YOSUA 2 - Nanduk Ngget Tul Pidnak Wene

Yosua-nen ap mberen enlengen waruk Yeriko wi wirik inpidnak wene 2:1-24

¹ Nde, misik tarem-e Nun ambara Yosua-nen-e o Sitim iri me-nen ap mberen enlengen waruk Kanaan wi wirik inpij-o. Wirik onposolat-nen yak ondosolar-e: ”We mbik mbok nak Kanaan wi min nggog-e o siri Yeriko min kwara mbenarurag-o” yak ondosoloma-ge, ap mberen ya na-ge mbiriga-o. Mbirigarig-e, kwe terak yebil nugwi unu-ge Arakap iri na ama nene yiga-o.

² Nde, Yeriko nagawan iri na-nen kolosolar-e: ”Isarael nab-e yawo kubu nit nenma yu enlengen waruk lobok yigarig-o” yidnak wene kulurug-e,

³ ab-e Arakap eram wirik enpamu, Arakap yak togolar-e: ”Ap mberen o Yeriko siri yu oboksa limbinil lobok yigarik, kama worali ereya inpil wasug-o” luk yak tiga-o.

^4-6 Yogoloma, Arakap-nen erep nggarosolar-e: ”Ndemeret an nama lobok yiga-t nde, it iri-ge ngge me-nen lobok yiga-o? An-e naru bug-o. Nde, enpe-ge o nggeret ki yosola lumugumu pak tumende lirigit lak pem ereya-t mbirikma-o. Mborogola, an-nen-e ’Kir-e ngge me mbitli?’ na yak indigit lag-o. Alat nde, ndag-et muk eneyagolar-e, ndak tena unpugub-o” luk yak indij-o. (Arakap-nen-e ap mberen ya na-ge inmin lagarik, o ngguwa mbirik yamuk tak iri na me nggandum mbato ariwak ligik ereba na arem lek yaga inpil nggurug-et nde iri yak indij-o.)

⁷ Nde, nagawan iri-nen onkore wirik inpid nap ereba na-ge o siri nggwe-nen mbepme nggwe onkore mborogola-ge, inmbirik nggwe-ge pak tumende-ge lerak piga-o. Nde, it ereba-nen Isarael nap mberen enlengen waruk lobok yiga ereba na onkore yil yil-e Yi Yareren mbarugwi sa wok yiga-o.

⁸ Kubu iri na-ge ap mberen ya na nene yigit lak ma-ge kwe Arakap na-ge endam o ngguwa bem lagarik,

⁹ ap mberen ya na yak ondosolar-e: ”O yu me nap oboksa-nen kit kenaye kwarat kali-o. Nde, o yu-ge ndemeret Nagawan Indo-nen abu kit kininggem pamu-o luk an-e mondok naru-o.

¹⁰ Kir-e Mesira-nen lobok yogola, yi Nggelaga Koma-t nde kenabuwok Nagawan Indo-nen eberek tak pid wene min iri-nen Amori nap nagawan mberen Sikon min Ok min Yareren eyak ponok mo luwaso (timur) ambigit woragwi indigep wene min nir-e abu kulige-o.

¹¹ Nde, ereba wene kologolar-e, nir-e mondok kwiye kwarat kali-o. Iri yogolar-e, mondok nonowak uruna lasu-o. Nagawan Indo Kenmbal Pem Nagawan-e ndemeret mbal min nggweyak min ombol pem kek tak nagawan-nen yusu-o.

^12-13 Iri ala-ge, an-nen kit kwat kunpusu yu nggal-et kit-nen na an neid niya inmin kwat kunpul-o luk Nagawan Indo unu bem owak mbarer-o. An neid niya min nowe nowot min it winde oboksa min ’Mondok undul pug-o. Inmiri-t yul-o’ luk owak mbarer-o. Kit-nen ndemeret ninmiri-t yuwa-o luk naru worayek-nen an-nen tena wolmomtak yenggerak purak misik wok nerer-o” luk yak indij-o.

¹⁴ Yosoloma, ap mberen ereya na-nen wene onggo yak togolar-e: ”Nagawan Indo-nen nde o yu nit nininggem posola-ge, mondok konag-et kwat kunpul-o. Alat nde, mbigija-ge kat-nen nit nonpok lek kagit lak yugun iri nag-o. Nde, nit-nen kinmiri yurak yige iri nde kwarigit lak yogola-ge, Nagawan Indo-nen imbiri lamut tak nunpuwag-o” luk yiga-o.

¹⁵ Nde, kwe Arakap iri uwi-ge kerep pak leget min erep kundik wiridnak me, ap mberen ereya na-ge o papalo tumende nggwe-nen pak leget ombol nggwe kere bem tiongsa mberak inpij-o.

¹⁶ Iri rak onposolat-nen yak ondosolar-e: ”O yu me nagawan-nen kit kentarem pak turak wirik inpid ap ereba na-nen kit tena kunpuwa naru, kit kenma mborogolar-e, ndobo worak nggwe mburugupndik, ereba me kurak tak kenan pem woraruk, it ndegera tuguruk lobok yogola-net mbururag-o” luk yak indij-o.

¹⁷ Yak ondosoloma, ap mberen enlengen waruk mbiriga ereya na-nen Arakap yak togolar-e: ”Kat-nen kwat kuburak nit urul yak kirige iri-ge kwar-et kubul-o.

¹⁸ Mbigija-ge, kat-nen yu nggal kwarurag-o: Nit abok nde o yu bem mbud yogola-ge, kar-e kere mimi yu-ge nit kerebara mberak nunpusu papalo tumende yu bem-nen para mberak puruk, keid kiya min kowe kowot min keid owe owot oboksa min kat-nen mondok ndok wosa o yu me nak unpurag-o.

¹⁹ It ennggendumu-nen nde ap misik o ma yu me-nen wurungsa mburuwarik pem-nen nde unduwa iri-ge it ondomok nak meya-o. Iri-ge nit nenpem-e lag-o. Alat nde, ma yu-t worakmu-nen indidnak ala perak iri-ge nit nenpem-o.

²⁰ Alat nde, kat-nen nde nit nonpok lek kagunmu-ge, kat-nen kwat kuburak nenpem pigen na-ge mondok kwat kubul pug-o” yak tiga-o.

²¹ Yogoloma, Arakap-nen-e it-nen yiga iri na-ge ”Ob-er-o” yosoloma, it na mborogola-ge, Arakap-nen-e kere mimi iri na-ge uwi papalo tumende bem-nen para mberak pij-o.

²² Nde, ap mberen ya na-ge ndobo worak nggwe mbirigarik, ereba me kurak tak woraiga-o. Woragola-ge, o iri me nagawan-nen it onkore yuwakluk wirik inpid nap ereba na-ge it onkore nin me nan me oboksa onkore yigit nonggolar-e, kenan pem-et onkore yiga-t nde, eneyagit lag-o. Iri ala karug-e, it onkore yidnak nap ereba na-ge tuguruk Yeriko mbiriga-o.

²³ Mborogola-ge, Isarael nap enlengen waruk lobok yiga ya na-ge ndobo bem-nen mbigarik, Yi Yareren mbatluk mbirigarik, Yosua eram wok yogolar-e, it niga wene ereba na-ge ndindera Yosua yak tiga-o.

²⁴ Yak turuk, it-nen yogolar-e: ”It o iri me nab-e nit nenaye kwarat kali-o. Iri ala-ge, ndemeret Nagawan Indo-nen o iri oboksa abu nininggem pij-o” luk yiga-o.