YUNUS 3 - Nanduk Ngget Tul Pidnak Wene

Yunus-nen Nagawan Indo-nen yidnak yidnak kwarid wene 3:1-10

¹ Mberen pem tak posolar-e, Nagawan Indo-nen Yunus na-ge wene yak tij-o.

² Yak tosolar-e: ”Kar-e Niniwe siri nggok iri me mbiri-o. Mburugundig-e, o iri me woragwi nab-e an-nen yak undurak kebem pigi irit yak undurag-o” luk yak tij-o.

³ Yosoloma, Yunus iri na-ge Nagawan Indo-nen yidnak yidnag-et kwarosolar-e, Niniwe o siri mondok nggok iri na me mbirij-o. Nde, o siri iri-ge nggok me, o siri kibiril mborogolar-e, kenan nene yugwi-o.

⁴ Yunus iri na-ge o siri iri na me nggwarik, misik tarem aptusa mbirid mbirid, misik me wokluk, aid wene yak ondoso tel korosolat-nen yosolar-e: ”Empat pulu tarem nak worarug-e, Niniwe siri yu-ge mondok yigisa lak tak puwa-o!” luk yij-o.

⁵ Iri yosola-ge, Niniwe woragwi nab-e Mbal Pem Nagawan-nen yidnak wene iri na-ge ”Mondok ndemerer-o” luk yebet kaiga-o. Iri luk, Niniwe woragwi nap oboksa nggok-nen marik-nen ”Niri nera-nen meya kwarige-o” luk, kondok yogolat-nen yurugwi sum karung sum nak yutluk woragolat, ”Nunggwi mende ninggit lak tepan nak yogolat wolmog-o” luk wene mbariga-o.

⁶ Nde, iri wene iri na Niniwe nagawan iri na-nen kulurug-e, ereya na-net at koreyak woraso sa-nen mbosolar-e, nagawan-nen o tena woragolat-nen yurugwi sum iri na-ge yonggora keya buruk, niri nera-o luk, kondok yogolat-nen yurugwi sum karung sum iri na yirij-o. Yutluk yarig-e, mabe bem ereba na koreyak woragij-o.

⁷ At-nen na wene misik wirik posolar-e: ”Iri nggal kwarurag-o yidnak wene yu-ge nagawan min at indipma ap yok nggok ereba na min-nen mbaridnak wene yu-ge Niniwe woragwi nap enmanggim wirik pogolar-e: ap oboksa-nen na irit, sapi min lomba min wam erep min-nen na irit, mondok nunggwi mende min yi min-e norak pug-o.

⁸ Ap-nen na irit, wam-nen na irit, mondok karung sum nak yururag-o. Ap oboksa-nen niri nera meya kwaroso-o luk, kondok yogolar-e, ap oboksa-nen ndemeret kinndi-net Mbal Pem Nagawan eram tepan yurag-o. Nir-e mondok nenpage konogolat, nit-nen meya nak kwarugwi iri konogolat wolmomtag-o.

⁹ Iri nggal kwarogola-ge, Mbal Pem Nagawan-nen-e at indi-nen kwat nunpurak pidnag-e keya bosoluk, nenabuwa yosolar-e, lak tak nunpuwa buk nde ma-o!” luk wene wirik pij-o.

¹⁰ Iri kwarogola, Mbal Pem Nagawan-nen-e it-nen kwatli iri na-ge kagaij-o. At-nen yik kasolar-e, it-nen meya kwarugwi enpage iri na-ge keya bidnak irit kagaij-o. Karug-e, at-nen-e lak tak unpurak indi yemnak pid iri na luruk tak posolar-e, lak tak unpurak yid iri na-ge larok yij-o.