñi, qaunagili piḷuksisuŋiḷḷuni.

¹³ Qanupayaaq ikł̣igutchaktinniaqtauguvich, tainnatchikuttauq iluqaġmiŋ iñuich ikł̣igutchaktinniaqtauŋammiut. Aglaan God ukpiġnapiaqtuq, ikł̣igutchaktinniaqtaupkaġniaŋitkaatin qaaŋiġḷugu manimmiyumiñakkan. Ikł̣igutchaktinniaqtauguvich, ilaan akimmasiġñiaġaatin akimayumiñaqsiḷutin.

¹⁴ Taamna tainnainman, uvaŋa piviuttaġivlusi aniqatiitkaa, ukpiqtuksrauŋipiaqtusi sunun God-auŋitchuanun.

¹⁵ Uqautigivsi isumaturuatun iñuktun iḷivḷusi. Isivġiqsigik ilivsiññik uqaluŋma iḷumun itilaaŋat.

¹⁶ Atanġum nullautchiġvianik pikapta, suli imiqłuta qallugauramiñ quyyatigiŋakkaptiŋniñ ilaanun, iluqata piqatigiiksinmatun pisuurugut, iḷaŋiutiniġmi anniqsuusianun Christ maqipkaqtauŋaruamiñ auŋaniñ. Suli niġikaptigu punniq atautchimiiłłuta, iḷaŋiutimmatun pisuummiugut anniqsuusianiñ piruaniñ Christ timaaniñ tuqutauŋaruamiñ uvagut pisivluta.

¹⁷ Aasii pisigivlugu iluqata niġiñiqput atautchimiñ punniġmiñ, uvagut atausiŋŋuqtitaurugut atautchisun timitun.

¹⁸ Uuktuutigilugu una, isummatigisigik Jew-guruat piḷġusiŋich. Tamatkua niġisuuruat niġrutinik aitchuutauŋaruanik ikipkaiviŋmi piqasiutisuurut God-mun.

¹⁹ Uvva iḷisautiniḷukkivsi tamatkua niqit aitchuutauruat iñuuraqpaŋnun suuŋitchut, iñuuraqpaitchauq suuŋiñmatun.

²⁰ Sivuniġigiga ukpiŋaitchuat aitchuikamiŋ ikipkautinik iñuuraqpaŋnun, aitchuirut ilitqusiqł̣uŋnun God-mun pigaluaġnatiŋ. Piqasiqsuutitquŋitkivsi ilitqusiqł̣uŋnun.

²¹ Imiġniaŋitkisi tapillugik qallugauraŋalu Atanġum qallugauraŋallu ilitqusiqł̣uich. Iḷaŋiutiyumiñaiñmiusi Atanġum niġġiviŋiññiñ iḷaŋiutilusiḷu niġġiviŋiññiñ ilitqusiqł̣uich.

²² Ataniġmun qinnautipkaġniaŋaiqsa, qanuq iḷisimarusi suaŋałhaaŋitchugut ilaaniñ.

²³ Supayaat piñaiḷauŋitchut, tainna uqaġuurusi. Aakkaluaq, aglaan iḷaŋich ikayuutaulaitchut iñuum ukpiġutaanun. Supayaat piñaiḷauŋiññigisi, aglaan iḷaŋich suli qapiŋaisaaġutauŋitchut iñuum ukpiġutaanun.

²⁴ Piḷġutchiñi nalaunŋanasugalugich pisuukkavsiññi, anniqsuqsałhaaġlugich siḷallisi piraġutitchi, ilivsiññułhiñaq piŋaiġḷusi.

²⁵ Niġġisiuŋ sunapayaaq tunirauruaq niqipianik tuniuqqaiviŋmi salapqiiñiaŋaiġḷusi qanusipayaamik nalupqitchautiksramik isumami,

²⁶ qanuq Bible-ni uqaluk aglausimaruq, “Nuna Atanġum pigigaa, suli sunapayaaq nunamiittuaq.”

²⁷ Iḷaŋata ukpiqtuaguŋitchuat aiyugaaqpasi niġiyaqtuqulusi aiyugaaqtauniġuvsi, niġġisiuŋ sunapayaaq inillaktauruaq sivuqqavsiññun salapqiiñiaŋaiġḷusi qanusipayaamik nalupqitchautiksramik isumami.

^28-29 Aglaan iñuum uqallautikpasi inna, Taamnauvva niqi ilaaguaqtauŋaruaq iñuuraqpaŋnun, tainnaqpasi niġġiñagu, pisigilugu taamna kiliksiruaq ilivsiññik, qanuq nalupqisukłuni isumamiñi nalaunŋatilaaŋanik niġiruni kilikkaasi. Iḷaanni apiqsriñiaġugnaġmiusi, summanmiuvva niġiḷḷaniġa aŋalanniaġmivauŋ iñuum allam?

³⁰ Niġiḷḷaanigniġuma supayaamik quyyatigiŋakkamnik God-mun, summan iñuich pasiñiaqpanŋa niqitigun niġikkapkun?

³¹ Innauvva ittuq. Niġiñiqsiḷu imiġniqsiḷu naagga sunapayaaq pikkaqsi, God-im nanġausiaqautigillaliuŋ.

³² Sumik piññasi piñaiḷutchiutauyumiñaqtuamik iñuich ukpiqtuaġuġniksraŋannun, Jew-gugaluaqpata, Greek-gugaluaqpata, naaggaunnii God-mun aŋaiyyuliqiruanun.

³³ Piraġutitchiḷi uvaptun. Iviġagniḷułhaaġaġigitka iñupayaat supayaatigun pikkapkun. Uvamnun anniqsuġniałhaalaitchuŋa, aglaan allat annaurrautqugaluaqługich.