YOSUA 10 - Nanduk Ngget Tul Pidnak Wene

Amori nap yemendak inpidnak wene 10:1-15

¹ Nde, Yerusalem nagawan Andoni Sendek-nen kulidnggal-e Yosua na-ge Yeriko nagawan min o siri min lak tak pid iri na nggal-et o Ai na ndamera lak tak puruk, iri me nagawan min-et lak tak unpuruk keya bij-o yidnak wene min iri-nen Nggibeon nab-e Isarael nap inmin are kundigarik, it ennggendumu worali-o yidnak wene min-et kulij-o.

² Kulurug-e, Yerusalem woragwi nab-e kwiye kwarat yiga-o. Nde, kwiye yiga iri-ge Nggibeon siri-ge o siri mondok nggok o siri nagawan-nen tenagidnak wi erep nggal-et iri-nen o siri Ai nggal-et lak, are, terak minig-et, Nggibeon nap na mondok san wari nak ala karuk, kwiye yiga-o.

³ Kwiye yogolar-e, nagawan Andoni Sendek-nen-e ap yonggo-ge Eberon nagawan Oam eram wirik onposolat, Yaremut nagawan Piream eram wirik onposolat, Lakis nagawan Yapia eram wirik onposolat, Eklon nagawan Ndebit eram wirik onposolat kwarij-o. Nde, ap ereba wirik onposolat-nen wene wosa enpem posolar-e:

⁴ ”Nggibeon nab-e Isarael nap min Yosua min inmin are kundidnak me, unduwok-nen yongga nururak lobok yer-o” luk wene wosa enpem pij-o.

⁵ Yosoloma-ge, Amori nap nagawan lima, Yerusalem nagawan min Eberon nagawan min Yaremut nagawan min Lakis nagawan min Eklon nagawan min oboksa ensan ombo inmin-et lambuk luk lobok yogolar-e, Nggibeon nap kambuk tak unpuruk, enpem mbud yiga-o.

⁶ Iri yogola-ge, Nggibeon nap-nen-e wene wosa pogolar-e, Yosua eram it woragwi sa Nggilnggal pil mborogolat-nen yogolar-e: ”Nab-o. Kar-e nenarig-et keya nunpurak pug-o. Ndobo worak nggwe woragwi Amori nap san ombo oboksa lambuk yogolat nit nak nindili-o. Iri ala, ndag-et nak yongga nindil lobok yurag-o” luk yiga-o.

⁷ Iri yogola karug-e, Yosua min at-nen idnak san ombo oboksa min san ombo ennggendumu-nen wim kalu kalu ereba na min inmin-e wim nggurak Nggilnggal-nen mbirij-o.

⁸ Mborosola, Nagawan Indo-nen Yosua yak tosolar-e: ”Kar-e it enaye yurak pug-o. An-nen abu ombol nggwe rak kibidnak me, o iri me it ennggendumu ap misiger-o luk mbi-nen mondok kit kinmin-e mondok pak tuwa bug-o” yak tij-o.

⁹ Yosoloma, Nggilnggal-nen Yosua min esan ombo inmin-e kubu irit nggibinigarik, mimo irit mondok Amori nap enpem kore yiga-o.

¹⁰ Iri yogola-ge, Amori nap-nen Isarael nap san ombo yik eneyarug-e, wendet yogolat, inndi lak yogola, Amori nab-e ap kwarat Nggibeon iri me-nen indiga-o. Nde, ereb-e muk iniyil ndobo ayo nggwe mbigarik, Mbetoron nggwe-nen mbirigarik, Aseka nggwe-nen sera abare ena (selatan) nggwe Makenda nggwe-t wirik inpil mbiriga-o.

¹¹ Nde, iri kwasa Amori nap kwiye mbukmu-ge, Nagawan Indo-nen talme engen pem-nen indil indil-e Aseka wok yiga-o. Nde, iri indij-e wim nggogolat-nen indiga-ge mariger-et nde, talme engen pem-nen indij-e, mondok terak minig-et indij-o.

¹² Nde, iri tarem-e Nagawan Indo-nen Amori nap urugwe nggwe rak unpuruk, Isarael nab-e ombol nggwe rak onposola-ge, Isarael nap inmbiri bem-et Yosua-nen Nagawan Indo imin yosolar-e: ”Mo yu-ge wa-e. Kar-e Nggibeon anggul pem yu-t ndong min-o. Waneya kat yu-ge wa-e. Ayalon mbirik yu anggul pem-nen konoksa nin me mbururak pug-o” luk yij-o.

¹³ Yosoloma-ge, mo na ndong yosolat, waneya na konoksa nin me mbirigit lak yosolat irit kwasa worala-ge, Isarael nab-e unuwim nap urugwe nggwe rak inpiga-o. Nde, iri kwaridnak wene-ge engga Yasat arem mbarak worasu-o. Mo na ndong tak woralar-e, o misik tarem aptusa ndong tak worasolar-e, siyak kwarat woraruk-net tuguruk woroksa nggwij-o.

¹⁴ Iri kwarid iri nggal-e nanduk na mbi kwat yigit lak, abok-nen na mbi kwat yigit lag-er-o. Iri kwarid iri-ge Nagawan Indo-nen ki nap indi-n pidnag-et kwarosolat-nen kwarij-o. Iri-ge Nagawan Indo Isarael nap enambigit yosolat-nen wim mbarij-o.

¹⁵ Wim iri na iri kwasa nggurug-e, Yosua-ge at-nen idnak esan ombo inmin it woragwi sa Nggilnggal mbiriga-o. 10:16–23:16 Pasal 10:16 kuri-nen Pasal 23 kuri pasal ereya arem-e Isarael nap-nen o Kanaan nggweyak na abu wanurug-e, o nggweyak na tomborogolar-e, Isarael nap enlem lombok nggweyak tembesa wok indij-o.