YOSUA 4 - Nanduk Ngget Tul Pidnak Wene

Inndi yenggerak wolmomtak kerep duabelas ndok wosa mendaga pidnak wene 4:1–5:1

¹ Nde, Isarael nap oboksa Yi Yareren eyak ele bem ndil laigarik woragola, Nagawan Indo-nen Yosua yak tosolar-e:

² ”Ap enlem lombok enpe duabelas lenak inpi-o.

³ Lenak unpurug-e, it iri-nen kerep duabelas Yi Yareren enggendumu-nen wanuwakluk enpem pi-o. Kerep ereba wanogolar-e, mondok tepan omborak mendak woraiga sa-nen wanuruk, kud turuk mburuwarik, yanem kit o lije wutluk woragup sa iri me-t pil mburuwag-o” yak tij-o.

⁴ Yak tosoloma, Yosua-nen-e ap duabelas lenak inpid ereya na wene mbo unpuruk-nen

⁵ yak ondosolar-e: ”Kir-e Nagawan Indo Kenmbal Pem Nagawan-nen idnak urul pidnak wene labu mbarak iri eram mburugupndik yi enggendumu-nen kinlit wosa kerep duabelas Isarael nap kenlem ndak ndag-et kud turuk, lobok yer-o.

⁶ Nde, kerep ereba-nen-e Nagawan Indo-nen kwarid yeba Isarael nap kinndi yeberak kunpuwa-o. Nde, abok kinlirak-nen nde ’Kerep yeba-ge ebe-ge no kwaridnak ala-n pidnag-o?’ luk kin wanogola-ge,

⁷ kit-nen it yak ondogolar-e: ’Nagawan Indo-nen idnak urul pidnak wene labu mbarak iri na Yi Yareren mbatluk ndil wagola, yi na mbuguksa labuk yamu-nen wanidnag-o’ luk yak undurag-o. Nde, kerep yeba-nen-e yu me-nen kwaridnak mende-ge pempa Isarael nap inndi yeberak perenak wolma-o” luk yak indij-o.

⁸ Nde, it ap duabelas ereya na-nen-e Nagawan Indo-nen Yosua mul tosola, it yak indid ereba na ndak ndag-et kwariga-o. Kwarogolar-e, Isarael nap enlem ndak wosa kerep duabelas Yi Yareren enggendumu-nen wanuruk, waruk mbirigarig-e, it worali sa piga-o.

⁹ Tepan omborak-nen urul pidnak wene labu mbarak kudsa mendak woraidnak sa Yi Yareren enggendumu iri na me-ge Yosua-nen-e kerep duabelas irit mendaga pil lagaij-o. Nde, kerep mendaga pil lagaid ereba-ge yawo-nen na worasur-o.

¹⁰ Nde, it tepan omborak ereba na-ge Yi Yareren enggendumu irit mendak irit worakmu, Nagawan Indo-nen Yosua mul tosola, Yosua-nen ap ereba enpem pid ereba na-t ndegera kwariga-o. Nde, ereba kwariga iri-ge Musa-nen Yosua mul tid ereba na ndak ndag-et kwariga-o. Kwatlug-e, Isarael nab-e ndig-et ndag-et nak yi mbara ele bem ndil laiga-o.

¹¹ Nde, it oboksa ndegera ndil larug-e, tepan omborak urul pidnak wene labu mbarak kud turuk ereba na-ge anggul tak puruk mbiriga-o.

¹² Nde, it enlem Uruben min Nggat min enlem Manase erep minggirik min ennggendumu-nen ap wim kalu kalu ereba na-ge Musa-nen enpem pid ereba na ndak ndag-et nandug-et Yi Yareren ndil laiga-o.

¹³ It ndil laiga iri-ge ap nak wim nggurak pem san kundugu empat pulu ribu (40.000) irit ndil lagolar-e, Nagawan Indo erengen pem-et Yeriko mbirik iri na ambigit nggwe-t mbiriga-o.

¹⁴ Iri tarem-e Nagawan Indo kwarid ereba-nen ndowaga Isarael nap-nen Yosua na-ge nggok kek tak irit yik kaiga-o. Nde, at Yosua na worala-ge, it-nen Musa kek tak ubugwi iri na nggal-et at kek tak obogolat woraiga-o.

¹⁵ Iri rak puruk, Nagawan Indo-nen Yosua yak tosolar-e:

¹⁶ ”Tepan omborak urul pidnak wene labu mbarak kudsa yi ma mendak worali ereba Yi Yareren arem-nen womak-nen yak indi-o” yak tij-o.

¹⁷ Yak tosoloma-ge, Yosua na-ge Nagawan Indo-nen ebem pid iri na-t kwarij-o.

¹⁸ Kwarosolar-e, yak ondosoloma-ge, tepan omborak ereba na-ge onowak yi ma-nen wesu bem pilakmu-net mondok yi na-ge tuguruk wasolat ondolma yimik luk keya bij-o.

¹⁹ Nde, Isarael nap Yi Yareren mbatluk eyak ele bem wok yiga-ge waneya anggul-et tanggal sepulu iri bem wok yiga-o. Wok yogolar-e, unuwi lije-ge o Nggilnggal iri me wiriga-o. Nde, o Nggilnggal iri-ge Yeriko-nen-e mo luwaso (timur) ambigir-o.

²⁰ Nde, Nggilnggal iri na me-t kerep duabelas Yi Yareren enggendumu-nen waniga ereba na-ge Yosua-nen-e tap mbal mbal ligik pij-o.

²¹ Iri rak puruk, Yosua-nen Isarael nap yak ondosolar-e: ”Abok kinlirak-nen kin wok konpogola-t nde: ’Kerep yeba-ge noluk-nen pidnag-o?’ yak kondogola-ge,

²² kit-nen onggo yak ondogolar-e, Isarael nap Yi Yareren yu-t nde ogorak nak nggilara labuk yamu, ndil waiga wene yak undurag-o.

²³ Kit ndegera eyak ponok nggwe ndil womakluk, Nagawan Indo Kenmbal Pem Nagawan-nen kit kenmanggim Yi Yareren yu eberek tak pamu-o. Iri kwarid iri-ge nit nenmanggim Telaga Koma eberek tak pid iri na nggal-et kwarij-o luk yak undurag-o.

²⁴ Iri kwarid iri-ge yi ap ndi ap nggweyak ma worali oboksa-nen Nagawan Indo amawi enaru yuwakluk-nen kwarij-o. Nde, kit-nen-e Nagawan Indo Kenmbal Pem Nagawan-e kek tak pogolat woralik nalik irit woragub-o” luk yak indij-o.