YOEL 3 - Nanduk Ngget Tul Pidnak Wene

Mbal Pem Nagawan-nen ap enlem oboksa enpem wene mbenaruwa-o 3:1-15

¹ Nagawan Indo-nen yosolar-e: ”Iri tarem-e Yerusalem min Yewura min-e it-nen enalen pem yamuksa woragwi ereba na nggal tuguruk kwarak inpimin-o.

² Nde, ap enlem oboksa-ge an-nen ndok worak unpuruk, wok unpuruk Ap Enpem Wene Mbenarugwi Mbirik iri na me inmin mbirimin-o. It-nen an nilirak kwat onpogolar-e, Isarael nap onggweyak iri na it-nen tembesa wanogolat, an nilirag-e o nin sa nan sa ereba na me mbo onpogolat, kwat inpidnak pem it enpem wene mbarimin-o.

³ It-nen-e Isarael nap wok unpuruk lobok yidnak nap ereba na-ge ta-nen winde ma-o enaru yurak pem engga mbara ligik piga-o. Iri luk, kweyap ndugum min ap sujwe min ereba na-ge wok unpurug-e, mumnggup manggim nap wolmakluk ap enpem onnggo wanuruk, onnggo pidnak tol ereba na-ge it-nen terak nugwi kweyap ereba na wok ondogolat, inndi nden kaso yi onggo bogolat kwat tenak woraiga-o.

⁴ Tirus woragwi min Sindon woragwi min Pilisin nggweyak pem woragwi oboksa min wa-e. An-e kit kinmin-e erem-e lag-o. Kir-e kenmep nggo an kwat nubugub-a? Iri ala-ge ob-o. An-nen na ndag-et nak kit-nen kwarugup iri onggo-ge kwar-et kinpimin-o.

⁵ An-nen idnak emas min perak min-e kit-nen mengga wanigepma-o. Nde, an nisilobulo onggo nggok pugwi ereba na-ge kamuruk kit kunkugwiwak uwi ereba na me waruk mbirigeb-o.

⁶ Nde, Yewura woragwi nap min Yerusalem woragwi nap min-e it unuwi nggweyak pem-nen nin sa wok unpuruk mbirigepndik, Yunani nap enpem onnggo wanigeb-o.

⁷ Nde, yawo-ge it iri-ge kit-nen onnggo wanigep sa-nen wok unpuruk lobok yimin-o. Kit-nen it meya sa-t kemet inpigep onggo kit kwat kinpimin-o.

⁸ Onggo kwat konposolar-e, kit kinligwami min kinliap min-e an-nen Yewura nap enpem onggo wanumu, it-nen-e tuguruk mondok erepma Seba nap enpem onggo wanuwa-o. Nagawan Indo an-nen yusu-o.

⁹ Wene yu-ge ap oboksa ennggendumu kuluwakluk yak undurag-o: ’Wim nggurak lid lud tak per-o! San ombo enmawi worak yonggo unpuruk, san wari oboksa min kenmawi kunduruk mondok kenanggul tak per-o!

¹⁰ Nggweyak yalugwi kentege-ge wim nggurak yalawi kwarak per-o. Nde, tusuangge mbarugwi-ge ap kundugu unpurak tege kwarak per-o. Iri-nen ap enmawi lak-nen yogolar-e: ”An-e san ombo nggal kwatluk namawi-t kundimin-o” luk yuwag-o.

¹¹ Yi nap ndi nap enlem oboksa nit nentalu woragwi nap wa-e. Ndag-et lobok yugupndik mbirik ele me ndok werer-o’ luk yak undurag-o” luk yij-o. Nagawan Indo wa-e. Kat-nen idnak kesan ombo-ge inpil lobok yugunmu, it inmin wim mbaruwag-o!

¹² Nagawan Indo-nen tuguruk yosolar-e: ”Ap enlem oboksa-ge Ap Enpem Wene Mbenarugwi Mbirik iri na me mbururak pem lid lud tak pogolat wolmag-o. Nde, iri me-nen-e Nagawan Indo an-nen an nilirak entalu woragwi nap ap enlem ereba na enpem wene mbenarimin-o.

¹³ It ereba-ge mondok meya nak kwarugwi-nen yili-o. Ir-e nggandum mbato yapmu ogore yidnak ereba na nggal lel pasa mbarak enper-o. Anggut engen amburu mbulugwi sa amburu mbologola, amburu kobong luk nggilara mbusu ereba na nggal makluk it ereba-ge kunuwok-nen enal lebarer-o.

¹⁴ Nagawan Indo-nen idnak tarem mondok ndag-et wok yurak ala karuk, Ap Enpem Wene Mbenarugwi Mbirik iri na me-ge ap mondok kwarat (ribu ribu) irit ndok worak worali-o.

¹⁵ Mo min waneya min mom ki yosolat, wonaru na eyaya lak ma-o” luk yij-o.

Mbal Pem Nagawan-nen at ilirak inmbiringgat tak puwa wene 3:16-21

¹⁶ Nagawan Indo-ge at Ondobo Sion pem-nen singa ene nggal ngol yosolat, Yerusalem-nen ene-ge o nggu nggal yosolat, ene-nen ndowaga mbal min nggweyak min-e lele yosolat yusu-o. Alat nde, Nagawan Indo-nen-e at ilirak Isarael nap enambigit yosolat, nggetlel onposolat wolma-o.

¹⁷ ”Isarael nap wa-e. Iri yosola-ge, an-e Nagawan Indo kit Kenmbal Pem Nagawan-nen yusu-o luk kenaru yugub-o. An-e nondobo marak Sion iri na bem-et woraso-o. Yerusalem na o siri marak irit kwat ma-o. Nde, Mbal Pem Nagawan enaru buk nab-e iri me-ge tuguruk ngguwa bug-o.

¹⁸ Nde, ereya tarem-e ndobo ndobo ereba-ge anggut yabu-nen nggweyak lak ma-o. Nde, wam-e ndobo amun ereba na bem tusuangge miri ereba na nasolat wolma-o. Nde, Yewura iri me yi ereba na-ge eberek yigit lak, mborosolat nak wolma-o. Nde, yi misig-e Nagawan Indo ama-nen puluruk mborosolat wolma-o. Mborosolar-e, Akasia Mbirik iri na-ge amburu rak pil mburuwa-o.

¹⁹ Nde, Mesira-ge nembaga nggweyak mondok amburu lak nde yaga labuk ma-o. Nde, Erom-e nggweyak umbuk le yosolat, ap min wolmomtak puk yaga labuk ma-o. Iri-ge it-nen Yewura nap ondogolat, erem lak ma iri me woragwi nap ondogolat kwaridnak pem-nen kwat ma-o.

^20-21 It indidnak enmep onggo-ge mondok pimin-er-o. It indidnak nab-e mondok lak tak inpimin-o. Alat nde, Yewura min Yerusalem min iri me-ge ab-e pem irit wolma-o. Nde, Nagawan Indo an-e Sion ndobo bem-e pem irit woramin-o” luk yij-o.