YUNUS 2 - Nanduk Ngget Tul Pidnak Wene

Yunus-nen tepan yidnak wene 2:1-10

¹ Yunus iri na keyane iri na urum arem woralar-e, Nagawan Indo Embal Pem Nagawan eram tepan yosolar-e:

² ”Nagawan Indo wa-e. An-e anggun panggun arem woralat, kat keram wene mbo bil luwasola, kat-nen nene erep nggarigen-o. Yongga noronokluk wat yidnak nap woragwi sa-nen ngge yak korosola, kat-nen kuluruk, kwara yebet neyaigen-o.

³ Kat-nen-e yubuk tak ma mbo nibil nggwigenma, yi koma erabun pem ud me-t wok yigi-o. Iri me-nen-e yi amawi-nen muruk tak nibij-o. Yi koma puk kuruk ket mbet suarep mbuwarep lobok yosolar-e, an-e lel yaga mbud tak nibij-o.

⁴ Nindi arem nak-nen yosolar-e, Nagawan Indo-nen-e at eram-nen langgara wirik nebamu me, at woraso sa at uwi marak iri na-ge an-e mondok tugurug-e kamin pug-er-o luk peragi-o.

⁵ Nde, yi-ge nemndembu kuri yubuksa keya nobosolat, yi koma nggok yemarak iri na-nen nebe obok muruksa keya nobosolat kwarij-o. Lorokmid-nen nanggul muruk tak pij-o.

^6-7 Nde, ndobo mabin erabun ud na me-t yubuksa mbigi-o. Mbiginggal-e, mondok mbururak puk tu mid wosa lerak sa nde mbigi-o. An nindi-ge namawi lak pabik paboksa woralar-e, nindi-ge kat yebet keyaruk, kat keram-et wene mbo bil luwagi-o. Iri yosola, an-nen tepan yigi-ge kat kuwi marak iri na me-t worasoma, kuligen-o. Iri yosola karuk, Nagawan Indo Nembal Pem Nagawan wa-e! Yi koma arem-nen kat-nen nibil laigen-o.

⁸ Kugwiwak ebe lak ereba na erembel wanugwi nab-e kat keya kobogolat, tugup lak kat-nen yidnak yidnak kwatli bug-o.

⁹ Alat nde, an-e ndawi bem kerembel wanosolat, kat kamanggim wam wosa posolat kwarimin-o. An-nen ’Irit kwarimin-o’ luk urul pigi-ge mondok kwarimin-er-o. Nde, kar-e inmiri yoso Nagawan Indo-nen yusu-o” luk yij-o.

¹⁰ Nagawan Indo-nen ”Irit kwarurag-o” luk keyane iri na yak tidnak pem keyane iri na-nen Yunus na-ge yi eyak pem kela keya bij-o.