1 Corinthians 1 - Iñupiatun Mumiksat Uqalugiksuat

¹ Ukua tuyuutit qairut ilivsiññun Paul-miñ, God-im ququaŋaraŋaniñ tilirautquvlugu Christ Jesus-mun, aniqatiptiŋniḷḷu Sosthenesmiñ.

² Tuyuutaurut ilivsiññun Corinth-miittuanun, God-mun aŋaiyyuliqiruanun, ilaaguaqtauruanun God-mun ukpiqłutiŋ Christ Jesus-mun, God-im ququaqtaŋiñun iñugisukługich, iḷagivlugich iñupayaurat sumiḷiqaa aŋaiyyusuuruat Ataniptiŋnun Jesus Christ-mun, ilaisaptauq Ataniġikkaŋannun.

³ Nagliktuusiaqpaqaġitchi tutqiunmiglu God-miñ Aapaptiŋniñ, Ataniptiŋniḷḷu Jesus Christ-miñ.

Ikayuusiasi Ukpiliqavsi Christ-mun

⁴ Ataramik quyyavigisuugiga God pisigivlugich nagliktuutiqpakun ikayuusiasi ilaan aitchuutigikkaŋi ukpiliqavsiqaŋa Christ Jesus-mun.

⁵ God-im savaŋagai iñuutchisi nakuusił̣haaqługich uqaqtuaġumiñaqsivḷusi ataramik inmigun, suli iḷitchuġiyumiñaqsivḷusi iluqaanik iḷumun ittuamiñik.

⁶ Nutauruakun iñuuniaġusiḷiutikkavsigun iḷisimanaqsiŋagiksi nalupqinaiqł̣ugu akuqtuiŋatilaaqsi tusaayugaaġiksuamik Christ-kun.

⁷ Suli ayuqsraŋił̣ł̣usi qanusipayaamik aitchuusiamik Ilitqusiġiksuam aitchuutaanik, utaqqiḷḷavsi qaiñiksraŋanik Atanipta Jesus Christ.

⁸ Ilaan qaunaginiaġaasi tuniqsimalusi ukpiġutiqaġumiñaqsiḷusi isuanun-aglaan, pasirauyumiñaiqsaġlusi Ataniqput Jesus Christ qaikpan.

⁹ God ukpiġnapiaqtuq, aasii ququaŋagaasi piqatautquvlusi allanun iḷauraaliutiniġmi Iġñiġmiñun Jesus Christ-mun Ataniptiŋnun.

Aŋaiyyuliqiruat Atiŋirrutiŋich

¹⁰ Aniqatiit, iluqata atausiŋŋuqatauŋaruaguut Ataniptiŋnun Jesus Christ-mun, piviuttaġivlusi apiġigivsi atitquvlusi, ilivsiguaqtaŋaiġḷusi aglaan atiruamik isumaqaquvlusi, suli atiruamik isivġiutiqaġlusi.

¹¹ Qanuq quliaqtuaġutiŋagaanŋa Chloe-m iḷaŋisa qanaaġutisuunivḷusi, aniqatiitkaa.

¹² Uvvauna sivuniġigiga. Atausiullaavlusi uqaġuumavlusi uvaŋa Paul-kuayaaguruŋa naagga Apollos-kuayaaguruŋa naaggaqaa uvaŋa Cephas-kuayaaguruŋa naagga uvaŋa Christ-kuaqtuŋa.

¹³ Tainna Christ avguqsiyumiñaitchuq. Iḷisimarusi uvaŋauŋitchuq Paul-guruaŋaa kikiaktuurrauŋaruaq aŋarrauramun pisivlusi. Iḷisimammiusi uvaŋa Paul-guruaŋaa atausiŋŋuqatigiŋaitkivsiŋa paptaiqsaukavsi.

¹⁴ Quyammiuŋa paptaiqsiŋaiññama iluqavsiññik aglaan Crispus-mik Gaius-miglu,

¹⁵ iḷaanni iḷari uqallakkayaġugnaqtuaq atausiŋŋuqatauniḷuni uvamnun paptaiqsaukami.

¹⁶ Paptaiqsiŋagaluaġmiuŋa igluqatiŋiñik Stephanas. Taavruma allaagun naluruŋa paptaiqsiŋatilaamnik kimik.

¹⁷ Qanuq Christ tiliŋaitkaaŋa paptaiqsiyyaquluŋa aglaan alġaqsruitquvluŋa tusaayugaaġiksuamik. Aglaan alġaqsruikama uqayupiaġataġluŋa iñugruiññaich isumattutaatigun piḷaitchuŋa, iḷaanni iñuich uqayupiaġataġniġma maliksuktitpiaġai, iḷumun ittuałhaaŋiḷaam Christ tuqqutaata aŋarraurami.

Christ Suaŋŋatigigaa Isumattutigigaalu God-im

¹⁸ Qanuq alġaqsruiñiq ilaan tuqqutaagun pisigivlugich iñuich piḷuutiŋich, qiññaqaqtuq asiḷiqqutauruatun iñuŋnun suksrauyumaaqtuanun. Aglaan uvaptiŋnun annaurrauruanun, suaŋŋatigigaa God-im.

¹⁹ Bible-ni aglausimaruq inna. “Iḷisimanaqsiñiaġiga anniqsuutauŋisilaaŋa isumaturuat iñugruiññaich isumattutaat, suli suunnauŋaiġḷugu iñugruiññaich kaŋiqsisuġniŋat.”

²⁰ Taamna tainnainniġman, qanuġniaġniqpat isumaturuat iñuich? Qanuġniaġmiñiqpat pitquranik iḷisaurrit, tamatkualu qapiqsaiḷiralguruat? God-im qiññaniktinŋagai isumalluaġiitchuatun, iḷisimanaqsivḷugu ilaisa iñugruiññaich isumattutaat asiḷiqqutautilaaŋanik.

²¹ Qanuq God iḷumun isumaturuaq sivuniqaŋaruq iñuŋnun iḷitchuġiyumiñaisilaamiñik iliŋisa nanmiñiq isumattunmikkun. Aglaan iviġaumagiŋagaa annautisukługich iñuich ukpiġikparruŋ tusaayugaaġiksuaq, qiññaqaqtuaq asiḷiqqutitun nunam iñuŋiñun.

²² Jew-guruat apiqsrirut aliuġnaqtuanik aasiiḷi Greeks isumatusiñiatavsaaqtut.

²³ Aglaan alġaqsruutigigikput Christ, kikiaktuurrauŋaruaq annaurri, Jew-guruat piavsaktautaat aasiiḷi qiññaqaqłuni asiḷiqqutitun Jew-guŋitchuanun.

²⁴ Aglaattauq iñuich ququaqtauruat ukpiquvlugich Jew-gugaluaġmata Greek-gugaluaġmatalu Christ God-im suaŋŋatigigaa annaurriñiġmun isumattutigigaalu.

²⁵ Qanuq iñuich isummatiŋiññi God-mun asiḷiqqutiginasugikkaŋat, isumattutaułhaaqtuq iñuich isumattutiŋiññiñ, suli iñuich isummatiŋiññi God-mun suaŋairrutiginivḷugu Christ tuqqutaa, suaŋałhaaġmiuq iñuich piḷḷakkaŋanniñ.

²⁶ Isummatigisitchi ilivsiññun, aniqatiit, ilivsi ququaqtauŋaruasii ukpiquvlusi. Iñugiaŋitchusi isumaturuaguŋaruasii, iñuich naipiqtuutaatigun. Iñugiaŋiñmiusi atanaurauruat. Iñugiaŋiñmiusi aniŋaruasii suġalliruatigun.

²⁷ Qanuq God-im piksraqtaaġiŋagai iñuich isumakkusiaqaqtuat nunam iñuŋiñiñ isumalluaġiiññivḷugich, kanŋutchaksaqługich isumatunasugiruat inmiŋnun isummatigikamiŋ. Tainnatuttauq God-im piksraqtaaġiŋagai suaŋaitchualiaŋich iñuich naipiqtuunmikkun, kanŋutchaktitchaqługich suaŋanirauruat.

²⁸ Aasiisuli God-im piksraqtaaġiŋagai iñuich kamasaaŋitchuat, suuŋiḷaġirauruallu, isumakkusiaqaqtuallu suuŋiḷatun nunam iñuŋiñiñ, ilaan suuŋiḷaġuqtitchaqługich iñuich kamanaqtualirauruat.

²⁹ Tainna God piŋaruq, atausiuraq-unnii iñuk uqavigaaġumiñaiqsaqługu sivuqqamiñi.

³⁰ God-im aitchuŋagaasi iñuullasivḷusi isuitchuamun, qanuq atausiŋŋuqatigiŋagiksi Christ. Aasii atausiŋŋuqatigiŋakaptigu Christ, ilaan isumatusipkaŋagaatigut God-im isumattutaanik, suli nalaunŋasivḷuta, ilaaguaqłutalu God-mun, suli tasuqłuta. Tainna God sivunniuŋaniqsuq,

³¹ taŋŋiġumiñaqsisaqługu aglausimaruaq Bible-ni inna, “Iñuk uqavigaaġniaġumi uqavigaaġutiqaġli Atanġum iñiqtaŋiñik.”