YUNUS 4 - Nanduk Ngget Tul Pidnak Wene

Yunus-nen isilepma yidnak wene min Mbal Pem Nagawan-nen ap meya yidnak amberam tak poso wene min 4:1-11

¹ Yunus iri na-ge it-nen kondok yogola, it-nen meya yidnak amberam tak pusu iri na karug-e, mondok isili yosolar-e, isilepma nde yij-o.

² Isilepma yosolat-nen tepan yosolar-e: ”Nagawan Indo wa-e. Nanduk an-e nama-nen lobok yigit lak ma-net yu nggal-et kwarugun-o luk yigi na-ge lag-a? Iri ala karuk-nen an-e nok Sepaniol nggwe mbereyekluk yigi nar-o! Kar-e Mbal Pem Nagawan ap enabuwa kaso elem, unpud kaso elem, mamak puruk worasolat, yemnak nak kwarosolat, meya rak unpurak yidnag-et nde, pempa kindi luruk posolat yoso Mbal Pem Nagawan kar-e an-e naru-o.

³ Nagawan Indo wa-e. Yawo-ge an-e mondok wat yeg-o. Mondok nuruk wolmomtag-e nimbir-o. Mondok wat yeg-o” luk yij-o.

⁴ Yosoloma, Nagawan Indo-nen onggo yosolar-e: ”Kar-e erem lak ma kisilepma iri nggal yurag-e meya-o” luk yak tij-o.

⁵ Yosoloma, Yunus na-ge mo luwaso ambigit (timur) nggwe mberarik woralar-e, o lije misik wutluk iri na arem nginmu ereba me kore yij-o. Iri na me koreyak woralar-e, o Niniwe siri iri ebem-e no mende nggal mbuwa-o luk, yik karok ereba-t woragij-o.

⁶ Nagawan Indo-nen-e ol kere ari misik yabamu, ol kere iri na-ge miyuluk mborosolar-e, Yunus anggul pem wigara labuk yamu, ar-e iri na indipma nginmu woralar-e, Yunus iri na-ge alen yij-o. Ndemeret Yunus iri na-ge ol kere yak yid iri na bem nde alen kasolat woragij-o.

⁷ Alat nde, kup o nda yosolat kil posola ereya na-ge Mbal Pem Nagawan-nen lugum misik kwarak pamu, ol kere iri na emengen mbarosola-ge, ol kere iri na-ge terabet leyok yij-o.

⁸ Nde, iri yamu, o nda yosolat mo pil wasolar-e, Mbal Pem Nagawan-nen o wija embem worak irit mo luwaso (timur) nggwe-nen puk yaga pil lobok yosola-ge, Yunus na-ge embem-nen anggul-e pagaidnak nggal embem kere yosolar-e, mo eyak-nen wat yekluk irit yij-o. Iri yosolar-e, wat yurak ip opsa irit yosolat-nen yosolar-e: ”An-e nuruk wolmomtak nimbir-o. Mondok wat yeg-o!” luk yij-o.

⁹ Alat nde, Mbal Pem Nagawan-nen Yunus yak tosolar-e: ”Kat-nen ol kere iri bem kisilepma yurak iri-ge ndak ndag-e lag-o” yosoloma, Yunus-nen onggo yosolar-e: ”Noluk-nen nisilepma yigit lak yurag-o? Mondok nisilepma kwarat yosolat wat momtak iri-ge ndak-net yusu-o!” luk yij-o.

¹⁰ Yosoloma, Nagawan Indo-nen Yunus yak tosolar-e: ”Ol kere iri-ge tup yarik mborosolar-e, misiget nak nene luk, kub-e terabet yij-o. Iri-ge kat-nen wirik posolat, kat-nen ngen mbarosolat woraigen-e lag-o. Alat nde, iri terabet yidnak pem-e kar-e kindi kalok yusu-o.

¹¹ Iri ala, noluk-nen an-nen Niniwe siri nggok iri na nindi yebet eneyasolat, numud eneyagit lak yurag-o? Nde, iri me-ge wam-e kwarat, wonarurak pug-et worasu-t nde, iri me-ge konak min meya min lunugwi buk li marig-e 120.000 ombol nggwe nggal worali-o” luk yij-o.