YOSUA 7 - Nanduk Ngget Tul Pidnak Wene

Akan-nen meya kwaridnak wene 7:1-26

¹ Nagawan Indo-nen Isarael nap enpem posolar-e: ”Yeriko narogolar-e, yi mende indi mende mariger-o luk mondok mbi wanurak pug-o. Mondok oboksa lak tak purag-o” yak indij-et nde, enpem pid iri na ndak ndag-e kwarigit lak yogolar-e, ap misik unu-ge Akan iri-nen wene iri na kwid tosola-ge, Nagawan Indo isilepma-ge Isarael nap enpem pij-o. (Nde, Akan iri eid unu-ge Karami. Ombo unu-ge Sapndi. Nde, it iri-ge enlem Yewura nab-o. Alat nde, ari-ge Sera nab-o.)

² Nde, iri tarem-e Yosua-nen-e ap ereb-e Yeriko-nen Ai wi wirik inpij-o. Nde, Ai iri-ge Mbetel-nen-e mo luwaso (timur) ambigit nggwe-o. Mbet awen koroga-o. Nde, Yosua-nen-e o iri kwara lombot puwakluk ap ereb-e wirik inpij-o. Nde, it-nen-e yabu enpem pidnak iri na kwatlug-e,

³ mbirigarik, it na lobok yogolar-e, wene-ge Yosua yak til lobok yogolat-nen yogolar-e: ”Nit oboksa-t mbutluk Ai wi narurag-e meya-o. Are, ab-e dua ribu (2.000) nggal, tiga ribu (3.000) nggal nak wirik unpurag-o. Nde, o iri-ge o siri-ge marik me, san ombo oboksa wim ngguwakluk iri me nak wirik unpurag-e lag-o” luk yak tiga-o.

⁴ Iri yogola karuk, san ombo-ge tiga ribu (3.000) nak o bem mbud yurak wirik inpiga-t nde, ondogolat, langgara wirik inpiga-o.

⁵ Ai nap-nen-e Isarael nab-e Ai pak tumende bem-nen muk iniyil lobok yiga yiga, o posid tambang wanugwi sa wirik inpiga-o. Iri yogolar-e, ndobo ayo bem ereba-nen Isarael nab-e tiga pulu enam (36) nggal indiga-o. Ondogola-ge, Isarael nab-e enma umbuk luk, kwiye yiga-o.

⁶ Iri yogola-ge, Yosua min Isarael nap ennggendumu enne kulugwi nap ereba na min-e mondok inndi kalok luk, inndi kalok yogolat-nen kwarugwi mende unsum ndelabela keya buruk, mabe ndatluk, iri tarem-e aptusa tag-et Nagawan Indo-nen idnak labu mbarak iri na eralu entare nggwe tud tak nak woraiga-o.

⁷ Iri yogolat-nen Yosua-nen Nagawan Indo yak tosolar-e: ”O, Nagawan Indo Nembal Pem Nagawan wa-e. Noluk-nen kar-e Yi Yareren yu eyak ponok nggwe ninmin ndil waigen-o? Amori nap ininggem kegera keya nenpeyekluk-nen kwarigen, lak? Nit wat makluk-nen kwarigen, lak? Yi Yareren eyak ele bem nak woralep nggal-nen-e ob-et nde-o!

⁸ Nagawan Indo wa-e. Wim nap-nen Isarael nab-e langgara wirik ninpiga-o. Iri ala, yawo an-e no kwarimin-o?

⁹ Nde, Kanaan nap min yu me nap oboksa min-nen wene yu kulurug-e, lop lop nunduwarik, mondok oboksa nunduwa-o. Iri ala-ge, kat kunu kek tak purak pem-e kar-e no kwarugun-o?” luk yak tij-o.

¹⁰ Yosoloma, Nagawan Indo-nen yosolar-e: ”Yosua wa-e. Men min-o. Kar-e no manggim-nen iri nggal kwasa kerare nggwe nggweyak pem tud tak worasu-o?

¹¹ Nde, Isarael nab-e meya kwarikma-o. Nde, an-nen it enpem posolar-e, an-nen yidnak yidnak kwaruwakluk urul yak indigi na-t nde, ir-e enpem pigi na-ge kwarigit lak kwid tikma-o. Iri yogolar-e, ’Silobulo oboksa lak tak purag-o’ yigi ereba na-ge yariya wanuruk, nam ma naru it insilobulo enggendumu kura biga-o.

¹² Iri-nen ndowaga it-nen wim nap inmin pak turag-e meya agaij-o. It langgara wirik inpiga iri-ge it ondomok-nen lak tak unpuwakluk enare biga iri-nen ndowaga ir-e pak tigit lak yiga-o. Silobulo yariya waniga iri nde lak tak pigit lak ma-ge, an-e mondok kinmin woramin pug-o.

¹³ Yosua, yawo kar-e men min-o. Isarael nab-e marak puruk wolmag-o. Kat-nen yak indi-o. Ir-e an neram lobok yurak mondok lid lud tak puruk wolmag-o. Nagawan Indo Isarael nap Enmbal Pem Nagawan an-nen kub-e wene yu yak indimin-o: ’Isarael nap wa-e. Silobulo oboksa mondok lak tak purag-o luk yak kindigi ereba na-ge ereb-e kit kendam worasu-o. Kit-nen nde iri yidnak silobulo ereba nde mbo bigit lak ma-ge, kir-e wim nap inmin-e mondok pak tugup pug-o’ yak indimin-o.

¹⁴ Iri bem-e Yosua kat-nen kub-e kubu kabu ap kenlem lombok lumbunul-o yak indi-o. An-nen nde ap enlem oboksa ennggendumu-nen: ’It enlem misik iri lobok yuwag-o’ yosola-ge, it enlem iri na ari-ge oboksa ennggendumu-nen: ’It ari misik iri lobok yuwag-o’ yosola-ge, it ari ennggendumu-nen: ’Ap suwon misik iri lobok yuwag-o’ yosola-ge, it iri na suwon ennggendumu-nen ap enarik tak lobok yurag-o.

¹⁵ Iri kwasa ’Lobok yi-o’ yosola, lobok yosoma nde, at iri-nen wanurak pug-o yidnak silobulo ereba na nde at-nen kura bidnak karug-e, wanurak pug-o luk imiri mbarak pidnak wene ar-e kwid turuk, Isarael nap ennggendumu meya nggok kwaridnak me, ap iri-ge ogwela inmin arengge mende oboksa min mondok kan unpurag-o” luk yij-o.

¹⁶ Nde, kub-e kubu kabu Yosua-nen: ”Isarael nab-e kenlem lombok lobok yer-o” yak ondosola, lobok yogolar-e, enlem Yewura nap enpem mbij-o.

¹⁷ Iri ala karuk, Yosua-nen yosolar-e: ”Kenlem Yewura kir-e ari lombok lobok yurag-o” yosoloma, it Sera ari enpem mbij-o. Nde, Sera ari ereba na ap suwon lombok lobok yogolar-e, Sapndi ilirak inmin enpem mbij-o.

¹⁸ Iri lug-e, Yosua-nen-e: ”Sapndi ilirak ereba na enarik tak lobok yuwag-o” luk yosoloma, ap enambik tak lombok lumbunukmu-ge, Sapndi ambara Karimi iri na ambara Akan iri na ebem mbij-o.

¹⁹ Iri ala karuk, Yosua-nen Akan yak tosolar-e: ”Nambara-o. Nagawan Indo Isarael nap Enmbal Pem Nagawan imbiri bem-et kat-nen kwarigen para yi-o. Mondok kuragurak pug-o. Mondok nam-et para yak niri-o” yak tij-o.

²⁰ Yosoloma, Akan-nen yosolar-e: ”Ndemeret, an-e Isarael nap Enmbal Pem Nagawan imin meya kwarukmu-o. An-nen kwarigi-ge yu-o:

²¹ Silobulo minggige ereba enggendumu-ge sum leyok sum konak Mbabilonia-nen yagidnak misik min perak angin-e dua kilo iri min emas mbarak angin-e setenga kilo min irit mondok nindi nggosola karuk, wanigirik, an nuwi lije ma nggweyak yala kura bigirik worasu-o. Nde, perak iri-ge nggweyak arem nggal-et pukmu-o” luk yij-o.

²² Yosoloma, ”Ndag-et nak wil mberer-o” luk Yosua-nen yosoloma, ndag-et nak Akan uwi lije ma mbirigarik-nen lombot piganggal-e, ”Silobulo wanurak pug-o” luk imiri mbarak pidnak wanid ya na-ge nggweyak arem iri me kurabamu kaiga-o. Nde, perak na-ge mondok yiriwak parikmu,

²³ wanurug-e, Yosua min Isarael nap oboksa min endam waruk lobok yogolar-e, silobulo ereya na-ge Nagawan Indo imbiri bem iri me piga-o.

²⁴ Iri lug-e, Yosua min Isarael nap oboksa min-nen-e Akan iri na tenaguruk, ogwela min esapi min olomba min egelerai min uwi lije min at arengge mende oboksa min iri-nen yariya wanid perak min leyok sum iri na min emas min oboksa ereya-ge waruk nduguluk, unu-ge Anggun Panggun Kagwi Mbirik iri na me-t mbiriga-o.

²⁵ Iri rak puruk, Yosua-nen Akan yak tosolar-e: ”Noluk-nen kar-e anggun panggun nit nenpem pil lobok yigen-o? Nde, yawo-ge Nagawan Indo-nen angin worak mende kebem puwa-o” yak turug-e, Isarael nap oboksa-nen Akan iri na ogwela inmin-e kerep pem nak unduruk, arengge mende oboksa min yariya wanidnak silobulo oboksa min oboksa kan mbela lak tak inpiga-o.

²⁶ Wutlug-e, at ebem-e kerep-nen logo logo puruk keya biga-o. Nde, iri kwaridnak kereb-e yawo-nen na worasur-o. Iri kwaridnak me, iri me unu yarogolar-e, Anggun Panggun Kagwi Mbirig-o yili-o. Iri rak pogola, Nagawan Indo isilepma na-ge yamuk yij-o.