YOSUA 3 - Nanduk Ngget Tul Pidnak Wene

Isarael nap Yi Yareren mbaridnak wene 3:1-17

¹ Nene luk kub-e kubu kabu Yosua min Isarael nap oboksa min men yogolar-e, it unuwi lije wutluk woraiga sa Sitim keya burug-e, Yi Yareren eyak pem mbirigarik, it-nen Yi Yareren mbarurak tarem wok makluk iri me o lije wiril lobok luk woraiga-o.

² Iri me kenan pem worarug-e, it ennggendumu enne kulugwi nab-e it unuwi lije wiril lobok yiga sa ereba na me waring kil nogolar-e,

³ wene yu Isarael nap yak indiga-o: ”Kit-nen yik kagupnggal nde tepan omborak-nen Nagawan Indo-nen idnak urul pidnak wene labu mbarak iri na nde kud turuk mborogola-ge, kit woragwi sa-nen urul pidnak wene labu mbarak iri na imbirik nak mbururag-o.

⁴ Nde, mborogolar-e, labu mbarak iri mondok imbirik panggarak nggal-e mbururak pug-o. Alat nde, mboksa abog-et (satu kilometer nggal-et) mbururag-o. Kir-e o yu me-ge kenaru buk me, kit-nen iri nggal kwasa mborogola-ge, kit-nen mbururak tula-ge kenaru ma-o” luk yak indiga-o.

⁵ Nde, Yosua-nen Isarael nap yak ondosolar-e: ”Kub-e Nagawan Indo-nen kwiye worak mende mbi kennggendumu kwaruwa me, mondok kenpe marak puruk wolmer-o” luk yak indij-o.

⁶ Yak unduruk, Yosua-nen tepan omborak yak ondosolar-e: ”Kir-e urul pidnak wene labu mbarak iri na waruk Isarael nap lit eneyaruk anggul tak per-o” yak ondosoloma-ge, Yosua-nen yak indid iri na-t kwariga-o.

⁷ Nde, Nagawan Indo-nen Yosua yak tosolar-e: ”Yawo kuri-nen kar-e ap nggok tak kubumu, Isarael nap oboksa-nen kar-e kek tak kobogolat, it-nen peragolar-e: ’Nagawan Indo-ge Musa imin worasu iri na nggal-et yawo-ge at imin worasu-o’ luk yebet kiyujwa-o.

⁸ Nde, yawo-ge tepan omborak urul pidnak wene labu mbarak kud tuwa nap ereba na yak indi-o. It nde yi ma nde wok yogolar-e, yi ma unuwok puruk, emnde nggut manda mendak wolmag-o” luk yak tij-o.

⁹ Yosoloma, Yosua-nen Isarael nap wene mbo unpuruk-nen yak ondosolar-e: ”Nagawan Indo Kenmbal Pem Nagawan-nen kenpem puwa wene-ge kwara kolobok-nen lobok yer-o.

^10-11 Kit-nen nde kunuwim nap enpem-et kore yogola-ge, Nagawan Indo-nen-e Et nap min Ewi nap min Peris nap min Nggirigasi nap min Amori nap min Yebus nap min ereba-ge Nagawan Indo-nen-e mondok maga wirik unpuwa-o. Nde, Nagawan Indo mbal min nggweyak min ombol pem kek tak iri-nen idnak urul pidnak wene labu mbarak iri nde nandug-et Yi Yareren mbatluk ndil lasola-ge, ’Nagawan Indo uruk nak woraso iri na-ge nennggendumu worasu-o’ luk kenaru yugub-o.

¹² Nde, yawo Isarael nap kenlem duabelas irit wosa ap duabelas lenak enper-o.

¹³ Tepan omborak nde Nagawan Indo-nen idnak urul pidnak wene labu mbarak iri na nde kud turuk, Yi Yareren arem nggogola-ge, yi iri-ge mbuguksa labuk yosolar-e, urusu nggwe-ge wamid lesa kobong yil mburuwa-o” luk yak tij-o.

^14-15 Nde, iri tarem-e yagidnak mende mbarugwi tarem me, yi ebe wasolat-nen kobong yoso ndak ndag-et kobong tak woragij-o. Nde, Isarael nap unuwi lije wiridnak sa-nen mborogolar-e, tepan omborag-e urug pidnak wene labu mbarak iri na kud turuk nandug-et anggul tak piga-o. Mbirigarik, unuwok nandug-et yi ma pil nggukmu-ge,

^16-17 ereya na-net yi ombolwak na-ge mbuguksa labuk yij-o. Iri yosolar-e, yi urusu nggwe-ge yi-ge o siri Saran eralu ponok nggwe o siri Aram iri me yenggera labuk yij-o. Nde, umbut nggwe mbuguksa mbirid iri na-ge Wat Yoso Yi Koma arem nggoso-t nde, umbut nggwe abu mondok eberek yij-o. Iri kwasa ogorak nggilara labuk yamu, Isarael nab-e o Yeriko ndik pindik iri na nggwe ndil laiga-o. Ndil lagola-ge, tepan omborag-e urul pidnak labu mbarak kudsa iri na-ge yi ma iri na-t mendak worakmu, Isarael nap nggaruksa ndil lagola-net ndil laiga-o.