YOSUA 5 - Nanduk Ngget Tul Pidnak Wene

¹ Nde, Amori nap nagawan Yi Yareren eyak ponok mo mboso (barat) nggwe woragwi nap oboksa min Kanaan nap nagawan Yi Koma Nggok iri na eyak eyak woragwi nap min-nen kuliganggal-e Nagawan Indo-nen Yi Yareren na ogorak nak nggilara keya bamu, Isarael nap ndil laiga wene kulurug-e, ir-e Isarael nap enaye-nen kwiye yot kot mbiga-o.

O Nggilnggal-nen iniye ambasap mbaridnak wene 5:2-12

² Iri tarem-e Nagawan Indo-nen Yosua yak tosolar-e: ”Kerep nggibik anggat masa Isarael nap iniye ambasap mbari-o” yak tij-o.

³ Yosoloma-ge, Yosua-nen-e Nagawan Indo-nen yidnak yidnag-et kwarosolar-e, ndobo unu Iniye Ambasap Mbarugwi Sa iri na bem-nen-e Isarael nap iniye ambasap mbarij-o.

^4-6 Nde, Isarael nap Mesira-nen lobok yogolar-e, li ab-e oboksa iniye ambasap wabidnak irit lobok yiga-o. Alat nde, nembaga ereba waring kagolat olengen empat pulu (40) woragolat-nen ndagidnak li ab-e misiget tet iniye ambasap wabigit lak irit woraiga-o. Nde, olengen empat pulu bem woroksa-ge li ap Mesira-nen lobok yidnak ereba na-ge san ombo nggugwi ndak ndak pem-e Nagawan Indo-nen yidnak ndak ndak kwarigit lak yogola karuk, oboksa wat yiga-o. Nagawan Indo-nen yosolar-e: ”Onmborak wok indigi o nggweyak amburu worak, yi mende ndi mende na kwarat iri na me-ge mondok ngguwa bug-o” luk owak mbarid iri na ndak ndag-et nggwigit lak yiga-o.

⁷ Iri kwarogolar-e, it wat yiga ereba enmbararak iniye ambasap wabigit lak woraidnak me, li ap abok nda iri-net Yosua-nen-e iniye ambasap wabij-o.

⁸ Nde, li ap ereba na iniye ambasap wabamu-ge, o ma nak worakmu, ambut yij-o.

⁹ Nde, Nagawan Indo-nen Yosua yak tosolar-e: ”Yawo-ge kit Mesira-nen mumnggup manggi ebe lak mende woragwi iri na-ge mondok lak tak kinpigi-o” luk yak tij-o. Iri kwaridnak ala karuk, o iri na me unu-ge Nggilnggal yariga iri-ge yawo na irit yilir-o.

¹⁰ Yeriko koroga mbirikmu Nggilnggal iri na me o lije ma woragolar-e, Isarael nab-e waneya anggul-et iri na bem-e keyama nggwe tanggal empat belas pem-e O Anggul Pandok Mbiridnak Tarem yebet kagolat saiga-o.

¹¹ Nene luk, kub-e mondok anggul-et nunggwi mende Kanaan-nen yagidnak eneyak ma biga-o. Nde, iri-ge oroti lomboroso mende pigit lak oroti min nggandum kan engen pem wora min irit ningga-o.

¹² Iri yogola-net mana teram nggwe-nen mbuwasu na-ge ndong yij-o. Ndong yosola-ge, Isarael nap-nen mana nili iri na-ge lak yij-o. Iri tarem-nen Kanaan iri me-nen yagidnag-e eneyak ma biga-o.

Yosua-nen ap kabo inggem kundugu mendak kagaid wene 5:13-15

¹³ Nde, misik tarem-e Yosua-ge Yeriko koroga mbi me ereba worasolat-nen mimo yik kagaidnggal-e ap misik kabo lesa inggem tenaga irit at eram mendak irit kagaij-o. Karuk, Yosua-nen ap iri na eram panggosa lasolat-nen kin wok obosolar-e: ”Kar-e nit nap, lak? Are, wim nab-a?” luk yak tij-o.

¹⁴ Yosoloma, ap iri na-nen onggo yosolar-e: ”Kit nap na lak. Kit kunuwim nap na lag-er-o. An yu me lobok yigi-ge Nagawan Indo-nen idnak san ombo onowe-t lobok yigi-o” yosoloma, Yosua-nen kulurug-e, Yosua na-ge ap iri na eram erare nggwe tud luk ap iri na erembel wanosolat-nen yak tosolar-e: ”An-e kat ndegel koboso nap-nen yusu-o. An-e kat kamanggim-e no kwarimin-o?” yij-o.

¹⁵ Yosoloma, Nagawan Indo-nen idnak san ombo onowe iri na-nen yosolar-e: ”Nggweyak kat mendak worasu yu-ge mondok marak me, kuwok sum yunggwiri-o” luk yak tosoloma, Yosua na-ge ujok sum yunggwirik pij-o.