YOSUA 1 - Nanduk Ngget Tul Pidnak Wene

Yosua ”Kanaan nggweyak mengga wani-o” luk Nagawan Indo-nen Yosua yak tid wene 1:1-9

¹ Nagawan Indo ndegel oboso nap Musa iri na wat yamu-ge Musa indipma Nun ambara Yosua imin wene yak tosolat-nen

² yosolar-e: ”An ndegel noboso nap Musa-ge wat yamu me, yawo-ge kat min Isarael nap oboksa min Yi Yareren mbatluk, o Isarael nap wok indimin iri na me nggurak pem lid lud tak per-o.

³ Nde, an-nen Musa yak tigi iri na ndak ndag-et o kit kunuwok pugup sa oboksa-ge Yosua kat min Isarael nap oboksa min wok kindigi-o.

⁴ Nde, kat kuwi nggweyag-e nembaga abare ena (selatan) nggwe kuri-nen nok mberarik abare abam (utara) nggwe ndobo worak Libanon kuri-nen nok mberarik yi nggok Eperat mo luwaso (timur) nggwe nok lobok yarik eyak ponok nggwe Et nap unuwi nggweyak arem tak puruk mberarik, Yi Koma Nggok mo mboso (barat) nggwe iri na kuri iri-ge kat kuwi nggweyak-nen yusu-o.

⁵ Yosua kat worala-ge, an-nen nanduk Musa imin worasu iri na nggal-et pempa kat kimin woramin me, ap misiger-o luk mbi-nen kat urugwe nggwe rak kubuwa bug-o. An-e mondok keya kibimin pug-o.

⁶ Isarael nap yu an-nen onmborak wok kindimin-o luk urul yak indigi o iri na me kore yil nggogola-ge, kat-nen lit unpuruk nggugun me, kar-e kwiye lak, tugup lak irit wolmin-o.

⁷ Alat nde, mbigija-ge kar-e kindi uwi yaga tugup lak, kwiye lak irit wolmin-o. An-nen imiri mbarak pidnak wene oboksa ndegel noboso nap Musa-nen wok kirid ereba-ge mondok mborok tak pimin naru kwara yik karok wolmin-o. Mariget tet mondok meme rak pigit lak yosola-ge, kat-nen kwarugun-e mondok ebe-t kwat ma-o.

⁸ Nde, imiri mbarak pidnak engga iri-ge kar-e pempa an nilirak ereba wonat ondosolat wolmin-o. Nde, kat-nen engga iri arem mbarak worasu mende ereba oboksa kwarosolat worayeklug-e, kubu-nen lengge-nen kwara mbenarosolat wolmin-o. Kat-nen nde ereba oboksa kwarosolat worala-ge, kar-e ukwe lak, kalen pem woralat, konak nak irit woragun-o.

⁹ An-nen kat yak korosolar-e: ’Kar-e kindi uwi yaga tugup lak, kwiye lak irit wolmin-o’ yak kirigi iri na kindi yeberak wolmin-o. Nagawan Indo Kembal Pem Nagawan an-e kat mburugun sa-ge pempa kimin nosolat woramin me, kar-e kwiye yosolat, kamawi lak yurak pug-o” luk yak tij-o.

Yosua-nen Isarael nap-nen kwarurak enpem pogolat, it-nen kwarurak mul indidnak wene 1:10-18

¹⁰ Yosoloma, Yosua-nen Isarael nap ennggendumu enne kulugwi nap ereba na yak ondosolar-e:

¹¹ ”Kir-e Isarael nap-nen o lije wiril lobok yidnak sa waring kagolat, wene yu yak ender-o: ’Yi Yareren mbatluk, ndil laruk Nagawan Indo Kenmbal Pem Nagawan-nen wok kunduwa o iri na me kore yurak pem ndil lorag-e mberen-et nak nene yurak worasu me, tularo lid lud tak per-o’ luk yak indil nugup na-e” luk yak indij-o.

¹² It enlem Uruben min Nggat min it enlem Manase erep minggirik min Yosua-nen yak ondosolar-e:

¹³ ”Kinndi yebet ker-o! Nagawan Indo ndegel oboso nap Musa-nen kit yak kondosolar-e: Nggweyak Yareren eyak mo luwaso ambigit (timur) nggwe iri-ge kit kunuwi nggweyak kwat makluk, Nagawan Indo Kenmbal Pem Nagawan-nen wok kindij-et nde,

¹⁴ konkwela min kinlirak min konowam min-e yu me-t wolmag-o. Nde, kit ap san wari nggal-e mondok wim nggurak lid lud tak puruk, kennggamirak Isarael nap erep ereba mondok yongga undurak pem it ereba abok tak unpuruk, kit nandug-et Yi Yareren mbatluk, ndil lorag-o.

¹⁵ Nagawan Indo Kenmbal Pem Nagawan-nen-e o Yi Yareren eyak mo mboso (barat) nggwe iri-ge it erep wok unduwama, Nagawan Indo-net Isarael nap enlem oboksa kona yamuksa-t keya onposola woragola-net kir-e tuguruk kenma mo luwaso (timur) ambigit Yareren eyak ponok nggwe Nagawan Indo ndegel oboso nap Musa-nen wok kindid sa yu me-ge ndil lumomtag-o” luk yak indij-o.

¹⁶ Yak ondosoloma-ge, it enlem Uruben min Nggat min it enlem Manase erep minggirik min-nen onggo yogolar-e: ”Kat-nen ’Iri nggal kwarer-o’ luk nenpem posola-ge, kwarul-er-o. Nde, kat-nen ’Iri me mberer-o’ luk nenpem posola na, nenpem pugun sa-t iri na me-t mburul-o.

¹⁷ Nde, nir-e pempa Musa-nen yidnak nak kwatli iri na nggal-et kat-nen yidnak nak kwarul-o. Nde, Nagawan Indo-ge Musa imin woragid iri na nggal-et kat kimin wolmag-o.

¹⁸ Ta-nen nde kat-nen nenpem pugun wene ereba na eyak worosolat, are, kat-nen yugun wene nde kuligit lak yosolat kwarosola-ge, mondok wururag-o. Nde, kar-e mondok kwiye lak, tugup lak irit wolmin-o” luk yak tiga-o.