YOSUA 6 - Nanduk Ngget Tul Pidnak Wene

O Yeriko siri lak tak pidnak wene 6:1-27

¹ Nde, Yeriko siri na-ge Isarael nap ngguwa naru pak tumende-ge mondok muruksa lerak pil lobok yiga-o. Iri rak puruk, pak tak irit woraiga-o. Iri kwasa woragolar-e, ap misiger-o luk tet arem nggwe-nen mbururak na meya, iri-nen mbepme nggwe-nen arem nggwe nggurak na meya, mondok imiri mbarak irit woraiga-o.

² Woragola-ge, Nagawan Indo-nen Yosua yak tosolar-e: ”Yawo-ge o Yeriko min o iri me woraso nagawan min san ombo kwiye lak ereba na min-e wesera kinggem pusu-o.

³ Iri bem-e kat min kat-nen idnak san ombo inmin-e obo nesa keya buruk, misik tarem-e o siri iri wangget karuk, nene luk, iri nggal kwarogolar-e, o nda yidnak irit wosa enam pem-et wangget karuk, nene luk kwat tenak wolmer-o.

⁴ Nde, tepan ombo tuju iri-ge terompet poba tuju tenasa nandug-et mborogola-ge, urul pidnak wene labu mbarak iri na waruk inmbirik nurag-o. Nde, tuju bem tak pogolar-e, iri tarem-e kat min kesan ombo inmin-e o siri iri tuju bem-et wangget kagolar-e, tepan ombo-ge terompet poba ene yil yil wangget kudtag-o.

⁵ Iri kwasa wangget karug-e, tepan ombo ereya na-ge terompet poba ene-ge mondok pok tak pigit lak nggoksa kundugu motsa yogola-ge, san ombo oboksa-nen kulurug-e, kek kok lel kagolat, o nggu nggal lek kagola-ge, o iri pak kerep iri-ge ndamera mbuwa-o. Iri yosola-ge, kit oboksa mondok arem nggwe o silmu nggurag-o” luk yak tij-o.

⁶ Yosoloma-ge, Yosua-nen-e tepan ombo wene mbo unpuruk-nen yak ondosolar-e: ”Kit kennggendumu ap tuju terompet poba tenasa nanduk mborogola, kir-e urul pidnak wene labu mbarak iri na kud turuk, inmbirik mberer-o” luk yak indij-o.

⁷ Yak undurug-e, Yosua-nen-e at-nen idnak san ombo ereba na inmin-e obo nesa keya buruk, o siri iri na wangget kagolar-e, urul pidnak wene labu mbarak yik karok woragwi san ombo ereba na nandug-et mborogola-ge, inmbirig-e urul pidnak wene labu mbarak waruk mbiriga-o.

^8-9 Nde, Yosua-nen yak indidnak ndak ndag-et nandug-et mburugwi san ombo-ge nandug-et mborogola-ge, inmbirig-e tepan ombo terompet poba ene yil yil mbitli ereba na mborogola-ge, inmbirig-e tepan ombo urul pidnak wene labu mbarak waruk ereba na mborogola-ge, inmbirig-e san ombo i mbarugwi ereba na mbiriga-o. Iri kwasa mborogolar-e, poba ene-ge yil yil-et mbiriga-o.

¹⁰ Nde, Yosua-nen san ombo ereba na yak ondosolar-e: ”An-nen yak kindigit lak ma, kit nak-nen kenne sa nggwa mbilik, kenne mariger-o luk kenemndam nggwe-nen wirik purak pug-o” luk Yosua-nen-e yak indij-o.

¹¹ Iri nggal kwasa Yosua-nen-e yak unduruk, san ombo ereba na-ge wirik inpij-o. Iri yamu, urul pidnak wene labu mbarak iri na kud turuk, o siri iri na misik tarem wangget kaiga-o. Iri luk, unuwi lije wiridnak sa mbirigarik, nene yiga-o.

^12-13 Nde, nene luk, kub-e Yosua na-ge kubu kabu men yosolar-e, o siri iri na wangget kagolar-e, nandug-et kwariga iri na nggal-et tepan ombo min san ombo min lena mbo obo nesa keya buruk, o siri iri na wangget kaiga-o. Iri yogolar-e, nandug-et mburugwi san ombo-ge nandug-et mborogola-ge, inmbirig-e tepan ombo terompet poba tenasa yil yil ereba na mborogola-ge, inmbirig-e, tepan ombo erep urul pidnak wene labu mbarak waruk iri na mborogola-ge, inmbirig-e, san ombo i mbarugwi ereba na mbiriga-o. Iri kwasa mborogolar-e, terompet poba-ge yil yal mbiriga-o.

¹⁴ Mberen pem tak pogolat na iri na nggal-et kwasa o iri na wangget karuk, tuguruk unuwi lije wiridnak sa wok yiga-o. Iri nggal kwarogolar-e, enam pem-et wangget kaiga-o.

¹⁵ Iri kwasa wangget tenak woraruk, tuju bem tak pogolar-e, kubu kabu molengen nggeret kona pil wasola-ge, wangget kali ereba na nggal-et kwasa wangget kagolar-et nde, iri tarem-e o misik nda yid pem-et tuju bem-et wangget kaiga-o.

¹⁶ Tuju bem tak pogolat, iri tarem tepan ombo-nen terompet poba ene yogola, Yosua-nen ap ereba na oboksa yak ondosolar-e: ”Nagawan Indo-nen o siri yu-ge kininggem kegera pusu me, mondok kenne nggoksa kek kok mbak lel ker-o.

¹⁷ Nde, o min iri me woragwi oboksa min-e Nagawan Indo amanggim pidnak nggal mberena mondok lak tak purag-o. Alat nde, kwe terak yebugwi kwe Arakap iri na min at owe owot, eid ija min it nak perak nit-nen o yen wirik inpige nap inmiri yidnak me, indigit lak, keya unpurag-o.

¹⁸ Nde, kit-nen mondok lak tak unpugup ereba enarengge-ge mondok mariget tet mondok wanurak pug-o. Nde, kit-nen nde wanugup ala-ge, Isarael nap kunuwi-ge lak tak onposo mende kunuwi bem mbud ma-o.

¹⁹ Nde, perak min emas min tembaga min mbesi min ereba oboksa-ge Nagawan Indo amanggim nak lenak puruk, at amanggim ndok wosa pugwi sa purag-o” luk Yosua yak indij-o.

²⁰ Yak ondosoloma-ge, tepan ombo-ge terompet poba ene yogola, Isarael nap-nen kulurug-e, mondok kek kok nak lel kagola-ge, Yeriko kerep pak leget iri na-ge nggilara ngguru ngguru mbij-o. Iri yosola-ge, Isarael nap oboksa-ge mondog-et nggogolar-e, o siri iri na-ge mondog-et waniga-o.

²¹ Nggogolar-e, o iri me woragwi ap sujwe-nen indi worak-nen li ap-nen likwami-nen oboksa kabo bem unduruk, sapi min lomba min kelerai min-et mondok oboksa lak tak piga-o.

²² Unduruk, Yosua-nen ap mberen enlengen waruk ndimirik inpid ereya na yak ondosolar-e: ”Kir-e kit-nen at urul yak tigep ndak ndag-et kwe terak yebugwi kwe iri na eram mburugupndik, at min owe owot min eid ija min inmin mbepme wok unpuruk wumer-o” yak indij-o.

²³ Iri yak ondosoloma, ap mberen ya na mbirigarik, Arakap min owe owot min eid ija min owe owot erep min inmin o ma-nen waiga-o. Nde, Arakap owe owot oboksa inmin ndegel unpugwi nap inmin-et it indigit lak yurak sa Isarael nap unuwi wiridnak sa koroga ndok wosa inpiga-o.

²⁴ Iri rak purug-e, Isarael nap san ombo nggogolar-e, o Yeriko siri iri na-ge ereba me woragwi ap min yi mende ndi mende oboksa min kan puruk, lak tak pogolar-et nde, emas min perak min tembaga min mbesi min ereba mende nak perak waruk mbirigarik, Nagawan Indo amanggim ndok wosa pugwi sa iri na me piga-o.

²⁵ Nde, ap mberen enlengen waruk Yosua-nen Yeriko wirik inpid inmiri yid iri na bem-e kwe Arakap terak yebugwi kwe iri na min at owe owot oboksa Yosua-nen inmiri yij-o. (Keya inpid iri na-ge yawo-nen na Arakap-nen wigarag-e Isarael iri me woralir-o.)

²⁶ Iri tarem Yosua-nen owak mbarosolar-e: ”Ta-nen nde o Yeriko siri yu tuguruk wuruwa nab-e Nagawan Indo-nen inmbiri lamut tak onposo mende-ge enpem mbuma-o. Nde, ta-nen nde o yu paro puwa nab-e, ambara manggiya-ge lag-et ma-o. Ta-nen nde tumende ereba na puwa nab-e, ambara labo-ge lag-et ma-o” luk yij-o.

²⁷ Nde, Nagawan Indo-ge Yosua imin woralat, Yosua anggu obog-e o iri me wigak yij-o.