YOSUA 9 - Nanduk Ngget Tul Pidnak Wene

Nggibeon nap-nen Yosua amberam laiga wene 9:1-27

¹ Yareren eyak ponok mo mboso (barat) nggwe woragwi nagawan oboksa min ndobo worak nggwe woragwi nagawan min Yi Koma Nggok iri na eyak eyak-nen kundugu nok mberarik Yareren eyak ponok nggwe Libanon ndobo bem-nen lingsa ereba me woragwi nagawan, Et nap min Amori nap min Kanaan nap min Peris nap min Ewi nap min Yebus nap min nagawan ereba na-nen-e Isarael nab-e pempa ombol nggwe nak yili ereba na wene kuliga-o.

² Kulurug-e, nagawan ereba oboksa lambuk yogolar-e, Yosua min Isarael nap min inmin wim mbarurak inndi misiget yiga-o.

³ Alat nde, enlem Ewi nap Nggibeon woragwi iri na-nen-e Yosua-nen o Yeriko min Ai min kwat inpid wene iri na-ge kuliga-o.

⁴ Kulurug-e, it-nen-e Yosua amberam ludtak wene mbi mbatlug-e, karung sum umbuk min wam aboro-nen konidnak embe anggut amburu yarugwi umbuk ndelak ereba na min wanuruk, nde, tularo-ge

⁵ oroti mondok werengerak mani mani tobok tak ereba na wanuruk, nde, yurugwi sum-e meya ndelep pelep tak ereba na min unuwok sum-e umbuk panggaridnak ereba na yutlug-e,

⁶ iri nggal kwarag-et Yosua woraso sa imin lambuk yurak o Nggilnggal mbiriga-o. Mbirigarik, Yosua min Isarael nap min yak ondogolar-e: ”Nir-e mondok erepma-net naptak kit kinmin are kundurak lobok yige-o” luk yak indiga-o.

⁷ Alat nde, Isarael nap-nen yogolar-e: ”Noluk-nen nir-e kit kinmin are kundurak yili-o? Kit woragwi sa-ge koroga yeba-t nde yili, lak?” luk yak indiga-o.

⁸ Yak ondogolikma, it-nen Yosua yak togolar-e: ”Nab-o. Kat-nen nenpem pugun mende-ge nir-e kwarul nag-o” luk yogola-ge, ”Nde, kir-e tarag-o? O ngge me-nen lobok yigeb-o?” luk Yosua-nen kin wok inpij-o.

⁹ Kin wok onposoloma, it-nen onggo yogolar-e: ”Nir-e nunuwi-ge mondok erepma-net lobok yige-o. Nab-o. Kat-nen erembel wanoso Nagawan Indo Kembal Pem Nagawan iri-nen Mesira iri me-nen kwaridnak wene oboksa min

¹⁰ iri-nen Amori nap nagawan Yareren eyak ele bem mo luwaso (timur) ambigit woragwi Esibon nagawan Sikon min Mbasan nagawan Ok min Asitarot woragwi ereya na kwat inpidnak wene-ge kulige-o.

¹¹ Kulurug-e, nit-nen enne kulugwi nap min o iri me woragwi oboksa min-nen ninpil lobok yogolar-e, nunggwi mende tularo min-et lid lud tak puruk, naptak kinmin yu me lambuk yurak ninpil lobok yiga-o. Iri luk, nir-e kit ndegel kunpuwakluk ninpil lobok yiga-o. Iri bem-e, naptag-o. Kit-nen-e ninmin are kundurag-e nunggwirig-o? luk kenmengen mbatli-o.

¹² Naptag-o. Nit-nen nunggwi mende tularo waruk lobok yige yeba nak ker-o. Oroti yeba-ge mondok nit lobok yogola-net nggeret embem min-et waruk lobok yige-t nde, lobog-et yogola-ge, karongo yosolat, mani mani posolat yid yeba nak ker-o.

¹³ Nde, yimbe wam aboro-nen konidnak yeba-ge ngget arem-et anggut amburu yarige-t nde, ndelep ndalep mbid yeba nak ker-o. Nunsum min nunuwok sum min na erep ma-net lobog-et yogola ndelep ndalep yeba nak ker-o” yak indiga-o.

¹⁴ Iri yogola-ge, Isarael nab-e: ”Wene yu-ge ndemeret yili, lak?” luk Nagawan Indo-ge yak tigit lak-nen Isarael nab-e Nggibeon nap-nen yidnak nunggwi mende mariget wok ondogola waniga-o.

¹⁵ Yogoloma-ge, Yosua-nen-e Nggibeon nap inmin kondosolar-e: ”Mondok kundul pug-o” luk wene mbariga-o. Nde, Isarael nap ennggendumu enne kulugwi nap ereba na-nen-e: ”Mbaridnak irit kwarul-o” luk owak mbariga-o.

^16-17 Nggibeon nap inmin ”Kundul pug-o” luk owak mbatluk, mberen nene lug-e, Isarael nap-nen Nggibeon nap unuwi Kebira min Mberot min Kiriyat Yearim min ereba na me mberen nene luk wok yogolat-nen enaru yogolar-e, it ereba na unuwi-ge Nggilnggal korok korok nde kaiga-o.

¹⁸ Alat nde, Isarael nap ennggendumu enne kulugwi nap ereba na-nen Nagawan Indo Isarael nap Enmbal Pem Nagawan iri na unu bem owak mbaridnak me, Isarael nap-nen it undurag-e meya kwat yij-o. Iri ala karuk, Isarael nap insilepma-ge ennggendumu enne kulugwi nap ereba na enpem nak pogolat woraiga-o.

¹⁹ Alat nde, ennggendumu enne kulugwi nap ereba na-nen onggo yogolar-e: ”Nagawan Indo Isarael nap Enmbal Pem Nagawan iri na unu bem-et owak mbaridnak nggwe me, nit-nen it undurag-e meya-o.

²⁰ Nir-e abu abu owak mbaridnak me, nit-nen undurag-e meya-o. Nit-nen nde: ’Kundul pug-o’ luk owak mbarige iri na nde tarogola-ge, Mbal Pem Nagawan-nen angin worak mende nenpem puwa-o.

²¹ Iri bem-e keya unpuwog-o. Nit-nen enpem pogolar-e, nit oboksa ndegel nunpugwi nap tak onpogolat, yi kenang nundugwi nap tak onpogolat, kan nggal nundugwi nap tak onpogolat nde kwaruwog-o” luk enne kulugwi nap ereba na-nen-e yak indiga-o.

²² Iri yogola, Nggibeon nap ereba na wene mbo unpuruk, Yosua eram inpil lobok yiga-o. Iri yikma, Yosua-nen Nggibeon nap yak ondosolar-e: ”Kir-e nit nenmberam lagolat-nen yogolar-e: ’Nit nunuwi-ge erepma-net lobok yigerig-o’ luk yak nindigeb-o.

²³ Kit-nen iri kwarigep pem-e Mbal Pem Nagawan-nen angin worak kenpem puwa-o. Kit kenlem-e pempa ndegel unpugwi nap nak woragolar-e, an Nembal Pem Nagawan uwi iri na amanggim kan nggarugwi nap kwat yogolat, yi kenanggugwi nap kwat yogolat woragub-o” luk yak indij-o.

²⁴ Yosoloma, it-nen onggo yogolar-e: ”Nit iri yige iri-ge Nagawan Indo kat-nen erembel wanoso iri-nen ndegel oboso nap Musa ebem pamu, o yu nggweyag-e nap kat wok keramu, o yu me woragwi nab-e kat-nen oboksa ondosolat, onggweyak wanosolar-e, nit min-et nundugun naru-nen kwiye-nen ereba-ge kwarige-o.

²⁵ Nit yawo-ge kat kinggiyapma worali me, mbigija-ge konak kwat nunpugun iri nag-o” luk yiga-o.

²⁶ Yogola-ge, Yosua-nen-e yu kwarij-o. Yosua-nen-e ap ereba na-ge inmiri yosolar-e, Isarael nap inmin-e: ”Ap ereba na-ge undurak pug-o” yak indij-o.

²⁷ Alat nde, ndegel unpugwi nap tak inpij-o. Iri yamu, ap ereba na-ge Isarael nap enmanggim min Nagawan Indo amanggim wam wosa kan pugwi sa amanggim min kan nggarogolat, yi kenangga putlogolat kwarurak inpiga-o. Nde, yawo yabu iri nggal wanugwi iri-ge yawo-nen na Nagawan Indo-nen at erembel wanurak sa ondoro lenak pid sa iri na me amanggim yabu iri nggal wanogolar-et worali-o.