YUNUS 1 - Nanduk Ngget Tul Pidnak Wene

Yunus Yunus-nen Nagawan Indo ene taridnak wene 1:1-17

¹ Nde, misik tarem-e Nagawan Indo-nen Amital ambara Yunus iri na wene yak tij-o.

² Yak tosolar-e: ”Kar-e Niniwe siri nggok iri me mbiri-o. Nde, iri me-nen meya kwat tenak woragwi iri-ge an-e naru-o. Iri ala, kar-e nggomo indil mbiri-o” luk yak tij-o.

³ Iri yak tij-et nde, Yunus iri na-ge Nagawan Indo aye-nen nin nggwe mbirij-o. Mborosolar-e, Yopa nggwe mborosoma-ge, koma misig-e o Sepaniol nggwe mbereyekluk yosoma, kagaij-o. Karug-e, at mbururak koma iri na onggo purug-e, koma iri na arem ngguruk, koma waruk nugwi nap inmin Sepaniol mborosolat, Nagawan Indo eram-nen kwiye mbirij-o.

^4-5 Yunus iri na-ge koma arem ena iri me mbarik, mbiring luk, mondok nggaruksa nene yij-o. Nene yosola-ge, Nagawan Indo-nen obube-ge yi koma iri na bem pil lobok yij-o. Iri yosola-ge, kwe kemereya nggok irit puk kasolar-e, yi koma-nen koma iri na lel kasolar-e, koma iri na-ge ndamereyekluk yij-o. Iri yosola, koma waruk nugwi nap ereba na-nen-e kwiye kwarat yogolar-e, it enambiktak lombok it-nen erembel wanugwi enmbal pem nagawan ereba na-nen yongga unduwakluk, enne nggoksa emengen mbariga-o. Nde, yi ma yubuk mul naru, koma iri na angin lak tak pogolar-e, waruk mbitli silobulo ereba na-ge yi koma arem mberak pogolat kwariga-o.

⁶ Nde, koma iri na waruk nugwi nap-nen ene kulugwi nap iri na-ge ena iri na me mbidnggal-e, Yunus nde nene yosolat worasoma kagaij-o. Karuk-nen yak tosolar-e: ”Yu nggal kwarosola-t nde, kar-e nene nak yosolat wolmomtag-e ndag-er-a? Ndak men min-o! Men yugundik, kat kugugwiwak yongga niri-o luk tepan yi-o. Ta nde aru-o. Iri nggal kat-nen emengen mbarosola-ge, nenabuwa karuk, yongga nondosola, nir-e yi ma yubuk mul puk nde ma-o” luk yak tij-o.

⁷ Iri luk, koma waruk nugwi nap-nen ene kulugwi nap iri na min abam nggwe luwagola-ge, koma iri na waruk nugwi ereba na-nen wene yak kerak mbogolar-e: ”Ta-nen meya yidnak worala-nen lak tak onposo mende yu nenpem mbusu-o? Ap meya kwaridnak iri yenggerak puwok-nen engga mbara ligik puwog-o!” luk, engga mbara ligik pigarik pem-e Yunus unu bem nde mbij-o.

⁸ Iri ala karuk, it-nen Yunus yak togolar-e: ”Ndemeret kat-nen ndowaga lak tak nunpurak mende yu nenpem mbusu, lak? Kar-e ngge ma-nen lobok yigen-o? Kat kelem-e no nab-o? Noluk-nen kar-e yu me worasu-o?” luk kin waniga-o.

⁹ Yogoloma, Yunus-nen onggo yosolar-e: ”An-e Iberani nab-er-o. An-e aid arem woraso Mbal Pem Nagawan yi koma min nggweyak min ndak worak pid iri na erembel wanoso-o” luk yij-o.

¹⁰ Iri yosoluk yarig-e, ”An-e Nagawan Indo aye-nen lobok yigirig-o” luk wene iri na mbenasa yak indij-o. Yak ondosola, wene iri na kulurug-e, koma iri na waruk nugwi nab-e ebem lud kwiye kwarat yiga-o. Iri luk, it-nen at yak togolar-e: ”Iri kwarigen iri-ge ndemeret meya-t kwarigenma-o!” luk yak tiga-o.

¹¹ Ereya na yil mburukmu-ge o wija mondok nggokma yosola karuk, koma waruk nugwi nap ereba na-nen yogolar-e: ”O wija puk kasu yu kondok maklug-e, kar-e no kwat kubul-o?” luk kin wok ibiga-o.

¹² Yogoloma, Yunus-nen yosolar-e: ”An-e yi koma arem mbo nibil nggwer-o. Iri kwarogola-ge, o wija puk kasu yu-ge kondok yosola kagub-o. An-e naru-o. An-nen ndowaga o wija kwiye worak yu-ge kit oboksa kenpem mbusu-o” luk yij-o.

¹³ Iri yij-et nde, koma waruk nugwi nap ereba na-ge enmawi kunduruk lembe yigarik, eyak nggwe ambigir-et mbiriga-t nde, obube-ge ebem lud amawi-t kundij-o. Iri kwarosolar-e, it-nen eyak nggwe mbururak yiga iri na-ge meya agaij-o.

¹⁴ Iri ala karuk, it-nen enne nggoksa Nagawan Indo emengen mbarogolar-e: ”Nagawan Indo wa-e. Ap nit ninmin meya marig-er-o luk tet kwarigit lak yu mberak pul yu bem-e kat-nen-e nir-e lak tak nunpurak pug-o luk nggi yak kitli-o. Nagawan Indo wa-e. Kat-nen-e kat kindi-n pidnak irit kwarigen-o” luk yiga-o.

¹⁵ Tepan iri na yurug-e, Yunus iri na-ge yi koma arem mbo bil nggwiga-o. Iri rak pogola-ge, o wija kwiye worak puk kasu iri na-ge ndong yij-o.

¹⁶ Nde, koma iri na waruk nugwi nap ereba na-ge Nagawan Indo indi aye kwarat kagolar-e, it ereba na yi koma eyak pem wok yogolar-e, Nagawan Indo amanggim wam wosa kan pogolat, Nagawan Indo imin-e ’Iri nggal kwarul-o” luk, kwarat urul piga-o.

¹⁷ Nde, Nagawan Indo-nen keyane nggok misik pil lobok yamu, Yunus iri na-ge keyane iri na-nen lungguk mberak pij-o. Iri yamu, Yunus iri na keyane urum arem woralar-e, kubu kenan, lengge kenan irit woragij-o.