YURAS 1 - Nanduk Ngget Tul Pidnak Wene

Wa yak indid wene 1-2

¹ Yesus Kerisut ndegel oboso nap, Yakobus owot Yuras an-nen-e Nineid Mbal Pem Nagawan ebem-nen kenabuwa worak nap, Yesus Kerisut amanggim ndegel konposolar-e, Mbal Pem Nagawan-nen wene mbo kinpid nap kit kenmanggim engga yu mbarusu-o.

² Nde, ap unpud kaso elem min lambuksa woragwi elem min ap enabuwa kaso elem min mondok kwarat kobongsa irit kinmin wolmag-o.

Enesiget wene mul undugwi nap enpem mburak wene 3-16

³ Nanggamirak kenabuwa worak wa-e. Nit totno ninmiri yidnak wene iri na engga kenmanggim mbareyekluk yosoma-t nde, an nindi-nen perasolar-e: Lag-o. Yawo-ge Mbal Pem Nagawan-nen at winde nap mondog-et wok indidnak inndi angin tubu yugwi wene na amanggim kenmawi kondogolat wolmer-o luk nggomo kundurak wene engga bem mbal kundurak perak nde nggulog-o luk peragi-o.

⁴ Mbal Pem Nagawan enaru buk nap erep nit nennggendumu tirabo nggwiga iri-ge obi-net Mbal Pem Nagawan engga bem-nen it enpem mburak wene urul paga pij-o. It iri-nen-e it enaboro-nen ukwe ukwe yugwi mende kwaruwoklug-e, Mbal Pem Nagawan-nen we wok ondoso elem-e nden penden tak pili-o. Nde, nit-nen idnak amawi worak Yesus Kerisut, Nenagawan Indo iri-ge it-nen-e ndemerer-o luk eberagwi bug-o.

⁵ Wene yu oboksa-ge kit kenaru-t nde, an-nen yeberak kenpeyeg-o. Nagawan Indo-nen-e Isarael nap iri-ge o Mesira-nen inmiri yij-et nde, abok nggwe-ge at ebem inndi angin tubu yigit lak nab-e at-nen lak tak enpamu-o.

⁶ Wene misik yu na yebet yebet tak wolmer-o. Nde, aid nap ereb-e it inpid-nak sa-t wolmomtag-et nde, it enambik ondoro keya buruk, o nin sa mbiriga me, Mbal Pem Nagawan-nen-e pem-et wolmomtak posid kere-nen kamasa ndamuk arem inpil nggwidnak worali-o. Nde, enpem wene mbarurak Tarem nggulok wok yosola, it enpem wene mbaruwa-o.

⁷ Nde, o Sorom min Nggomora min inggi inggi woragwi o siri erep min yebet yebet tak wolmer-o. Aid nap-nen kwariga nggal, o iri me nap-nen-e mbabi kwarogolat, kwarugwi buk mende mondok meya na kwarigarik pem-e, lak momtak puk kanduk iri-nen nok inpid iri-ge ap pidsa inndi wanuwakluk kwat enpamu-o.

⁸ Nde, yawo-nen na ap ereba-nen-e iri nggal-et kwatli-o. It-nen nabi kogol nggwe kaidnak mende na langgal luk mborogolar-e, it ondomok enpe meya rak pogolat, Mbal Pem Nagawan amawi na te rak pogolat, aid arem woragwi abinal worak mende na mbilaro ngin wene yak ondogolat yili-o.

⁹ Iri kwatli iri-ge, aid nap nagawan Mikael na-nen iri nggal kwarigit lag-o. Mikael na-ge Musa orogak wene lit lit Sere imin ngguno pogolar-e, Mikael-nen Sere na mbilaro ngin wene yak turag-e kwiye ala, yu nggal yak tij-o: ”Nagawan Indo-nen met kubuwa-o” luk yij-o.

¹⁰ Alat nde, ap iri-nen-e it enaru buk mende nde mbilaro ngin tak pili-o. Nde, indi lak mende ndak wiridnak-nen yebet kaso nggal, it-nen yebet kagwi mende iri-nen-e it lak tak unpusu-o.

¹¹ It iri-ge Kain-nen mbiridnak tu na nggwe mbiriga-o. Iri-nen Mbileam-nen onggo waneyekluk enesiget wene yid nggal, it-nen na iri nggal kwariga-o. Iri-nen Kora-nen Mbal Pem Nagawan-nen yidnak wene kuruk tidnak pem at lak tak ibid nggal, it-nen na Mbal Pem Nagawan ene kuruk togola, lak tak inpid nap iri-ge enabuwa-o!

¹² Kir-e kenggamirak inmin kondogolat-nen nunggwi mende nggok saguruk nonggola tarem it inmin nonggola-ge, it iri-ge innggiri lak kasa kasa nili iri-ge kik tak konpogolat, it ondomok nak nggok tak pili-o. Nde, obube-nen puk kaso nggan nggan-et nde, talme waruk lobok yoso buk nggan nggan nggal, e engen poso tarem-et nde, engen poso buk e nggal, elem konak pidnak ma mondok umbuk yidnak e nggal-et it-nen yili-o.

¹³ It iri-ge yi koma nggulok-nen yi nggweyerep nggwayarep lobok yosolar-e, yi eragup nam tak poso nggal, it ondomok innggiri kagwi mende nam tak pili-o. It iri-ge kasa waring kaso wonaru nggal-nen yili-o. Nde, Mbal Pem Nagawan-nen it onndoro-ge pem-et mondok ndamuk nak woraso sa iri me it enmanggim lid lud tak pidnak worasu-o.

¹⁴ Aram-nen wigak yil yil ap tap tuju bem tak posolat-nen ndet yidnak nap Enok iri-nen it kwat unpurak urul posolar-e: ”Yu nde ker-o! Nagawan Indo-nen idnak marak aid nap kere mondok wonarurak puk (beribu ribu) na inmin luk lobok yosolar-e,

¹⁵ ap oboksa enpem wene mbareyekluk lobok yuwa-o. Nde, Mbal Pem Nagawan-nen kwaroso nggal kwarugwi buk nap oboksa-nen Mbal Pem Nagawan-nen kwaroso buk mende kwarogolat woraidnak mende oboksa min Mbal Pem Nagawan-nen kwaroso mende kwarugwi buk meya nak kwarugwi nap-nen Mbal Pem Nagawan imin meya wene yidnak iri bem-nen-e it enpem wene mbaril lobok yuwa-o” luk yij-o.

¹⁶ It iri na-ge pempa onpok pegerak mbogolar-e, nin nap enpem ujwa mbarogolat onpok pugwi-o. It ondomok inndi-n pidnak nak kwarogolar-e, it ondomok nggulok tak pogolat, ap enarengge lesa wanuwokluk, nin nap entembel wanugwi-o.

It inndi angin tubu yidnak na tugup lag-et wolmakluk nggomo indidnak wene 17-23

¹⁷ Alat nde, nanggamirak kenabuwa worak wa-e. Nit Nenagawan Indo Yesus Kerisut-nen idnak wirik inpidnak nap-nen nanduk yak kindiga wene na-ge yebet yebet tak wolmer-o.

¹⁸ It-nen yak kondogolar-e: ”Woroksiyem wok yosola-ge, kit pesel kunpurak nab-e nam luk, it enaboro-nen ukwe ukwe yugwi mende, meya mende iri nak langgal luk mburuwa-o” luk yak kindiga nar-o.

¹⁹ It iri-ge, Konak Indi it enarem lak me, it enaboro-nen ukwe ukwe yugwi mende nak kwarugwi bem-e ap kuri worak unpugwi-o.

²⁰ Alat nde, nanggamirak kenabuwa worak wa-e. Kit perak nde, kit na kit-net kinndi angin tubu yigep mondok marak wene iri na bem-et mendak woragolar-e, Konak Indi amawi bem-et tepan yogolat wolmer-o.

²¹ Mbal Pem Nagawan-nen ap enabuwa kaso elem pem woragolar-e, kit na kit-net kinndi ndegel koragolar-e, nit Nenagawan Indo Yesus Kerisut-e nit nunpud-nen nunlug-et woralik nalik momtak elem wok nunduwakluk, yik karok wolmer-o.

²² It inndi mberen woragwi nap enabuwa kagolar-e,

²³ it inmiri yuwakluk, kanduk arem-nen lesa inpil lumer-o. Nde, ap erep na enabuwa kagolar-e, kinndi kwiye min-et enabuwa kagolar-et nde, it unsum it enaboro-nen ukwe ukwe yugwi mende-nen kik tak pidnak sum iri-ge kinsili rak pugup na-e.

Worok tak posolat tepan yid wene 24-25

²⁴ Kit pijaksa mbugup naru, tugup lak tak kunpurak amawi worak Nap, mondok kopkap lak, kenalin kenalen min-et at unu kek tak woraso eram kunpuwa Nap,

²⁵ arig-et woraso Mbal Pem Nagawan, nit Ninmiri Yoso Nap iri amanggim-e nit Nenagawan Indo Yesus Kerisut na ebem-nen-e abinal min kek tak woraso elem min amawi elem min at-nen tenagoso elem min-e obi ereba kuri-net, yawo-nen na, woragolat nagolat na at amanggim-et wolmag-o. Amen.