YOSUA 24 - Nanduk Ngget Tul Pidnak Wene

O Sikem-nen Isarael nap Yosua-nen wene yak indidnak wene 24:1-28

¹ Yosua-nen-e Isarael nap oboksa o Sikem iri me ndok wuruwakluk yonggo onposola-ge, Isarael nap ennggendumu-nen enne kulugwi nap min ap sarok min wene mbenarugwi nap min san wari min yonggo onposola-ge, ir-e Mbal Pem Nagawan eram wok yiga-o.

² Wok yogola, Yosua-nen it yak ondosolar-e: ”Nagawan Indo Isarael nap Kenmbal Pem Nagawan-nen yak kunduwa wene-ge kwara kulurag-o. At-nen yosolar-e: ’Nanduk konmborag-e yi Eperat eyak ele bem woragolar-e, kugwiwak erembel wanogolat woraiga-o. Nde, it ennggendumu ap misig-e Abarakam min Naot min ineid Tera irir-o.

³ Nde, an-nen-e konmbo Abarakam iri-ge o yi Eperat eyak ele bem-nen wanukmu-o. Wanurug-e, Kanaan nggweyak oboksa kibirik waring ki-o yak tigi-o. Yak turuk, an-nen-e at-nen wigarag-e kwarat tak pigi-o. Nde, nandug-er-e Isak at wok tigi-o.

⁴ Iri luk, Isak wok tosolar-e, ilirak mberen Yakup min Esau min wok tigi-o. Nde, Esau wok tosolar-e, Erom nggweyak ndobo worak iri-ge winde rak pigi-o. Alat nde, kombo Yakup iri ilirak inmin-e Mesira mbirij-o.

⁵ Nde, imbirig-e an-nen Musa min Arun min wirik unpukmu, Mesira nap enpem lak tak unpurak mende mberak pigi-o. Iri rak unpurug-e, iri me-nen wesera wok kunpuruk lobok yigi-o.

⁶ Iri kwasa konmborak Mesira-nen lesa inmin lobok yosola-ge, Mesira nab-e wim koma bem muk iniyil mborogolat, kura wam ombolwak pem kore luk muk iniyil mborogolat kwariga-o. Iri kwarogola, konmborak Yi Koma Nggelaga eyak pem wok yogolar-e:

⁷ ”Yongga nindi-o” luk an neram nggi yogola-ge, an-nen-e Isarael nap min Mesira nap min ennggendumu-ge ndamuk tak pigi-o. Nde, kir-e an-nen Mesira nap kwat inpigi-ge kenaru irir-o. Nde, kir-e nembaga ereba-ge kwarat woraigeb-o.

⁸ Nde, an-nen-e wok kunpuruk Amori nap woragwi sa Yi Yareren eyak mo luwaso ambigit (timur) nggwe kinmin lobok yigi-o. Iri yosolar-e, kit kinmin wim mbariga-t nde, an-nen-e kir-et ombol nggwe rak konposola, kunuwim nab-e urugwe nggwe rak inpigeb-o. An-nen lak tak onposola, kir-e unuwi nggweyak wanigeb-o.

⁹ Iri lug-e, Moap nagawan Sipot ambara Mbalak-nen kit kinmin wim mbarosolar-e, kit imbiri lamut tak kunpuwakluk Peyot ambara Mbileyam eram ap wirik inpij-o.

¹⁰ Iri yij-et nde, an-nen-e Mbileyam indi-nen pidnag-e kwarigit lak ala karug-e, Mbileyam-nen-e imbiringgat tak kinpij-o. Iri nggal kwasa Mbalak-nen kundurak yij-et nde, an-nen kinmiri yigi-o.

¹¹ Iri lug-e, kir-e Yi Yareren mbatluk, Yeriko wok yogola-ge, Yeriko nap-nen kinmin wim mbariga-o. Iri nggal-et, Amori nap min Peris nap min Kanaan nap min Et nap min Nggirigasi nap min Ewi nap min Yebus nap min-nen kinmin wim mbariga-t nde, an-nen it pidsa urugwe nggwe rak unpuruk, kir-et ombol nggwe rak kinpigi-o.

¹² Nde, kit-nen it enpem mbud yogola-ge, an-nen-e it inndi kabak tak posolat kwiye rak inpigi-o. Iri yosola-ge, Amori nap nagawan mberen ya na-ge kendam-nen kwiye mbiriga-o. Nde, kit ombol nggwe yigep iri-ge keneyalawi min kensan min amawi bem ombol nggwe yigeb-e lag-o.

¹³ O nggweyak an-nen wok kindigi iri-ge kir-e anggun panggun kagit lag-et wanigeb-o. O siri wok kindigi ereba-ge kit-nen wirigeb-e lag-o. Alat nde, yawo o iri me woragolat, anggut engen min saitun engen amburu min ereba-ge kit-nen-e yakit lag-et nde, nonggolat worali-o” luk yak indij-o.

¹⁴ Yosoluk yarik, wene erep min-et Yosua-nen yosolar-e: ”Kir-e kinndi mbek tak pem-et Nagawan Indo kek tak pogolat, at ndegel obogolat kinndi-net tugup lak irit wolmer-o. Nanduk konmborak Mesopotamia min Mesira min woragolat-nen erembel wanogolat woragwi kugwiwak ereba-ge mondok keya buruk, Nagawan Indo nak ndegel obogolat wolmer-o.

¹⁵ Kit-nen nde Nagawan Indo ndegel uburak kinmbit ala-ge, yawo-net wene nggaruksa yogolar-e: ’Nir-e irit ndegel obogolat wulmul-o’ luk, unu yarurag-o. Kir-e konmborak nanduk Mesopotamia woragolat-nen erembel wanugwi kugwiwak ereba na erembel wanugub-a? Are, Amori nap unuwi nggweyag-e yawo kit worali yu-nen erembel wanugwi kugwiwak ereba na erembel wanugub-a? Alat nde, an min an nama woragwi nap inmin perak nde, Nagawan Indo nak ndegel obogolat wulmul-o” luk yij-o.

¹⁶ Yosoloma, Isarael nap oboksa-nen onggo yogolar-e: ”Kugwiwak erembel wanurak puruk, Nagawan Indo ndegel ubugwi keya burak iri-ge mondok lik laksa-o.

¹⁷ Nagawan Indo Nenmbal Pem Nagawan-net nonmborak wisirik onposolat, nit na anggun panggun tak nunpugwi sa Mesira-nen wisirik nonposolat kwaramu-o. Nde, Nagawan Indo-nen kwiye worak kwarij-et nit-nen kagolat, nit tula erepma nin nap unuwi siri oboksa ereba kibiril lobok yogola-ge, Nagawan Indo-net nggetlel nunpuruk, lobok yosolat kwaril lobok yij-o.

¹⁸ Nde, lobok yigerik, o yu me wok yogola-ge, Amori nap yu me worali ereba-ge oboksa Nagawan Indo-nen wirik inpij-o. Iri ala karuk, ar-e nit Nenmbal Pem Nagawan-et me, nir-e at nag-et ndegel obogolat wulmul-o” luk yiga-o.

^19-20 Yogolikma, Yosua-nen yosolar-e: ”Alat nde, ar-e Nagawan Indo Mbal Pem Nagawan mondok marak nak woraso me, kit-nen at ndegel uburag-e mondok kenpam-e lag-o. Kit-nen mbal pem nagawan nin erembel wanogola-ge, ar-e erengen ale yoso-o. Nde, kit-nen nde at keya uburuk, we kugwiwak ereba na nde ndegel obogola-ge, nandug-e kinmin konag-et woragij-et nde, kit meya yugup iri-ge mondok ambaram tak puwa bug-o. Alat nde, mondok kunduwa-o” luk yak indij-o.

²¹ Iri yak ondosoloma, Isarael nap-nen onggo Yosua yak togolar-e: ”Mondok nir-e kugwiwag-e mondok ndegel ubul pug-o. Nagawan Indo nag-et ndegel ubul-o” yiga-o.

²² Yogoloma, Yosua-nen yosolar-e: ”Iri yigep iri-ge kit kondomok kenemndam nggwe-net wirik pogolar-e: ’Nir-e Nagawan Indo nag-et ndegel obogolat wulmul-o’ yigep iri-ge kinndi yeberak wolmer-o” yak ondosoloma-ge, it-nen yogolar-e: ”Ndemeret nit nondokwak nggwe-net yige-o” luk yiga-o.

²³ Yogolikma, Yosua-nen yak ondosolar-e: ”Iri nde ala-ge, mondok kugwiwak nin nap-nen erembel wanugwi kendam worasu ereba-ge inggi mbara wirik puruk, ’Nir-e mondok tugup lak Nagawan Indo Isarael nap Nenmbal Pem Nagawan nag-et ndegel eberenak wulmul-o’ luk owak mbarer-o” yak indij-o.

²⁴ Yosoloma, Isarael nap-nen Yosua yak togolar-e: ”Nir-e Nagawan Indo Nenmbal Pem Nagawan nak ndegel obogolat, at-nen nenpem pidnak nak kwarogolat wulmul-o” luk yiga-o.

²⁵ Iri yogola, iri tarem-e o Sikem iri me-nen Yosua-nen Isarael nap inmin urul posolar-e, it-nen mondok kwaruwakluk, imiri mbarak pidnak wene min enpem pidnak wene min wok indij-o.

²⁶ Imiri mbarak pidnak wene min enpem pidnak wene min ereba na-ge Mbal Pem Nagawan-nen idnak imiri mbarak pidnak engga iri na arem mbarij-o. Iri lug-e, at-nen kerep nggok misik wanarig-e, Nagawan Indo amanggim lenak pidnak ondoro iri na me e nggok iri na indipma sindik pij-o.

²⁷ Iri rak puruk, Yosua-nen Isarael nap oboksa yak ondosolar-e: ”Nagawan Indo-nen nit yak nindidnak oboksa-ge kerep yu eram-nen yak nindidnak me, ”Wene-ge iri yak indid nar-o” luk kerep yu-ge mondok aru wolma-o. Kit-nen Nagawan Indo Nembal Pem Nagawan imin eyak worogolat woragup naru, kerep yu-nen-e kinndi yeberak konposolat wolma-o” yak indij-o.

²⁸ Iri yak unduruk, worok tak posolar-e, Yosua-nen-e ap ereba na-ge oboksa wirik onposola, ir-e onnggweyak mbal indidnak sa lombok mbiriga-o.

Yosua min Eleasat min wat yidnak wene 24:29-33

²⁹ Worarug-e, Nun ambara Yosua iri na-ge olengen seratus sepulu (110) woraruk, wat yij-o.

³⁰ Iri yamu-ge, ondomok onggweyak Timnat-Sera abare abam (utara) nggwe ndobo Nggas ambigit nggwe ndobo worak Eperaim iri na me-t yapma piga-o.

³¹ Nde, Yosua iri na uruk woralar-e, Isarael nab-e Nagawan Indo nak ndegel obogolat woraiga-o. Wat yamu-nen na it ennggendumu enne kulugwi nap ereb-e Nagawan Indo-nen Isarael nap yongga ondosolat, kwiye worak kwarid ereba-ge enlengen-nen kaidnak nap ereba na woragola, enne kologolar-e, Nagawan Indo nag-et ndegel obogolat woraiga-o.

³² Sikem nggweyak Yakup-nen Sikem eid Emot ilirak enpem perak tol seratus (100) pem onggo pid iri na me-ge Isarael nap Mesira-nen lobok yogolat, Yusup owak waruk lobok yiga iri na-ge Sikem iri me yapma piga-o. Nde, Sikem nggweyak iri-ge Yusup-nen wigarak ombo rak inpiga-o.

³³ Nde, imbirig-e Arun ambara Eleasat iri na min-et wat yamu, Nggibea iri me yapma piga-o. Nde, Nggibea siri iri-ge o ndobo worak Eperaim korok korok iri mer-o. Nde, o iri-ge Eleasat ambara Pineas wok tiga-o.